भांगरभूंय | प्रतिनिधी
भांगरभूंय । प्रतिनिधी
पर्वरीः कंत्राटदाराक मरण आयिल्ल्यान सुकूरच्या खेळा संकुलाचें काम फाटल्या एक वर्सा सावन बंद आसा. तें पुराय करपा खातीर गोंय साधन सुविधा उदरगत म्हामंडळान (जीएसआयडीसी) नव्या कंत्राटदाराक कंत्राट दिलां. सुमार 11.33 कोटी रुपया खर्च करून हें काम पुराय करतले.
नव्या कंत्राटदारान कामाक सुरवात केल्या. सगल्यांक पयलीं खंयचें काम करपाचें हें थारावपा खातीर पर्वरीचो आमदार आनी पर्यटन मंत्री रोहन खवंटे हांणी जीएसआयडीसी पदाधिकारी आनी कंत्राटदाराची बसका घेतली. 2014 वर्सा ह्या खेळा संकुलाच्या कामाक सुरवात केल्ली. एक वर्स भरयां तें पुराय करपाचें आशिल्लें. ह्या ना त्या कारणांक लागून फाटल्या आठ वर्सा सावंन हें काम हुमकळटालें.
ह्या खेळां संकुलांत स्विमींग पूल, बॅडमिंटन कोर्ट, टेबल टॅनीस कोर्ट, स्क्वेश, बास्केटबॉल कोर्ट, फुटबॉल मैदान, जिम्नेशियम, मल्टिपर्पज हॉल, लायब्ररी, चेंजींक रुम आनी हेर सुविधांचो आसपाव आसा. स्विमींग पूल आनी खेळा कडेन संबंद आशिल्लीं कामां पयलीं करपाची सूचोवणी नव्या कंत्राटदाराक केल्यात अशें खवंटे हांणी सांगलें. फेब्रुवारी- मार्च 2024 मेरेन सगलें काम पुराय करपाचें उतर कंत्राटदारान दिलां अशी म्हायती ताणे दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
