भांगरभूंय | प्रतिनिधी
पणजीः 27 मेर वास्को जावपी सी 20 परिशदेचे म्हायती पुस्तिकेचें लोकार्पण मुख्यमंत्री डॉ. प्रमोद सावंत हांचे हस्तुकीं तांच्या सरकारी बंगल्याचेर जालें. ह्या वेळार महर्षी अध्यात्म विश्वविद्यालयाची संशोधन समन्वयक श्वेता, डॉ. अमृता देशमाने आनी वेवसायीक नारायण नाडकर्णी हाजीर आशिल्ले.
मुख्यमंत्र्यांच्या सरकारी बंगल्याचेर आंतरराष्ट्रीय जी 20 खातीर स्वतंत्र विभाग तयार केला. ह्या विभागांतूच सी 20 परिशदेचे म्हायती पुस्तिकेचें लोकार्पण केलें.
हे सी 20 परिशदेचें आयोजन गोंय सरकार, महर्षी अध्यात्म विश्वविद्यालय, इंटरनॅशनल सेंटर फॉर कल्चरल स्टडीज आनी भारतीय विद्या भवन, नवी दिल्ली ह्या संस्थांच्या जोडपालवान जाता.
27 मेक ‘विविधता, सर्वसमावेशकता आनी परस्पर आदार’ ह्या विशयाचेर सी 20 परिशद वास्को जातली. तातूंत गोंया सयत देश- विदेशांतले मानादीक उलोवपी विवीध विशयांचेर मार्गदर्शन करतले. ह्या लोकार्पण सुवाळ्या उपरांत मुख्यमंत्री डॉ. सावंत हांणी महर्षी अध्यात्म विश्वविद्यालयान केल्ले विवीध अध्यात्मीक संशोधन आनी देश- विदेशांतलो वावर समजून घेवन वावराचें कवतूक केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
