भांगरभूंय | प्रतिनिधी
सुख हें श्रद्धेचेर आदारून आसता, अशें म्हण्टात. सुख म्हणल्यार नेमकें कितें? तुमकां जाय तें साध्य केले उपरांत मेळपी सुख म्हणल्यार सुख. कठीण कितेंय थारावन तें कश्टान साध्य केले उपरांत काळजांत जी भावना उबी रावता ताका सुख म्हणूं येता. अशें म्हणपाक गेल्यार जायते फावटीं साद्या लोकांचें खंयचेय ध्येय सुखांत पळोवंक मेळटात! च्याच्या गाड्यार काम करपी भुरगो लेगीत मजेन आसता. मागीर मजा करप म्हणल्यार सुख अशें दिसता कितें तुमकां? जबाबदारी वाडटा तेन्ना जिणेंतली मजा ल्हवू ल्हवू उणी जाता, म्हळ्यार सुखूय उणें जाता काय? विचारांची माळ तयार जाता…
एक आलीशान घर, गाडी, मोटी बँक शिल्लक हें कांय जाणांक सुख अशें दिसता. तें सगळ्यांच्या सुखाचे व्याख्येचेर आदारून आसता. कांय जाणांक लोकां कडेन जोडपाक, थोड्यांक फकत पयशे जोडपाक, कांय जाणांक पर्यटनांत, थोड्यांक खेळपाक वा वाचपाक सुख मेळटा. भितरली उमळशीक आसता तें करपाची इत्सा, तें करपाक योग्य परिस्थिती निर्माण करप, तें काम करपाक कश्ट करप, ती गजाल ल्हवू आकार घेता आनी ती फळाक येता तें पळोवप… ह्या प्रवासांतले भावनांचे उतार- चढाव. सगळ्या एकत्रीत परिणामाक सुख म्हणूं येता, अशें म्हाका तरी दिसता.
मनाक सुख दिवपी गजाली सुख दितात. समजा एकदम गरीब मनशाची सुखाची कल्पना वेगळी आसूं येता, मनशान स्वताक आनी आपल्या कुटुंबाक दोन फावटीं पोसवण दिल्यार आनी सगळ्यांची भलायकी बरी आसल्यार स्वताक खुशाल म्हणूं येता, अशे देखून खूब जाण आसतात. तुमी कितले खोशी आसात हाचो विचार करप बरोबर, पूण त्याच वेळार तुमी हेरांक कितले खोशी केल्यात वा करपाक शकतात हाचो विचार करप चड म्हत्वाचें. सुखान फाल्यांची वाट पळोवची न्हय. ते आयज मेळोवंक जाय. आमचें सुख दुसऱ्यांचेर आदारून ना. सुखी आसप हो तुमचो निर्णय. तुमचे कडेन जें आसा तातूून तुमी खुशाल आसात काय नात, तें थारायना. तुमी कितें आसात आनी दुसऱ्यांक कितलें सुख दिवपाक शकतात हाचेरच सुख सोडोवंक मेळटा.
खरें सांगपाचें जाल्यार, खोशी ही दुसऱ्याक दिले उपरांतूच वाडूंक शकता. शेजाऱ्याचो पूत पयलो आयलो जाल्यार घरा वचून ताका पेन वा बिस्कुट दिवन काळजा सावन परबीं दिवची. ताका इतलें बरें दिसता आनी ताच्या तोंडार आशिल्ली खोस पळोवन आमीय आपसुकूच खोशी जातात. सुखाचो फवारो मुक्तपणान व्हांवता. फकत आमचे भोंवतणी पळोवचें पडटा. मनशांतलो मनीस कळटकच काळजां एक जातात आनी ताका लागून सुख आपसूक मेळत रावता.
म्हाका दिसता सुख मनशाचे मानसिकतेचेर आदारून आसता. दीसभर फकत गेट उगडपा सारकें वाजेवणें काम करपी गुरखो तुका येतना वतना पळोवन हांसता, तेन्ना म्हाका खरेंच अपुरबाय दिसता ताची. सदांच मुखामळ घुंवडावन गाडयांनी भोंवपी गिरेस्त मनीस पळोवन ताची खोस खंय तरी गेल्या अशें दिसता.
मन सुखी आसल्यार कसलेच त्रास जाणवनात. ल्हान- ल्हान गजालींनी लेगीत खोस पळोवपाचो यत्न केल्यार तुमकां सुख मेळटलें. अचकीत आवडीचें पुस्तक मेळ्ळें म्हणटकच इतलें बरें दिसता. तुमची गाडी येरादारींत शिरकल्ली आसतना शेजारचे गाडयेंतलें ल्हान भुरगें तुमकां पळोवन गोड हांसता आनी ताचे कुकुले हात हालयता, तेन्ना कितलें बरें दिसता म्हूण सांगू. तुमी मळबांतल्या चंद्राक पळयतात तेंन्ना जिवाक बरें दिसता. सुख म्हणटात तें हेच आसूंक जाय.
कांय प्रमाणांत सगळ्यांक कश्ट- दुख्खाक तोंड दिवचें पडटा. मन सुखी दवरतात तेन्ना आपोआप सुख येता. सदची चलपाची सुवात सोडून अपरिचित मार्गांनी चलप हातूंत कितें तरी वेगळें आसा, तें म्हणल्यार सुख. सप्तकी बाजारांत मेळपी वेगवेगळीं वस्तू पळोवन मनांक बरें दिसता. केन्नाय घरांत तयार केल्लो जेवणाचो डबो घेवन लागसारच्या बागेंत जेवप बरें दिसता. बाग वा तळ्या कुशीक जेवणाक वेगळीच रुच येता आनी बरें दिसता, तें सुखूच आसता.
सुख म्हणल्यार सुख. सुर्याक एक खीण विसव घेवपाची सुवात म्हणल्यार सुख, वाळवंटात उदकाचो एक घोट म्हणल्यार सुख… कितेंय मेळप म्हणल्यार सुख ‘भौतिक आसूं वा मानसीक, खूब बरें आनी सुखी दिसता.
त्या ल्हान- ल्हान सुखाच्या खिणांचो अणभव घेवपांत खरी खोस आसता. तांकां अणभवपाक खंय आनी केन्ना सुरवात जाता, थंयच्यान सुखाची भोंवडी सुरू जाता. कांय जाणांक गिरेस्तकायेंत सुख आसा अशें दिसता, जाल्यार कांय जाणांक तें सादेपणांत मेळटा. केन्ना शाळेंत शिक्षकान आमचे खातीर मारिल्ल्यो ताळयो, पयलेच खेपे सायकल चलोवपाची खोस आनी केन्ना इनाम मेळ्ळे उपरांत पालकांच्या दोळ्यांत दिशिल्लो मोग…. आनी हो एक खीण तुमकां आनी आमकां जियेवपाची तांक दिता. जियेवप शिकयता. जिवीत सोबीत आसता. सुखाच्या फवाऱ्यान भरिल्लें सतत…
गौरी भालचंद्र
9422373926
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
