भांगरभूंय | प्रतिनिधी
10 लाखांची उत्पन्न मर्यादा काडली ; 50 वर्सां पिराये मेरेन मेळटलो लाव
भांगरभूंय । प्रतिनिधी
पणजी : अर्थीक विकास म्हामंडळाच्या (ईडीसी) मुख्यमंत्री रोजगार येवजणेंतल्यान (सीएमआरवाय) उत्पन्न मर्यादेची अट काडल्या. ताका लागून हे मुखेर खंयच्याय गोंयकाराक हे येवजणे खातीर रीण मेळटलें, अशी म्हायती वेवस्थापकी संचालक बी. एस. पै आंगले हांणी शुक्रारा ‘भांगरभूंय’ कडेन उलयतना दिली.
हे आदीं वर्सुकी उत्पन्न 10 लाखां परस उणें आशिल्ल्या गोंयकाराक ‘सीएमआरवाय’ ईडीसी कडल्यान रीण मेळटालें. तशेंच नव्यान वेवसाय सुरू केल्ल्यांक आनी 45 परस अदीक पिराय आशिल्ल्यांक लेगीत रिणाचो लाव मेळनाशिल्लो. पूण हे येवजणेचो सगळ्यांक लाव मेळचो, ह्या उद्देशान ह्यो तिनूय अटी काडपाचे निर्देश मुख्यमंत्री डॉ. प्रमोद सावंत हांणी म्हामंडळाक दिल्ले. ते प्रमाण ह्यो तिनूय अटी काडल्यात. हे मुखार 50 वर्सां पिराये मेरेनच्या खंयच्याय गोंयकाराक रीण मेळटलें. पूण एकाच कुटुंबांतले एकेच व्यक्तीक हे येवजणेचो लाव घेवपाक मेळटलो. ही अट मात कायम दवरल्या, अशेंय पै आंगले हांणी सांगलें. मजगतीं, गोंयकारांनी स्वयंरोजगार करून स्वताची अर्थीक उदरगत करची, ह्या उद्देशान गोंय सरकारान ईडीसीच्या माध्यमांतल्यान ‘सीएमआरवाय’ येवजण सुरू केली. हे येवजणे खाला गोंयांत रावपी व्यक्तीक उद्देग, वेवसाया खातीर उण्या कळंतर दरांक रीण दितात. दर वर्सा ईडीसी कडल्यान हे येवजणे खाला कोटींनी रुपयांची रिणां दितात.
पोरूं सुमार 120 कोटींचीं रिणां वितरीत
ईडीसीच्या ‘सीएमआरवाय’ आनी हेर येवजण्यांक दर वर्सा गोंयकारां कडल्यान उत्स्फूर्त प्रतिसाद मेळटा. पोरूं वर्सभरांत ‘सीएमआरवाय’ आनी हेर येवजण्यांच्या माध्यमांतल्यान गोंयकारांक सुमार 120 कोटींची रिणां दिल्यांत, अशें वेवस्थापकीय संचालक पै आंगले हांणी सांगलें.
कळंगूटेच्या हॉटेल प्रकल्पा खातीर 9 कोटींचें रीण
गोंयांतले एके कंपनीन कळंगूटे हॉटेल प्रकल्प उबारचे खातीर 9 कोटींच्या रिणा खातीर अर्ज केल्लो. ते कंपनीच्या अर्जाक मुख्यमंत्री डॉ. प्रमोद सावंत हांचे अध्यक्षते खाला हालींच जाल्ले बसकेंत मान्यताय दिल्या, अशें पै आंगले हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
