सीम कार्ड ‘वेरीफाय’ केले ना जाल्यार 10 लाख दंड

भांगरभूंय | प्रतिनिधी

केंद्र सरकारान केलो नेमांत बदल

नवी दिल्ली, खबरां संस्था ः मोबायल फोन सीम कार्डा वरवीं फटवणूक जावची न्हय हे खातीर केंद्र सरकारान व्हड निर्णय घेतला. सीम कार्ड विकपी विक्रेत्यांक पुलीस सत्यापन (वेरीफिकेशन) सक्तीचें केलां. हाचे वांगडाच व्हड प्रमाणांत सीम कार्डां दिवपाचेरुय बंदी घाल्या.
सरकारान 52 लाख मोबायल कनेक्शनां बंद केल्यात. जाल्यार 67 हजार कार्ड विक्रेत्यांक ब्लॅकलिस्टांत घातलां. मे 2023 सावन सीम कार्ड विक्रेत्या आड 300 एफआयआर नोंद जाल्यात. व्हॉट्सअॅपान फटवणूक करपी 66 हजार खातीं ब्लॉक केल्यांत. सीम कार्ड विकप्यां खातीर पुलीस सत्यापन सक्तीचें केलां आनी उल्लंघन करप्यांक 10 लाख रुपया दंड भरचो पडटलो, अशें दूरसंचार मंत्री अश्विनी वैष्णव हांणी सांगलें.
विक्रेत्यांची तपासणी दूरसंचार कंपनींनी सुरू केल्या. देशांत 10 लाख सीम कार्ड विक्रेते आसात. तांकां पुलीस सत्यापन करपाक फावो तो वेळ दितले. बल्क जोडणी सेवा बंद केल्या. ताचे बदला आतां वेवसायीक जोडणीची नवी तरतूद सुरू जाल्या. विक्रेत्यांच्या केवायसी वांगडाच सीम घेवपी मनशाचोय केवायसी करतले अशेंय तांणी सांगलां.
देशांतले सायबर फटवणूक केले उपरांत रोखडेंच सीम कार्ड बदलतात. कांय काळा पयलीं ओडिशांत 16000 प्री-एक्टिव्ह सिम कार्डां जप्त केल्लीं. हें सिम कार्ड अश्या लोकांच्या नांवांन घेतिल्लें जांकां ते विशीं खबर लेगीत नाशिल्ली.