भांगरभूंय | प्रतिनिधी
आ तां सगळ्या शाळांच्या विद्यार्थ्यांक अधिकृत सुटी आसा. चड खेपो हे सुटयेचो आमी योग्य उपेग करून घेताच, अशें ना, पूण आतां तरी जागे जावन हे सुटयेचो बरे तरेन उपेग करून घेवया अशें नमळायेन सांगचें अशें दिसता. हे सुटयेंत कांय गजाली करपाक जाता, ज्यो करियराक उपेगी थारपाक शकतात. तुमी छदाचो अभ्यास जरुर करात आनी आवड आशिल्ल्या छंदाची उदरगत करप, हें चड म्हत्वाचें. दरेके शाळेंत संगीताचे शिक्षक नेमल्यात, हें मतींत दवरून तुमी तबलें, पेटी, गायन शिकूं शकतात. तुमचें निरीक्षण बरें आसा जाल्यार व्हायोलीन, मुरली, जलतरंग सारकें वाद्या सहसा वाजोवपाक मेळना, ताचोय अभ्यास करपाक शकतात. मुळाव्या गिन्यानांत सुर वळखूंक आयले जाल्यार खूब बरें. घरा बसून लेगीत खूब कितें करूं शकतात. मोबायल मात्सो पयस दवरात.
फोटो पळोवन रांगोळी काडपाक तुमी घरा कोणाच्याय मार्गदर्शना सकयल शिकपाक शकतात. मोबायल फोनाक लागून फोटो काडप सोंपवें जालां. कांय जाणांक तें सहज जमता, पूण मार्गदर्शन घेवप सदांच बरें. ते खेरीज अक्षरसुदारप शब्दसंग्रह वाडोवपाचें काम तुमी घरचे घरा करपाक शकतात. अमुकच भाशा शिकपाक जाय, अशें ना. तुमकां जी आवड आसा ती भाशा शिकात. ते भाशेंतलें दिसाळें वाचपाची संवय लायात. हातूंतल्यान तुमचें गिन्यान, म्हायती सुदारुं शकता. कोंकणी शिकपाक सोदप्यांनी भांगरभूंय दिसाळ्यांतलें होमखण वा हेर मानेस्त लेखकांनी बरयिल्ले लेख वाचूं येतात. बिम्ब, जाग हीं नेमाळींय वाच्चीं. भाशा सुदारतली. तुमकां जर रांगोळी शिकपाची आसा, तर दिवचलचो अर्जुन नायक तुमकां शिकोवं शकता. तो एमकाॅम जाला. तो म्हणटा, ‘रांगोळी शिकपाक सोदपी व्यक्तीक आतां चड अभ्यासाची गरज ना. इंटरनेटा वयल्यान वेगवेगळे डिझायन शिकपाक मेळटात. तुमी लोकप्रीय कलाकार, खेळगडो, राजकारणी रांगोळे खातीर वापरुंक शकतात.’ ताणें हालींच नव्या जोडप्याची रांगोळी घाल्ली. ताचो स्टुडियोय आसा. खाशेली गजाल म्हणल्यार तो भुरग्यांक स्वताच्या खर्चान रांगोळी शिकोवपाक वता. ‘ह्या दिसांनी चलेय ह्या मळाचेर दिसतात, पयलीं फक्त चलयोच दिसताल्यो. आतां ड्रेस मेकिंग अभ्यासक्रमाक चलयांचीय गर्दी आसता, हें आमी पळयतात. पूण फाटल्या कांय वर्सां सावन चलेय तें शिकपाक लागल्यात,’ अशें ताणें सांगलें. रांगोळी शिकप्याक मार्गदर्शन मात जाय. अर्जुन फोटोग्राफी शिकोवं शकता, पूण सध्या वेळाक लागून तांणी रांगोळेचेरुय भर दिला. तुमी 88302 03062 ह्या क्रमांकाचेर ताचे कडेन संपर्क करपाक शकतात.
हे सुटयेंतूच न्हय, तर हरशी लेगीत तुमी रांगोळी कला शिकपाक शकतात. हातूंत वेगवेगळे कला प्रकार, डिझायनूय आसात. उदका वयली रांगोळी, वेगवेगळ्या डायमेन्शनांतली रांगोळी… खरें तर हे कलेन स्काय इज द लिमिट अशें म्हणीत जाल्यार चुकीचें थारचें ना. रांगोळीचे कितलेशेच विशय आसात. लोकप्रीय मनशांक लोक रोखडेच वळखतात, म्हूण जायते जाण ताची मागणी करतात.
रांगोळीक प्राचीन परंपरा आसा. एक प्रकारची शक्त, पावित्र्य हाचें रांगोळी हें प्रतीक. हिंदू धर्मांत तर प्रत्येक कार्याक, सणाक रांगोळी घालात. ही प्रथा पारशी लोकां मदींय आसा. वात्सायनान एक हजार वर्सां पयलीं रांगोळेचो उल्लेख केला. रामायण, महाभारतांतूय रांगोळेचो उल्लेख आसा. स्वस्तीक, चंद्र, सुर्य, हती तर प्रतिकां म्हूण वापरल्यांत. आतांची पिळगी, तर संगणक, रोबो हांचोय रांगोळेंत वापर करतात. तुमी रांगोळी काडटले, ती सुवात नितळ आनी सुकी आसपाक जाय. अर्जुन तुमकां सगलें शिकोवपाक तयार आसा. ताचें म्हणणें एकूच, विद्यार्थ्यांनी सुटयेंत कितें तरी शिकचेंच!
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
