भांगरभूंय | प्रतिनिधी
हालींच्या काळांत व्यस्त जिणेक लागून आनी कामाच्या वज्याक लागून सगळ्यांक सारकी न्हीद मेळना. ‘स्लीप हेल्थ’ ह्या नेमाळ्यांत उजवाडाक आयिल्ल्या एका अभ्यासा प्रमाण सप्तकाच्या शेवटाक वा सुटयेच्या दिसांनी सदचे परस एक वर वा चड न्हीद घेतल्यार काळजाच्या दुयेंसांचो धोको उणो जाता.
ज्या लोकांक फावो ती न्हीद मेळना तांकां स्ट्रोक, कोरोनरी हार्ट डिसीज आनी एनजायना हांचो चड धोको आसता अशें अभ्यासांतल्यान दिसून आयलां. अमेरिकेच्या रोग नियंत्रण आनी प्रतिबंध केंद्रान पयलींच सांगलां की फावो ती न्हीद मेळना जाल्यार काळजाचें दुयेंस, टायप २ गोडेंमूत, वजनांत वाड, डिप्रेशन, हाय ब्लड प्रेशर आनी हेर दुयेंसांचो धोको वाडटा.
तरणाट्यांक काळजाच्या दुयेंसान मरण
फाटल्या तीन दशकांत संवसारभर काळजाच्या दुयेंसांक लागून मरण येवप्यांचो आंकडो ६० टक्क्यांनी वाडला, अशें वर्ल्ड हार्ट फेडरेशनान म्हणलां. २०२१ वर्सा काळजाच्या आताकांतल्यान २ कोटी लोकांक मरण आयलें, जाल्यार १९९० वर्सा हो आंकडो १ कोटी २१ लाख आशिल्लो. २०२१ वर्सा संवसारभर मरण येवपाचें मुखेल कारण म्हळ्यार काळजाच्या दुयेंसां कडेन संबंदीत विवीध कारणां आशिल्लीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
