भांगरभूंय | प्रतिनिधी
एलईडी नुस्तेमारीचोय बसता फटको
पणजीः राज्यांत विसवण, शिंगाला (कॅटफीश) ह्या व्हड नुस्त्यांचे तुळेन बांगड्यांचें उत्पादन चड आसा. तशेंच एलईडी नुस्तेमारीचोय फटको बसता. व्हड नुस्तें एलईडीचो वापर करपी ट्रॉलरां कडेन चड वळटा, अशी म्हायती नुस्तेमाऱ्यांनी दिली.
राज्यांत फाटल्या तीन वर्सांत नुस्तें मेळपाचें प्रमाण वाडलां. हातूंत परत बांगड्यांचें प्रमाण वाडलां. उपलब्ध जाल्ले. 2021 – 22 वर्सा राज्यांत वट्ट नुस्त्याचें उत्पादन 1 लाख 11 हजार टन जाल्लें. हाचे उपरांत 2022 – 23 वर्सा नुस्त्याचें उत्पादन 1 लाख 16 हजार टन जालें. 2023 – 24 वर्सा नुस्त्याचें उत्पादन 1 लाख 40 हजार टन जालें. पंदरा वर्सां पयली 2009 – 10 वर्सा नुस्त्याचें उत्पादन 86 हजार टन आशिल्लें. नुस्त्याचे उत्पादन वाडत आसा, हे आंकडेवारींतल्यान स्पश्ट जाता.
हातूंत परत बांगड्यांचें उत्पादन लेगीत वाडटा. 2021 – 22 अर्थीक वर्सा बांगड्यांचें उत्पादन 32970 टन आशिल्लें. हाचे उपरांत 2022 – 23 वर्सा बांगड्यांचें उत्पादन 44019 टनाचेर पावलें. 2023 – 24 ह्या वर्सा बांगड्यांचें उत्पादन 51794 टन जालें. आंकडेवारींतल्यान बांगड्यांच्या उत्पादनांत वाड जाल्ल्याचें दिश्टी पडटा.
हे विशीं उलयतना नुस्तेमार पेले फर्नांडीस सांगतात, भायल्या राज्यांतल्या ट्राॅलरांक लागून आतां व्हडलें नुस्तें मेळना. तशेंच एलईडी नुस्तेमारी लेगीत व्हड प्रमाणांत जाता. एलईडी नुस्तेमारीचें प्रमाण चड आसा. हाचोय फटको परंपरीक नुस्तेमारांक बसता. एलईडी लायट आशिल्ल्या ट्रॉलरां कडेन विसवणा सारखे नुस्तें ओडटा. हाचेर सरकारान किदें तरी उपाय काडपाक जाय, अशें पेले फर्नांडीस हांणी सांगलें.
हेर नुस्त्यांचे तुळेंत गोंयांत बांगड्यांचें प्रमाण चड आसा. हातूंत परतून एलईडी नुस्तेमारीचोय फटको बसता, अशें गोंयच्या रापणकारांचो एकवोटचे मुखेली ओलांसियो सिमोयस हांणी सांंगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
