भांगरभूंय | प्रतिनिधी
नवी दिल्ली, खबरां संस्था : केंद्रीय माध्यमीक शिक्षण मंडळान (सीबीएसई) शिक्षणीक सत्र २०२४- २५ सावन शाळांनी क्रेडीट सिस्टीम लागू करपाची येवजण आखल्या. ताचे खाला विद्यार्थ्यांक ६ वी ते १२ वे मेरेन दरेका वर्गांत उण्यात उणो १२०० वरांचो अभ्यास/ शिक्षण पुराय केल्या उपरांत ४० क्रेडीट पॉयंट मेळटले. ते सगळ्या विशयांनी पास जाल्या उपरांत दितले. हे क्रेडिट्स विद्यार्थ्यांचे गुणपत्रिकेंतले गुण/ श्रेणी मुखार नोंद जातले. दरेकल्याच्या शिक्षणीक बँक ऑफ क्रेडिटांत जमा जातले. आतां मेरेन देशांत उच्च शिक्षणाच्या क्षेत्रांत अशी क्रेडीट सिस्टीम सुरू आसा, जाचे वरवीं विद्यार्थ्यांक संस्था वा अभ्यासक्रम बदलपाची सुविधा आसा. सीबीएसई वरिश्ठ अधिकार्यांच्या मतान, क्रेडीट सिस्टिम वेवसायीक आनी सामान्य अध्ययनांत शिक्षणीक इक्विव्हॅलन्सी दिता. विद्यार्थ्याक वेवसायीका बदला सामान्य अभ्यासक्रम वा ताचे मदीं बदल करपाचें आसल्यार क्रेडीट ट्रान्सफरा वरवीं शिक्षण प्रणालींत प्रवेश घेवप सोपें जातलें.
क्रेडिट सिस्टम म्हळ्यार?
ही सिस्टम विकसीत देशांचे शिक्षण वेवस्थेंत पातळ्ळ्या. विद्यार्थ्यांनी अभ्यास वा शिक्षण कितले खरायेन घेतलां, तांणी वा तिणें अभ्यास केल्ल्या शिक्षणीक विशयांची, कुशळटाय आत्मसात केली वा खंयच्या गैर-शिक्षणीक उपक्रमांत वांटेकार जाता हें तांतल्यान समजता.
पर्यायी विशय घेनासतना विद्यार्थ्यांचो ४० क्रेडीट स्कोअर मान्य आसतलो. क्रेडीट सिस्टिमाक लागून विद्यार्थी सहज विशय बदलपाक शकता. हाचो उद्देश अकॅडॅमीक पांवड्यार वेवसायीक आनी सामान्य शिक्षणांत समानताय हाडप आसा.
सत्र २०२३- २४ सावन क्रेडीट सिस्टीम लागू केल्यार कितें जातलें हाचो तपशील जाहीर जाला. ते प्रमाण, ९-१०वी च्या दोन भाशा विशयां वांगडा पांच विशयां मदीं दरेका विशयां खातीर दरेकी ७, शरिरीक शिक्षणा खातीर २ आनी कला शिक्षणा खातीर एक क्रेडीट म्हळ्यार वट्ट ४० क्रेडिट्स दितले. तशेंच १० ते १२ वेच्या स विशयां मदीं भाशा विशयां खातीर दरेकी ६, हेर विशयां खातीर दरेकी ७ अशें वट्ट ४० क्रेडीट्स मेळटले.
दोन फावटीं सेमिस्टराची तयारी
यत्ता तिसरी ते ६ वी आनी यत्ता णववी आनी ११ वे खातीर नवीं एनसीईआरटीचीं पुस्तकां नवें सत्र २०२४- २५ सुरू जावचे पयलीं जारी करपाची तयारी सुरू आसा. सीबीएसई यत्ता १० वी- १२ वेक सेमिस्टर पद्धतीन दोन फावटीं बोर्ड परीक्षा घेवपाक शकता.
नॅशनल क्रेडीट फ्रेमवर्क प्रमाण, १० वी पास विद्यार्थ्यांक क्रेडीट लेव्हल- ३ आनी १२ वी पास विद्यार्थ्याक क्रेडीट लेव्हल- ४ म्हणटले. ग्रॅज्युएटाक लेव्हल- ६, पोस्ट ग्रॅज्युएटाक लेव्हल- ७ आनी पीएचडीक लेव्हल- ८ मानतात. सीबीएसईच्या प्रस्तावा प्रमाण, सध्याच्या ५- ५ विशयां बदला फुडल्या सत्रा सावन ९ वी आनी १० वी आनी यत्ता ११ वी आनी १२ वेच्या विद्यार्थ्यांक १० आनी ६ विशय अनिवार्य आसतले. जातूंत माध्यमीक पांवड्यार दोन भारतीय भासां सयत तीन भाशा विशय आनी वरीश्ठ माध्यमीक पांवड्यार एके भारतीय भाशे सयत दोन भाशा विशय आसतले. वरीश्ठ माध्यमीक पांवड्यार विद्यार्थी हेर विशयूय घेवपाक शकतात. माध्यमीक विद्यार्थ्यांक हेर विशयांचो अभ्यास करून वा कुशळटाय शिकून वा एनसीसी, एनएसएस, ऑलिम्पियाड्स, खेळां, संगीत, नाटक कला अश्या गैर- शैक्षणीक उपक्रमांत वांटो घेवन चड क्रेडीट मेळोवपाचो पर्यायूय आसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
