भांगरभूंय | प्रतिनिधी
पत्रकार लोकमान्य बाळ गंगाधर टिळक हांचे पुण्यतिथी निमतान हो लेख बरयतना सुचोवण्यो पत्रकारितेक आरंभ जाला हें सांगपाची धिटाय दाखयता. तीन, चार दसकांचे पत्रकारितेंत विस्वास जोडिल्ल्या पत्रकारांनी केल्ल्यो सुचोवण्यो सरकार मानून घेता. लोकांक वरिश्ठ पत्रकारांनी दिल्ली म्हायती, केल्ल्यो सुचोवण्यो भावतात. वरिश्ठ काल झगडले, आयजय झगडटात, भासाभास करतात. तांच्या लिखाणांत समाजकारण, मनीसहीत आसल्यार झुजातय दिका मेळटा. विचारमंथन सादूर, शिटूक रावन केल्यार सरकार, समाज जागो जाता. शांतिकायेच्या मार्गान गेल्यार अरिश्टांय पयसावतात, प्रस्न सुटावे जातात.
लोकमान्यांची पत्रकारिता भारत स्वातंत्र्या पयलींची. स्वराज्याची मोख तांचे मुखार आशिल्ली. ब्रिटिशांनी भारत सोडचो म्हणून तांकां भेस्टावपाक, तांचेर उतरांची बडी मारपाक भौशीक गणेशोत्सव, केसरी दिसाळें लोकमान्यांनी जल्माक घालें. ब्रिटिशां आड समेस्तांक जागयलें, सत सांगून उठयलें. उपरांत मुखेल करून लोकसत्ताकार, आदले खासदार कुमार केतकर लोकमान्यांचे पत्रकारितेंतल्यान व्हड जाले. ते दीस वीस, तीस वर्सां एकाच दिसाळ्यांत वावुरपाचे. मोलादीक विचारांचो समाज ते पत्रकारितेन जल्माक घालो. आयज चार दसकां लागीं पाविल्ली पत्रकारिता तांच्याच लिखाणान जल्मल्ली. पत्रकारिता म्हणल्यार समाजमनाचें पडबिंब. त्या पडबिंबाक वेंरो वतात तेन्ना सुचोवण्यो पत्रकारिता जल्मता. सुचोवण्यांचेर सुचोवण्यो येतात तेन्ना उत्कृश्ठताय सोदची पडटा. तोय वावर मोख दवरून केल्यार आडमेळ्यांतय पत्रकारिता जैतिवंत जाता.
सत हेंच पत्रकारितेचें सत्व, तें बेगीन सांगतना चुको जातात तेन्नाच सत सांगून माफी मागल्यार व्हड गुन्यांवय माफ जातात. माफी मागपी, माफी माग म्हणून सांगपी एकेच तांकीचे सदां आसचे ना. एका तेंपार चूक जाल्यार मेमो दिवपाची भास दिसाळ्यांनी जाताली. पत्रकारितेंत 24 वरांचीं 48 वरां जातात, पत्रकारिताय 365 दिसांची.
नायलाॅन66 चें आंदोलन भूतखांब केरी वाठारांत पेटलें तेन्ना 26 जानेवारीचे सुटये दिसा अस्तुरी रिपोर्टराक व्हरपी वरिश्ठ पत्रकार चंद्रकांत घोरपडे लोकमान्यांच्या कदेलार बशिल्ले. तांचे कडेन, आदल्या संपादप्यां कडेन झगडून गोंया भायर वचपीय पत्रकार आशिल्ले.
वीस पंचवीस वर्सां एकाच दिसाळ्यांत वावुरतकच फुडारांत कितें जातलें तें सत तांकां होल्मलें?
वरिश्ठ पत्रकार चंद्रकांतबाब केणी, उत्तम कांबळे, सुरेश स नायक पत्रकारांक फुडाराची दिका दाखोवपी. खबरांची, लिखाणाची माळ गुथपाक शिकोवपी. व्याकरणाक ते म्हत्व दिवपी. तांचे शिकवणेन लेख, खबरांच्या माथाळ्यांत, पुराय बातमेंत, लेखांत कितलीं उतरां आसचीं तें नव्या पत्रकारांक कळ्ळें.
लोकमान्यांनी मीठ मिरसांग लावन खबरो दिल्ल्यो आसत व्हय? एक खबर वेगळे पद्दतीन सांगल्यार ती वाचपी वाचक आसात. टिळकांचे पत्रकारितेंतलीं तत्वां पाळपीय ज्येश्ठ आनी वरिश्ठ गोंयांतय आसतले. तांकां पत्रकारितेचो वाज आयला, तिडकय आयल्या आसत. ती तिडक ते राजकारण्यांचेर काडटात ? पावसाचे खबरेची सुरय फटास मारपी पंडितांकय उखलून धरपी संपादपी आसतले. पंडितय तिकेट मेळोवपाची, वेंचून येवपाची सपनां पळोवपी. जल्मभूंय, कर्मभुंयेंतल्या मतदारांक ते कितें सांगतात? कोणे कितलीं कदेलां उबारलीं ती काणी? गोंय, गोंयकार, गोंयकारपण?
सत सांगुया, जागे जावया. गोंय, गोंयकारपण आयजय आसा, उरतलें पूण गोंयकार गोंयां पसून पयस वतात. उंचेल्या कुशळटायेचे विद्यार्थी देश विदेशांत वचून व्हड जातना गोंयकारपण तिगोवन दवरतात हें सत. तांकांय मंत्र दिवया, देश विदेशांत वचात, थंयची भास, भेस शिकात, शिकयात, फुडार तुमचोच. ‘स्वराज्य हो म्हजो जल्मसिद्ध हक आनी तो आमकां मेळपाकच जाय’ ही जाणविकाय तांकां आसा.
गोंयकारांनीय ‘हे विश्वची माझे घर’ म्हणपाचो वगत आयला. स्वामी विवेकानंदांचो तो मंत्र. विवेकानंदांनी तो संवसारांक दिलो. शांतिकाय, सवस्तकायेचो, भलायकी सांबाळपाचो मंत्र आमी दिवया.
गोंय, गोंयकारांच्या मनाची वळख आशिल्ले केंद्रीय मंत्री नितीन गडकरी हांकां अंदूंचो लोकमान्य टिळक पुरस्कार फावो जाला. प्रधानमंत्री नरेंद्र मोदी उपरांत तांकां प्रधानमंत्रीपद मेळटलें अशो खबरोय येतात. गडकरींक पुरस्कार घेतना, प्रधानमंत्री जातले तेन्ना गोंय यादींत उरतलें अशी आस्त बाळगुया. वर्सा आदीं गडकरी गोंयांत आयिल्ले, मंत्र्यांच्या खात्याचो नियाळ घेयात, अभ्यास करिनात तांकां कुशीक काडात हीं तांची मार्गदर्शी उतरां. तांकां दिल्लें मुख्यमंत्री डाॅ. प्रमोद सावंत हांचेंय उतर मोलादीक.
सुचोवण्यो पत्रकारितेंतले गोंयांतले पत्रकार तीं तांकां याद करून दितले. सुचोवण्यो करात, पर्याय दियात हें सांगपी आदले मुख्यमंत्री मनोहर पर्रीकार. आयज आशिल्ले जाल्यार विधानसभा विसर्जनाचो पर्याय दिवपाचे?
सत, सुचोवण्यो, सादूरतायेच्या पत्रकारितेची तोखणाय करतना चुकोय सांगच्यो. पत्रकार हो सदांचो पत्रकार हें मतींत दवरात. पत्रकारिता दोन तीन वर्सां शिकली, केली म्हणून ते पत्रकार थारतले व्हय?
देशांतच न्हय गोंयांत, विदेशांत पत्रकारिता बदलता, नवें रुप घेता, तरणाटे पत्रकार बदल आपणायतात. आतंकवाद्यांक ख्यास्त दिवपाक कायद्याचेर बोट दवरपी अॅड. उज्ज्वल निकम नियुक्त खासदार जाले. लोकसभा वेंचणुकेंत तांकां जैत मेळ्ळें ना, तें नागपूर न्हय मुंबय वेंचणुकेंत आशिल्ल्यान. वेंचणूक हारले तेच दिसा ते उंचेल्या पांवड्यार पावतले, खासदार जातले हें म्हाका होल्मल्लें. तांकां खासदारपदार कित्याक नियुक्त केला तें सत एखाद्रें वेगळें आसत, देशाक तांची गरज आसा हें खरें. 2009 वर्सा फेब्रुवारी म्हयन्यांत ते गोंयांत आयिल्ले. आयज सरकारांत आशिल्ले कोयर वेवस्थापन मंत्री आतानासियो (बाबुश) मोंसेरात, तांच्या वांगडच्या लोकांनी पणजी पुलीस स्टेशनार फातरांनी अचकीत सांजवेळा हल्लाबोल केल्लो. तेन्नाच अॅड. निकम गोंयांत कित्याक आयले तें खबर नाशिल्लें. तांचे पत्रकार परिशदेची सुचोवणी अॅड. निकम हांचे भावोजी आदले खासदार शांताराम नायक हांणी केल्ली. गोंय श्रमीक पत्रकार संघटणेच्या सभाघरांत कमांडो घेवन आयिल्ले अॅड. निकम एक आदवोगादच न्हय बरे वक्ते, उलोवपी ही जाणविकाय आशिल्ली. पत्रकारां कडेन जाल्ल्या संवादाची खबर छापून आयली तेन्ना ते थँक्स म्हणूंक विसरले नात. लोकमान्यांच्या तेंपा वयलो आनी अॅड. निकम हांच्या मतान 2009 वर्सा गोंयांत जाल्लो राजद्रोह वेगळो व्हय? लोकमान्यताय मानून घेयात, शांत रावात असो मंत्र आमी उपरांत तांकां दिलो. देशांतल्या 25 राज्यांचे वरिश्ठ पत्रकार रोखडेच एकठांय येवपाचे आसात. तांच्योय येवजणी आसात, तांकांय दूख आसा. बदल घडोवन जैत मेळोवपाची मोख तांचे मुखार आसा. फुडाराचे जैताचे वाटे वयले समेस्त जावन.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
