भांगरभूंय | प्रतिनिधी
संयुक्त अरब अमिरातांत (यूएई) एक आगळो नेम आसा. नेमा प्रमाण ससाणो ह्या सुकण्याक मनश्या भशेनूच पासपोर्ट जारी करतात. ससाणे विमानांत तिकेट घेवन प्रवास करतात. अरब देशांनी, चड करून गिरेस्तां मदीं ससाणो पोसपाचो फकत एक छंद न्हय जाल्यार राजेशाही शान आनी शेंकड्यांनी पोरणे परंपरेचें प्रतीक आसा.
हे ससाणे खूब म्हारग आसतात. तांचे सुरक्षीत आंतरराष्ट्रीय प्रवासा खातीर ‘फॉल्कन पासपोर्ट’ सक्तीचो आसता. हो पासपोर्ट 3 वर्स् खातीर वैध आसता. हो पासपोर्ट सामान्य पासपोर्टा भशेन दिसता. तातूंत ससाण्याचें नांव, पिराय, प्रजाती, धनयाची म्हायती आनी एक वळख संख्या आसता. हो पासपोर्ट करपाक सुमार 4.5 हजार रुपया खर्च येता. गिरेस्तां खातीर ही सामकीच किरकोळ रकम. कितलीशींच विमान कंपनी ह्या सुकण्यां खातीर विमानांत वेगळी सीट आरक्षीत दवरतात, जंय तांकां सीट बेल्ट लेगीत लायतात.
गिरेस्त लोक ससाण्याक आपल्या परिवारांतलो वांगडी मानतात. शेख चडशे ह्या ससाण्यांक आपल्या खांद्यार बसोवन फोटो काडटात. तांचें प्रशिक्षण खूब म्हारग आसता. ह्या ससाण्यांचें मोल लाखांनी आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
