भांगरभूंय | प्रतिनिधी
आदीं ३.१९ कोटी, जाल्यार हे खेपो २३२ कोटी रुपयांच्यो मालमत्ता जप्त
पणजी : बनावट कागदपत्रांच्या आधाराचेर जमीन हडप करप्यां आड सक्तवसुली संचालनालयान (ईडी) नेटान मोहीम सुरू केल्या, ह्या तपासाक आनीक नेट आयला. शुक्रार (४ जुलय) सकाळीं ६ वरांचेर सुकुरचे आदले सरपंच संदीप वझरकार हांच्या पर्वरेच्या घराचेर ईडीन परत छापो मारलो. ह्यान पयलीं वझरकार हांचे कडेन संबंदीत अंदाज ३.१९ कोटी रुपयांची ७,९७५ चौरस मिटर जमीन जप्त केल्ली.
ईडीन हेर एका प्रकरणांत वट्ट २३२ कोटी रुपयां परस चड किमतीच्यो मालमत्ता तात्पुरत्यो आनी कायम स्वरूपी जप्त केल्यो. बार्देश म्हालांतल्या आसगांव, हणजूण, कळंगूटे, नेरुल आनी पर्रा वाठारांतल्यो वट्ट २४ मालमत्ता तात्पुरत्यो जप्त केल्यात. ह्या जमिनींचें दर सुमार १९३.४९ कोटी रुपया आसा. तशेंच, १५ एप्रिल २०२४ दिसा ३९.२४ कोटींची ३१ मालमत्ता कायमच्यो जप्त केल्यो.
अशाच एका जमीन हडप प्रकरणांत जप्त केल्ल्यो ११.८२ कोटींच्या मालमत्तेचीय नोंद आसा. मोहम्मद सुहैल उर्फ मायकल, विक्रांत शेट्टी, राजकुमार मैथी हांचे आडूय गंभीर आरोप आसात, तांचे सयत ३६ जाणां आड म्हापशेंच्या विशेश पीएमएलए न्यायालयांत सुमार ७४०० पानांचें आरोपपत्र दाखल केलां. हातूंत ३६ साक्षीदारांचीय नोंद आसा.
ईडीच्या तपासा प्रमाण, ह्या सगल्यांनी बनावट कागदपत्रां वरवीं जमीन हडप केल्ल्याचो दुबाव आसा, अर्थीक गुन्यांव फाटो (ईओसी) आनी विशेश तपास पंगडान (एसआयटी) २०२२ सावन ह्या प्रकरणांत ५१ गुन्यांव दाखल करून चवकशी सुरू केल्या.
एप्रिल म्हयन्यांत निमाण्या सप्तकांत ईडीन वेवसायीक रोहन हरमलकार हांच्या गोंयच्या पिळर्ण, पर्वरी, दिवाडी आनी हेर सुवातांचेर छापे घातिल्ले. तेन्ना सुमार १६०० कोटी रुपयांचीं कागदपत्रां जप्त केलीं. हातूंत १००० कोटी रुपयांच्या जमनींची बनावट कागदपत्रां आनी ६०० कोटी रुपयांच्या स्थावर मालमत्तांची अस्सल कागदपत्रांचोय आसपाव आशिल्लो.
ईडीच्या ह्या खोलायेन कारवायांक लागून राज्यांतल्या जमीन घोटाळ्यांची मुळां खोलायेन तपासतात. दोशींचेर खर कारवायेची शक्यताय उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
