भांगरभूंय | प्रतिनिधी
नवी दिल्ली, खबरां संस्था ः कोविशील्ड ही कोरोना लस तयार करपी सीरम इन्स्टिट्यूट कंपनीन एमपॉक्स (Mpox) लस तयार करपाची घोशणा केल्या. कंपनीचे सीईओ अदर पूनावाला हांणी सांगलें – एमपॉक्स हाका संवसारीक भौशीक भलायकी आणीबाणी जाहीर केले उपरांत आमी लाखांनी लोकांक मजत करपा खातीर एक लस तयार करतात. एक वर्सा भितर आमी ती पुराय करतले अशी आस्त आसा.
एमपॉक्साचे दुयेंती वाडत आशिल्ल्यान 19 ऑगस्टाक केंद्र सरकारान देशांतल्या सगळ्या बंदरां आनी विमानतळां सयत पाकिस्तान-बांगलादेश शिमेचेर अलर्ट जारी केल्लो. परदेशांतल्यान येवपी प्रवाशां मदीं मंकीपॉक्स दुयेंसाचीं लक्षणां दिसल्यार सादूर रावपाक केंद्रीय भलायकी मंत्रालयान अधिकाऱ्यांक सांगलां. सध्या तरी भारतांत कोणाकूच मंकीपॉक्साची लागण ना. भारतात मंकीपॉक्साचो निमाणो दुयेंती मार्च 2024 वर्सा सांपडिल्लो.
2022 वर्सा भारतांत मंकीपॉक्साचे 30 दुयेंती
डब्ल्यूएचओच्या म्हणण्या प्रमाण 2022 वर्सा संवसारांतल्या 116 देशांनी 99,176 मंकीपॉक्साचे दुयेंती आनी 208 जाणांक मरण आयिल्ल्याचें नोंद जाला. अंदूं आतां मेरेन 15,600 परस चड दुयेंती आनी 537 जाणांक मरण आयलां. 2022 मेरेन भारतांत मंकीपॉक्साचे 30 दुयेंतींची नोंद जाल्या. निमाणो दुयेंती मार्च 2024 वर्सा सांपडिल्लो. भारतांत मंकीपॉक्साचे चांचण्यां खातीर 32 प्रयोगशाळा आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
