सुंदरबनांत भुरग्यांक बुडून मरण येवपाचो आंकडो चड
भांगरभूंय | प्रतिनिधी
‘चायल्ड इन नीड इन्स्टिट्यूट’ संस्थेचो अभ्यास
कोलकाता, खबरां संस्था ः अस्तंत बंगालांतल्या सुंदरबन वाठारांत एक ते चार वर्सां पिरायेच्या भुरग्यांक बुडून मरण येवपाचो आकडो संवसारांत सगळ्यांत चड आसा. एका अभ्यासा प्रमाण, दर लाख लोकसंख्येक हें प्रमाण 243 आसा असो निश्कर्श काडला. ही आंकडेवारी 2016 ते 2019 ह्या काळांत घडिल्ल्या घडणुकांचेर आदारीत आसा.
‘सुंदरबन’ वाठारांतल्या भुरग्यांच्या बुडपाच्या समस्याचो अदमास घेवपा खातीर दक्षीण 24 परगणांतल्या 13 गट आनी उत्तर 24 परगणातल्या स गटांचो अभ्यास केलो. ‘चायल्ड इन नीड इन्स्टिट्यूट’ हे संस्थेन ‘रॉयल नॅशनल लायफबोट इन्स्टिट्यूट’ आनी ‘जॉर्ज इन्स्टिट्यूट’ हे जागतीक संघटनेच्या सहकार्यान हो अभ्यास केला. ते प्रमाण चडशी भुरगीं घरा सावन 50 मीटर अंतराचेर आशिल्ल्या तळ्यांत बुडल्यांत.
ह्या वाठारांतले सुमार 15.9 टक्के लोक णव वर्सां मेरेनचे भुरगे आसात. चडशीं वसणुको पयसुल्ल्या आनी वैजकी सुविधां पसून वंचित आसात. सुंदरबनांच्या पाणवठ्यांतली उदकाची पातळी पावसाच्या दिसांनी वाडटा आनी दर चार ते पांच वर्सांनी हुंवार येता.
सुंदरबन हो अस्तंत बंगाल आनी बांगलादेशाच्या आग्नेय वाठारांतलो दर्यादेगेवेलो मॅंग्रोव वाठार. थंय ल्हान झाडां वाडटात. दर्यादेगे वेल्या दलदली वाठारांनी वाडपी ह्या ल्हान झाडांची मुळां उदकांत, गाळांत पातळिल्लीं आसतात. ‘सुंदरबन’ मॅंग्रोव रान शंबरां परस चड जुंव्यांचेर पातळ्ळां आनी सुमार 40 लाख लोक हांगा रावतात.
सुंदरबनांतल्या लोकांक डेंग्यू, मलेरिया वा बालविवाहाची जाणविकाय करतात, तशीच भुरग्यांक बुडपाचो धोको आसा ह्या विशीं जागृतताय करप गरजेचे आसा. – बंकिमचंद्र हाजरा, सुंदरबन वेव्हार मंत्री, अस्तंत बंगाल
ह्या ‘सायलेंट किलर’ कडल्यान भुरग्यांक वाटावपाची जापसालदारकी सरकारान घेवप गरजेचें आसा. ह्या अभ्यासाक लागून थळाव्या लोकांक आनी सरकाराक परिस्थितीची गंभीरताय समजून घेवपाक मजत जातली. – सुजय रॉय, अधिकारी, ‘चायल्ड इन नीड इन्स्टिटय़ूट’
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
