भांगरभूंय | प्रतिनिधी
पूण, कितेंय जालें तरी कायदो हातांत घेवन दुसऱ्याच्या खुनाचो यत्न करप ही गंभीर गजाल.
सत्तरीच्या दशकांत गोंयांत कुमार नांवाच्या मनशान खून केल्लो. तेन्ना गोंय हालिल्लें. उपरांतूय बरेच खून, खुनाचे यत्न जाले. कांय प्रकरणांचो तपास लागलो, थोड्यांक ख्यास्त जाली, थोडे सुटले. हांगा अॅसिड हल्लेय जाल्यात. काल धारगळे जालो तो भिरांकूळ. हें अॅसिड न्हय, तर रसायन, अशें पुलीस म्हणटात. हाचे पयलीं 1990 च्या दशकांत अंगना शिरोडकार (मूळ बोरी) हे म्हापशेंचे शिक्षिकेचेर अॅसिड मारिल्ल्यान मरण आयिल्लें. लग्नाक न्हयकार दिल्ल्यान तो हल्लो जाल्लो, तातूंत एका वरिश्ठ फुडाऱ्याचे लागींचे व्यक्तीचो हात आशिल्लो, अशे दुबाव तेन्ना लोकांनी उक्तायिल्ले. 8 जून 2016 दिसा गिरींतली एक चली आनी तिचे आजयेचेर मालमत्तेच्या वादांतल्यान अॅसिड मारिल्लें. वेवसायीक कारणां, दुस्वासाक लागून देशांत अॅसिड मारपाच्यो घडणुको घडल्यात. पूण, चडशीं प्रकरणां मोगाक लागून, अशें दिसून आयलां. हाचेर मानसोपचार तज्ञांनी, समाजान गंभीरपणान विचार करपाचो परत एकदा वेळ आयला. खास करून जुंवानपणाच्या हुंबऱ्याचेर आशिल्ल्या तरणाट्यांनी!
धारगळेचें ह्या प्रकरणाचो तपास चालू आसा. हल्ल्या फाटलें नेमकें कारण कांयशें स्पश्ट जालां. पुलिसांच्या मतान, ‘ह्या तरणाट्याची एके चलये वांगडा इश्टागत आशिल्ली. फाटल्या म्हयन्यांत ते चलयेक मरण आयलें. ह्या मरणाक हो तरणाटो जापसालदार असो दुबाव आशिल्ल्यान निलेश गजानन देसाय हाणें हो हल्लो केलो खंय.’ तो ते चलयेचो बापूय. म्हणटकच ताणें सूड भावनेन हो हल्लो केला, असो मुळावो अदमास. चलयेच्या मरणाच्या प्रकरणाची सिंधुदुर्ग पुलीस तपास करतात. तो खंय मेरेन पावला, ते कळना. पूण गोंयच्या पुलिसांनी ह्या हल्ल्या फाटल्यान आनीक कितें कारण आसा जाल्यार तें बेगीन सोदून काडपाची गरज आसा.
मोग ही पवित्र भावना. सामकी खाजगी गजाल. पूण, ताचेर समाज घोस्तान चर्चा करता. हांगा चले, चलयो मेकळेपणान एकमेकां वांगडा इश्टागत करतात. काॅलेजीक, सिनेमांक, पिकनीकेक वतात. हाचो अर्थ चली वा चलो अमक्याच्या मोगांत आसा, असो तर्क काडप योग्य न्हय. मुखार कितेंय जालें जाल्यार कोणे दोगां मदल्या एकल्याक जापसालदार धरपूय चुकीचें. कारण न्हयकार दिलो म्हूण आत्महत्या केल्ल्याचीं प्रकरणां घडल्यांत. आपल्या मना सारकें जावंक ना वा जायना म्हूण जोडीदाराचेर आरोप करून हल्लो करप वा मानसीक नदरेन ताका पुराय उध्वस्त करपाचेय प्रकार जाल्यात. धारगळ प्रकरणांत पुलिसांनी सध्या मुळावी म्हायती उक्ती केल्या. चित्र कांय दिसांनी स्पश्ट जातलें. पूण, कितेंय जालें तरी कायदो हातांत घेवन दुसऱ्याच्या खुनाचो यत्न करप ही गंभीर गजाल. आपूण काम करता थंयचें रसायन बालदेंतल्यान हाडून त्या भुरग्याचेर उडोवप ही भिरांकूळ आनी मनीसपणा भायली गजाल जाली. हेर तरणाट्यांनीय ह्या पुराय प्रकरणा पसून बोध घेवंक जाय. सिनेमा, सोशल मिडियाचेर जें दिसता तें आनी वास्तव जीण ही वेगळी आसता. कोणे न्हयकार दिलो वा कोण हयकार दिना म्हूण फुर्योज जावन अविचार करप हेंय चुकीचें.
भारतांत अॅसिड सोंपेपणी मेळटा. सरकारान बंधनां घाल्यांत, पूण ती आनीक खर करपाक जाय. अॅसीड विकत घेवप्याची पुराय नोंद, म्हायती विक्रेत्यान दवरप गरजेचें. परवानो आसले बगर तें कोणाक विकपाक दिवंक जायना. शाळा, काॅलेजींनी अॅसिड वापराचे धोके, ख्यास्त, हल्लो जाल्यार कितें करप हे खातीर जनजागृताय गरजेची. अॅसिड हल्लो करप्याक 10 वर्सां बंदखणीची ख्यास्त आसा. समाजानूय जागृत रावप बरें. कांय कडेन अॅसिडां, रसायनां बेकायदेशीर पद्दतीन विकतात, तांची म्हायती पुलिसांक दिवंक जाय. हल्ल्यांत जखमी जाल्ल्यांचें सरकारान आनी समाजान पुनर्वसन करपाक जाय. पुराय राज्याक हालोवन उडोवपी हो धारगळे सारको हल्लो परत खंय जावचो न्हय!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
