भांगरभूंय | प्रतिनिधी
आमच्या वाठारांतल्या रस्ताद सुण्यांची नसबंदी (कापांव) करपाक सक्रीय जावपाचें आवाहन पशु कल्याण एनजीओं कडेन करतां. हांगा जायते सुणे भोंवतात. म्हज्या घराच्या बाल्कनींत थोडे येवन बसतात. तांकां धरूंक मेळना. हांवें कांय एनजीओंक तांची नसबंदी करपा खातीर फोन केल्लो, पूण त्या सुण्यांक धरपाक कोणूच येनात. देखून फुडल्या दिसांनी सुण्यांचो आंकडो वाडपाची शक्यताय आसा.
पशू सांबाळ मंत्र्यांक विनंती करतां की एनजीओंक सगल्या सुण्यांक कळाव करिनासतना उखलपाचे निर्देश दिवचे. केन्ना- केन्ना एनजीओच्या कर्मचाऱ्यांक पयशे दिवपाक लोक पसून तयार आसतात. देखून सगल्या एनजीओंक सरकारान सक्रिय करचें. तांचें रिपोर्ट कार्ड दर वर्सा सरकारान तपासचें. पशुवैजकी खात्यान भटक्या सुण्यांक उखलपा खातीर एनजीओच्या सहकार्यान एक फाटो चलोवचो. ही लोकहिता खातीर सुचोवणी. कांय लोक इतले क्रूर आसतात की ते रस्ताद सुण्यांक विखारी पदार्थ दिवपाक फाटीं सरनात. आमच्या वाठारांत वीख खावन तीन- चार सुण्यांक मरण आयलां.
हें प्रकरण मानादीक मुख्यमंत्री आनी पशुपालन खात्याक ईमेल करून कारवाय करपाक सांगचें, अशे एका एनजीओक निर्देश दिल्ले. पूण ही वेवस्था कोसळ्ळ्या. मागीर ह्या एनजीओचें काम कितें? निदान सुण्यांक कापावं करचे. ह्या प्रकरणांत आंतरराष्ट्रीय एनजीओचे डॉ. हीक गोंयांतल्या जनावरांची जतनाय घेवपा विशीं खूब संवेदनशील आशिल्ले. राज्यांत सुण्यां- माजरांचो आंकडो उणो केल्ल्यान ताका राष्ट्रीय पुरस्कार दिवन भोवमान करपाक जाय आशिल्लो. एनजीओन जनावरांची जतनाय घेवपाच्या मळार सक्रीय आसपाक जाय.
हडफडें- नागव्यां ‘बीएसएनएल’ संथ
बीएसएनएल मोबायल सिम कार्डांचें कव्हरेज/ नेटवर्क हडफडे-नागवा गांवांत सगळ्यांत उणें आसा. कांय वापरप्यांनी बीएसएनएलाच्या नेटवर्का कडेन संबंदीत समस्यांचो अहवाल दिला. ताका लागून विस्वासांत घेवपा सारको हो मोबायल जोडणी खातीर बरो पर्याय नासूं येता, अशें दिसता. पूण हो सरकाराचो प्रगत प्रकल्प अशें मानून कांय जाणांनी नेटवर्क अपग्रेडाची अपेक्षा दवरून बीएसएनएल सिम कार्डां घेतिल्लीं. पूण ताका गांवांत गरजेचें कव्हरेज ना. तें व्हीआय (व्होडाफोन) वा एअरटेल सारकिल्ल्या हेर पुरवणदारां इतलें बळिश्ट ना. बीएसएनएल हांगा ब्रॉडबँड इंटरनॅट दिता, पूण ताचो दर्जो आनी गती वेगवेगळी आसूं येता. हांगां पर्यायी सेवा दिवपीय आसात. पूण आतां मेरेन बीएसएनएल चड फुडें वचपाक जाय आशिल्लें.
हडफडें- नागव्यां कोणाकूय नेटवर्क खात्रेन मेळटा, अशी मोबायल जोडणी जाय जाल्यार वोडाफोन वा एरटेल वापरपाचो विचार करचो पडटलो, कारण ते बरें 4 जी आनी 5 जी कव्हरेज दितात. तसो कांय घटकांचो टॉवर सिग्नलाचेर (इमारती वा दोंगुल्ल्यो सारके) परिणाम जाता. पूण हो गांव उक्तो वाठार आशिल्ल्यान हाची शक्यताय ना. मागीर इंटरनॅट सेवा सुदारपाक बीएसएनएल कित्याक फाटीं आसा? फुडाराक नेटवर्क सुदारपाची आशा आसा? नाजाल्यार मोबायल क्रमांक सगळ्यांत बऱ्या सेवा पुरवणदाराक ‘पोर्ट’ करप हो एकूच पर्याय. हे डिजिटल इंडिया, आतां तूच कितें
तरी कर.
भाषा ही फूट घालपाक न्हय
गांधीजीन हिंदी भाशेक राश्ट्रीय भाशा आनी भारताची आवयभाशा म्हूण वळख दिली. पूण, भाशीक विविधताय हें भारताचें एक मुखेल खाशेलपण, तातूंतल्यान समस्या निर्माण जातात अशें न्हय. भारताची भाशीक विविधताय ही सांस्कृतीक गिरेस्तकाय आनी अस्मिताय हांचो स्रोत आसा. व्यापक संघर्श करिनासतना ही विविधताय साबाळपाचो इतिहास ह्या देशांत आसा. संवाद, आव्हानां निर्माण जावंक शकतात, खास करून राज्यां मदीं संवादांत, इंग्लीश भाशा बदला शिक्षण आनी प्रशासनांत जायत्या भाशांचो वापर हो प्रस्न कमी करपाक मदत करपाक शकता.
भारताच्यो असंख्य भाशा वेगवेगळ्या प्रदेशांच्या आनी समाजांच्या अस्मितायेचें आंग. खंयचीच एकूच भाशा भोवसंख्य लोक उलयनात, ताका लागून फूट घालीनासतना हिंदी लादप कठीण जाता.
इंग्लिशीचें वसाहतवादी दायज आनी उपरांत हिंदीचो धक्को हे दोनूय वादाचे मुद्दे. सगळ्या भाशांक आदर दिवपी समतोल पद्दतीची गरज आसा. भारतान 22 राजभाशांक मान्यताय दिवन आनी जायत्या प्रदेशांनी आवयभाशेच्या शिक्षणाक चालना दिवन बहुपक्षीय भाशा धोरण आपणायलां. भाशा फूट पडपाचें निमित्त जावंक फावना आनी भारताची भाशीक विविधताय मनोवची अशें सर्वोच्च न्यायालय म्हणटा.
भारतांत हिंदी भाशा सक्तीचें करपा खातीर कायदो करपाचो सरकार विचार करता अशें दिसता. किद्याक? कारण, भाजपाक ब्रिटीश इंग्लिशी बरोबर दिसता. आमच्या भारत देशाचेर ब्रिटीशांनी 150 वर्सां राज्य केलें हें खरें.. काय इंग्लिशीन केलें?
राजेश बाणावलीकार
वेगसवाडो, हडफडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
