सीबीआरटी परिक्षा ?

भांगरभूंय | प्रतिनिधी

भिवपाची गरज ना, 75 बदला 80 गुणांचो पेपर

पास जावपाची गूण मर्यादा देंवयली

भांगरभूंय । प्रतिनिधी

पणजी : गोंय लोकसेवा आयोगान (जीपीएससी) सीबीआरटी परिक्षेचे पद्दतींत बदल करतना पेपर 75 गुणां बदला 60 गुणांचो केला. परिक्षेंत पास जावपा खातीर लेगीत गुणांची मर्यादा देंवयतना ती 60 टक्यांचे सुवातेर 50 टक्के केल्या.

सीबीआरटी परिक्षेचे नवे पद्दतीची कार्यवाही 1 नोव्हेंबर 2025 सावन सुरू जातली. हे तारखे पयलीं ज्यो परिक्षा जातल्यो त्यो पयलींचे पद्दतीन जातल्यो. नवे सीबीआरटी परिक्षेचे पद्दतीची नोटीस गोंय लोकसेवा आयोगान जारी केल्या. सरकारी म्हाविद्यालयांतल्या शिक्षणीक पदां सयत हेर राजपत्रीत अधिकाऱ्यांची भरती गोंय लोकसेवा आयोगा वरवीं जाता. सगल्या पदां खातीर सीबीआरटी (कॉम्प्युटर बेस्ड रिक्रुटमेंट टेस्ट) दिवचीच पडटा. आतां परिक्षेचे पद्दतींत बदल केला. हे बदल अशें आसात :

सीबीआरटी पेपर 75 गुणां बदला 60 गुणांचो आसतलो.

पयलीं पेपर 90 मिण्टांचो आसतालो. हाचे फुडें तो 75 मिण्टांचो आसतलो.

सर्वसामान्य/इडब्ल्यूस गटा खातीर पास जावपाक 60 टक्के गुणांची (45 गूण) गरजेचे आसले. हाचे फुडें 50 टक्के गूण (30 गूण) फावोशे जातले.

ओबीसी/ पीडब्लूडी/ सीएफएफ गटा खातीर पास जावपाक 55 टक्के गुणां बदला 45 टक्के गूण.

एससी/ एसटी खातीर पास जावपाक 50 टक्के गुणां बदला 40 टक्के गूण फावोशे थारतले.

सीबीआरटी परिक्षे उपरांत फुडले प्रक्रिये खातीर आयोग पदांचे पांच पटीन उमेदवारांची निवड करतलो. ही निवड सीबीआरटीच्या गुणांचेर आदारीत आसतली. हातूंत कसलोच बदल जावंक ना.

नवे पद्दती प्रमाण शिक्षणीक पदा खातीर इंग्लीश (क्राम्प्रेहेंशन) 10 गूण, सामान्य ज्ञान 10 गूण, लॉजिकल रिजनींग 10 गूण आनी कोर 30 गूण आसतले. शिक्षणीक पदां सोडून हेर पदां खातीर इंग्लीश (क्राम्प्रेहेंशन) 10 गूण, सामान्य ज्ञान 5 गूण, लॉजिकल रिजनींग 10 गूण आनी कोर 25 गूण आसतले.