भांगरभूंय | प्रतिनिधी
पर्वरी ते पणजे मेरेनच्या रस्त्याचेर लाखांनी फोंडकुलां
म्हापशें ः सुकूर, पर्वरेच्या राष्ट्रीय महामार्ग डायव्हरजनाचे सुवातेर अॅम्बुलन्स उमथली. म्हापशें सावन गोमेकॉच्या दिकेन वचपी ही अॅम्बुलन्स डिवायडराचेर चडिल्ल्यान हो अपघात घडलो. ह्या स्वयंअपघातांत दुयेंती, तशेंच कर्मचारी आनी दुयेंतीचे सोयरे वाटावले. आयतार आशिल्ल्यान ह्या रस्त्यार वाहनां उणी आशिल्लीं म्हूण व्हड अपघात जावपा पासून वाटवलो.
हो अपघात आयतारा सकाळीं सुमार 7 वरांचेर जालो. म्हापशें जिल्लो हॉस्पिटलांतल्यान दुयेंतीक फुडल्या उपचारा खातीर जीए 07 जी 2336 नंबराची अॅम्बुलन्स जीएमसींत वताली. पर्वरे उड्डाण पुलाच्या बांदकामा खातीर सुकूरच्या महामार्गाचेर येरादारीचें डायव्हर्जन सर्व्हिस रोडावेल्यान केलां. ह्या डायव्हर्जनाचे सुवातेरूच अॅम्बुलन्स डिवायडराचेर चडली आनी गाडयेवेल्यान नियंत्रण गेल्ल्यान ती रस्त्यार उमथली. डायव्हर्जन ते तिस्क जंक्शन मजगतींचो पुराय रस्तो शेंकड्यांनी फोंडकुलांनी भरला.
ह्या वेळार अॅम्बुलन्सींत मार्सेलिनो डायस (60, केरी, पेडणें) हो दुयेंती, ड्रायव्हर दयानंद गवंडी, नर्स, कामगार आनी दुयेतीचीं दोगां सोयरीं आशिल्लीं. ह्या अपघातांत तांकां दुखापत जाल्या.
ही घडणूक घडटांच जिल्लो हॉस्पिटला वतीन दुसरी अॅम्बुलन्स धाडली आनी थंयच्यान दुयेंती डायस हाका गोमॅकोंत धाडलो. थंय आतां ताचेर उपचार सुरू आसात. उपरांत अॅम्बुलन्सीच्या ड्रायव्हराची वैजकी तपासणी केली.
अपघाताचो पंचनामो पुलीस निरीक्षक राहुल परब हांच्या मार्गदर्शना खाला पर्वरे पुलिसांनी केलो. उड्डाण पुलाच्या कामगारांनी क्रेनीचे मजतीन अपघातग्रस्त रूग्णवाहिका रस्त्या वेल्यान काडली.
मजगतीं, म्हापशें जिल्लो हॉस्पिटलांतल्यो दोनूय अॅम्बुलन्सी पोरण्यो जाल्ल्यान त्यो मोडिल्ल्यो. हाका लागून भलायकी खात्यान दिवचल केंद्राची ही अॅम्बुलन्स जिल्लो हॉस्पिटला खातीर चवथी पयलीं दिल्ली. हे अॅम्बुलन्सी वरवीं दुयेतींक व्हर-हाड करपाची वेवस्था जाता. मोडिल्ले अॅम्बुलन्सी मदली एक अॅम्बुलन्स सारकी जाले उपरांत तिचोय वापर दुयेतींचे सेवे खातीर करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
