भांगरभूंय | प्रतिनिधी
नवी दिल्ली, खबरां संस्था ः सीबीएसई (केंद्रीय माध्यमीक शिक्षण मंडळ) (CBSE) आतां धावे आनी बारावे मंडळ परिक्षेच्या निकालांत एकूण गुणांची टक्केवारी जाहीर करचे नात. तशेंच फुडल्या वर्साच्या निकाला वांगडा विभाग (पयलो, दुसरो वा तिसरो) आनी डिस्टिंक्शन जाहीर करचे नात. आतां फकत सीजीपीए (Cumulative Grade Point Average) म्हळ्यार ग्रेड पॉयंट्सांत निकाल मेळटले.
वैयक्तीक कामगिरीचेर लक्ष
निकालांतल्यान टक्केवारी काडपाच्या निर्णयाचेर सीबीएसईचे परिक्षा नियंत्रक सन्यम भारद्वाज हांणी अशें केल्यार पारंपारीक ग्रेडिंग पद्दत सोंपता अशें सांगलें. आतां सगळ्या विशयांचे गूण जोडून टक्केवारी काडून निकाल दिवचे परस दर एका विशयांत विद्यार्थ्यान कशी कामगिरी केल्या हाचेर आमी लक्ष केंद्रीत करपाक सोदतात. हाचो अर्थ एकंदरीत टक्केवारी बदला दरेका विशयाक वेगवेगळे ग्रेड दितले आनी तांच्या सरासरींतल्यान सीजीपीए (CGPA) काडतले.
अशीच ग्रेडिंग पद्दत आसल्यार प्रवेश संस्थांक सोंपें जातलें. खंयच्याच संस्थेक योग्यताय वळेरी तयार करपा खातीर टक्केवारी हेर खंयच्याय युनिटांत रुपांतरीत करपाची गरज ना.
सीबीएसई परिक्षा 55 दीस
2024 वर्सा 15 फेब्रुवारी सावन 10 वी बोर्डाची परिक्षा सुरू जातली आनी 17 फेब्रुवारी सावन 12 वी बोर्डाची परिक्षा सुरू जातली. 10 वीचो निमाणो पेपर 21 मार्चाक आनी 12 वीचो निमाणो पेपर 10 एप्रीलाक जातलो. अंदूंच जुलयात सीबीएसईन 10वी आनी 12 वी बोर्डाची परिक्षा सुमार 55 दीस चलतली अशी अधिसुचोवणी जारी केल्ली. 15 फेब्रुवारी ते 10 एप्रिल 2024 मेरेन ह्यो परिक्षा चालू उरतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
