भांगरभूंय | प्रतिनिधी
आतां चडशा सुवातींनी वर्सुकी परिक्षा सुरू जाल्यात. थोडे कडेन सोंपल्यात. कांय दिसांनी शाळेंक गिमांची सुटी पडटली. परिक्षे उपरांत जून म्हयन्यांत शाळा सुरू जाय मेरेन भुरग्यां कडेन सुमार देड म्हयनो आसता. भुरग्यांच्या वेळाक मान दिवप हें पालकांचें कर्तव्य. भुरग्यांनी सैमीक रितीन जायते खेळ खेळपाक जाय. पेंवपाक शिकचें. सगल्या गांवांनी, शारांनी पेंवपाची तळीं, स्विमींग पूल आसात. आयज लेगीत जायत्या गांवांनी व्हाळ आसात. थंय पेंवपाक शिकपाक कसलीच हरकत ना.
दर दिसा भुरग्यांक पंचतंत्र, बीरबल आदी जायत्यो, खास करून बोध आशिल्ल्यो काणयो सांगपाक जाय. तांकां जायत्या विशयांचेर पुस्तकां वाचूंक दिवचीं. देशभक्तांची कथा वाचून तांकां आदल्या काळांत आपल्या देशांतल्या लोकांनी केल्ल्या त्यागाची कल्पना येतली. काणयो आयकून आनी वाचल्यार भुरग्यांचें सामान्य गिन्यान वाडटा. याद दवरपाची तांक वाडटा. उतरावळ सुदारता. जायत्या शास्त्रीय उतरांची वळख जाता. जायतीं जनावरां, सुकणीं हांची वळख जाता.
दिसाळ्यांनी चित्रां आसतात. तीं रंगोवपाक मेळटात. शारी वाठारांनी शिबिरां आसतात, थंय जांकां शक्य आसा तांणी वचपाक हरकत ना. अशें शिबिर व्यक्तिमत्वाची उदरगत करपाक मजत करता. व्यायामाचेर लक्ष दियात. लागीं आशिल्ले किल्ले, थळां आनी आवडीच्यो सुवाती भुरग्यांक दाखोवंक जाय. एकंदरीत भुरग्यांक वेळ दिवप खूब गरजेचें आनी पालकांनी हें काम करप म्हत्वाचें.
ई खेळांत वाड, हुस्क्याची गजाल
पयलीं भुरगीं कोंयडे बाल, खो- खो, कबड्डी अशे मैदानी खेळ खेळटाले. मजा म्हणल्यार ह्या खेळांक पयशे लेगीत लागनाशिल्ले. सध्या मात क्रिकेट शिबीर, बॅडमिंटन खेळटलो जाल्यार नोटी भायर काडच्यो पडटात. सगळो काळच बदलला. आयचीं भुरगीं क्रिकेट, ई- खेळां विशीं पिशीं जाल्यांत. खास करून ई- खेळ हें भलायके खातीर धोक्याचे. फकत भारतांत ई- खेळांची उलाढाल सुमार 4 कोटी डॉलर आसा. फुडल्या 3 ते 4 वर्सांत ती 14 कोटी डॉलर जातली, असो अदमास आसा.
भुरगीं ह्या दिसांनी वरांचीं वरां इंटरनॅटाचेर घालयतात. आनी जायते फावटीं अनवळखी सर्तकां वांगडा खेळतात. ह्या खेळांत 24 वर्सां सकयल्या भुरग्यांचो आंकडो खूब व्हड आसा. नी आतां महाविद्यालयांनी लेगीत ई- पंगड तयार जाल्यात. हाचो फुडलो विचार म्हळ्यार 2024 वर्साच्या ऑलिम्पिक खेळांत ई- खेळांचो आस्पाव करपाची तयारी सुरू आसा. फाटल्या दोन वर्सांत देशांत कोरोना आशिल्लो, देखून ई- खेळांत व्हड प्रमाणांत वाड जाली. 2021 वर्सा भारतांत ई- खेळ खेळपी लोकांचो आंकडो देड लाख आशिल्लो. 2022 वर्सा हो आंकडो वाडून 6 लाख जालो. ह्या खेळांचो अतिरेक भलायकेचे नदरेन धोक्याचो थारता.
शाळेंत शिक्षकांनी विद्यार्थ्यांक मैदानी खेळांचें म्हत्व सांगचें आनी तशेंच भलायकेचे नदरेन ई-खेळ कशे धोक्याचे आसात हेंय समजावन सांगचें. तेन्नाच आयचीं भुरगीं भलायकेन बरी जातलीं. दर एका घरांतल्या पालकांनीय हांतूंत योगदान दिवचें. कारण ई खेळ भुरग्यांक हिंसक करतात. तांकां ताण हाडटा. ते खातीर मैदानाचेर खेळप गरजेचें. सकाळीं ७ ते ९ वा सांजवेळा ५ ते ७ मेरेन मैदानी खेळ खेळूं येतात.
शांताराम वाघ
96234 525 53
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
