भांगरभूंय | प्रतिनिधी
म्हापशें: निर्ला सुणो आडवो आयिल्ल्या सुण्याक धपको बसले उपरांत दुचाकीच्या फाटल्यान बशिल्ल्या वनलाल दुहपुईआ (26. रा. मूळ मिझोरम) हाका टँकराच्या रोदा पोंदा सांपडून मरण आयलें. जाल्यार दुचाकी चालक जेम्स वनलालीन माविआ (26. रा. मूळ मिझोरम) हो किरकोळ जखमी जालो.
हो अपघात बिरेस्तारा सकाळीं 6.45 वरांच्या सुमाराक घडलो. वनलाल आनी जेम्स दोगूय जीए 03 एएल 8094 नंबराचे दुचाकी वयल्यान कांदोळी सावन पर्वरेचे दिशेन येताले. वाटेर निर्ला पंचायती लागसार तांचे दुचाकी मुखार अचकीत सुणो आयलो. ह्या सुण्याक दुचाकीचो धपको बसले उपरांत चालक जेम्स हाचें गाडये वयलें नियंत्रण गेलें आनी वनलाल रस्त्याचे दुसरे वटेन पडलो. त्या वेळार थंयच्यान वचपी जीए 02 व्ही 9099 नंबराच्या टँकराच्या फाटल्या रोदा पोंदा वनलाल सांपडलो आनी सुवातेचेरूच ताका मरण आयलें. जाल्यार जेम्स किरकोळ जखमी जालो. अपघातांत सांपडिल्लो टँकर घेवन चालक जागोनाथ सरदार (35. मूळ पश्चीम बंगाल) हो कांदोळी वटेन वतालो. अपघाताची म्हायती मेळटाच पर्वरी पुलिसांनी घडणुकेचे सुवातेर धांव घेतली. जखमींक अॅम्ब्युलन्सींतल्यान हॉस्पिटलांत दाखल केले. अपघाताचो पंचनामो पुलीस उपनिरिक्षक प्रजीत तुळसकार आनी हवालदार सुभाष गांवस हांणी केलो. ह्या अपघाताक कारण थारिल्लो दुचाकी चालक जेम्स हाचेर पुलिसांनी सदोश मनीसवधाचो गुन्यांव नोंद केला. ह्या प्रकरणांत पुलीस फुडलो तपास करतात.
चावी घेवन येतना अपघात
पर्वरेच्या एका कॅसिनोंत वनलाल दुहपुईआ आनी जेम्स वनलालीन कामाक आशिल्ले. तांचे बिराडाची चावी कांदोळे रावपी इश्टाच्या बिराडाचेर उरिल्ली. ही चावी हाडपा खातीर ते गेल्ले आनी परत येतना हो अपघात जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
