भांगरभूंय | प्रतिनिधी
रान अधिकारीः साळांत मनयलो सुकणीं निरिक्षण उत्सव
भांगरभूंय । प्रतिनिधी
दिवचलः सुकण्यांची राखण करचे खातीर विद्यार्थ्यांनी मुखार सरचें. तांकां बंदी वा दुखापत करिनासतना तांकां मेकळेपणान जियेवचे खातीर दरेकल्यान यत्न करचे. पर्यावरणाचो समोल राखचे खातीर दरेका विद्यार्थ्यान यत्न करचो, अशें रान अधिकारी मंजीत गांवस आनी लवेन परेरा हांणी सांगलें.
गोंय रान विभागान आयोजीत केल्लो सवो सुकणीं उत्सव आयतारा 8 जानेवारीक पेडण्यां मनयलो. रेंज फॉरेस्ट ऑफीस पेडणें आनी रावंड ऑफीस इब्रामपूर हांच्या जोडपालवान ही सुकणीं निरिक्षण कार्यावळ साळ बंधारा वाठारांत घडोवन हाडिल्ली. ह्या वेळार मंजीत गांवस आनी लवेन परेरा विद्यार्थ्यांक मार्गदर्शन करताली.
रावंड ऑफीस इब्रामपूरच्या साळ बांदाचेर पांय भोंवडी काडून ह्या उत्सवाची सुरवात जाली. हे कार्यावळींत इब्रामपूरच्या सांतेरी विद्या मंदीर आनी हळर्णाच्या हळर्ण पंचक्रोशी विद्यालयांतल्या विद्यार्थ्यांनी तशेंच शिक्षकांनी वांटो घेवन सुकणी निरिक्षणाचो आनंद घेतलो. तातूंत तांणी विवीध सुकण्यांचें निरिक्षण केलें.
गांवस आनी परेरा हांणी विद्यार्थ्यांक दुर्बिणीच्या आदारान विवीध सुकणीं दाखयलां. तांणी तांकां त्या सुकण्यांचीं नांवा, गूण आनी तांचे विधी वेगवेगळी म्हायती दिवन विद्यार्थ्यांच्या गिन्यानांत भर घातली.
ही कार्यावळ आयतारा सकाळीं 7.30 वरांचेर सुरू जाली आनी सकाळीं 10.30 वरांचेर सोंपली.
सकाळच्या आदेसाक सुकणीं आपापल्या वाठारांत आसतात आनी ते उपरांत तीं अन्नाच्या सोदांत दुसरे कडेन वतात. ताका लागून तांचें निरिक्षण करपा खातीर सकाळीं 7.30 ते 10.30 हो वेळ योग्य आसता. हे खातीर सुकण्यांचें निरिक्षण करपाक साळ बंधारा वाठारांतल्या पाणलोट सुवातेची निवड केल्ली. हे कार्यावळींत विद्यार्थ्यांनी विवीध सुकण्यांचें निरिक्षण करीत तांच्यो हालचालीय पळयल्यो.
ही कार्यावळ घडोवन हाडचे खातीर रावंड फॉरेस्ट ऑफिसर देविदास खलपालकार, रान रक्षक, रानवटी जीव रक्षक, रान कर्मचारी वर्ग तशेंच वाहन चालक हांचो मोलादीक वांटो आशिल्लो. तशेंच सैम मोगींनी लेगीत हे कार्यावळींत वांटो घेतिल्लो. रेस्क्यूयर विराज परवार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
