भांगरभूंय | प्रतिनिधी
भांगरभूंय । प्रतिनिधी
पेडणेः धारगळ हांगा सुके कुळण मोपा लींक रस्त्यार जाल्ल्या अपघाता संबंदी थळाव्या लोकांचेर दाखल केल्ले गुन्यांव बेगोबेग फाटीं घेवचे आनी नामदेव कांबळी हाचो बळी घेवपी ह्या अपघाताक जे कोणूय कारण आसात ताचें आड गुन्यांव नोंद करपाची मागणी काँग्रेस पक्षान केल्या. प्रदेश काँग्रेस अध्यक्ष अमित पाटकार आनी काँग्रेसच्या हेर फुडाऱ्यांनी मंगळारा पेडणे पुलीस स्टेशनाक धडक दिवंन निरीक्षक सचीन लोकरे हाचे कडेन स्पश्टीकरण मागलें.
अपघात प्रकरणांत थळाव्या लोकांचेर गुन्यांव नोंद पुलिसांनी जी तत्परता दाखयली तीच रस्ताचें बांदकाम करपी कंपनी आड गुन्यांव नोंद करपाक कित्याक दाखयली ना. थळाव्यांनी दादागिरी केली अशें जर पुलिसांचें म्हणणे आसा जाल्यार पेडण्याचो आमदार प्रवीण आर्लेकार हाची भाश लेगीत दादागिरीची आशिल्ली, मागीर ताचेर गुन्यांव कित्याक नोंद केलो आनी अशें पाटकार हाणे सचीन लोकरेक विचारलो.
पेडणे पुलीस स्टेशनांत गेल्ल्यां मदी काँग्रेस सरचिटणीस जितेंद्र गांवकार, विजय भिके, मांद्रे गट काँग्रेस अध्यक्ष नारायण रेडकार, पेडणे गट काँग्रेस अध्यक्ष कृष्णा नायक आनी हेर वावुरप्यांचो आसपाव आशिल्लो. काँग्रेस फुडाऱ्यांनी पेडणेचो पुलीस उपअधिक्षक राजेशकुमार हाका मेळपा खातीर वेळ घेतिल्लो मात ते कामा खातीर पणजे गेल्ल्यान तांकां मेळपाक शकले नात. उपरांत तांणी निरीक्षक सचीन लोकरे हाची भेट घेतली.
लींक रस्त्याचें बांदकाम करपी कंपनी कडेन कितले कामगार आसात. कंपनीची वाहनां, ताचें परवाने हे विशीं पुलिसां कडेन कसली म्हायती आसा, अशें पाटकारान विचारले तेन्ना कंपनीच्या ड्रायव्हराचें व्हेरिफिकेशन आमी करूं ना हे लोकरे हाणे मानून घेतलें. उपरांत पत्रकारां कडेन उलयतना अमित पाटकारान ह्या अपघातात जे कोणूय जापसालदार आसात तांचेर गुन्यांव नोंद करपाक जाय अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
