सीआरझेड आनी गोंय!

भांगरभूंय | प्रतिनिधी

गांव, राज्याची उदरगत करतलो जाल्यार ल्हान- व्हड उद्देग येवपाक जाय. पर्यटन मळ तरतरपाक जाय. पूण हो विकास योग्य पद्दतीन जावप गरजेचें. मागीर तो सरकारान केल्लो आसूं वा उद्देजक, वेवसायिकांनी! देशाचे कायदे पाळून तें जावंक जाय. ‘हम करेसो कायदा’, हांगां उपकारना. म्हणजे फाल्यां कोणूच व्हाळ वा न्हंय पुरोवन भितर आपलें आस्थापन, उद्देग घालपाक शकना. कायदो ती परवानगी दिना. पूण, तरीय सरकारी यंत्रणेक हाता कडेन धरून आमच्या देशांत अक्षरशा मनाक येता तें साध्य करपी लोक आसात….. आनी जायते फावटी तांकां तें पचताय बी. ‘पैसा फेको तमाशा देखो’, दुसरें कितें? कांय वेळार हें आंगलट येवं शकता. मागीर जीणभर घाम गळोवन जोडिल्लो पयसो कायद्याचे झोतीचेर व्हांवन वचूं शकता.
आमच्या गोंयचें नांव गुन्यावाच्या मळाचेर घाणटाच. अपघातांत आमी नंबर वन आसात. घडये गांजो विकपांतूय आघाडेचेर आसतले. हालींच सीआरझेडाचे (दर्यादेग नियंत्रण विभाग) नेम मोडपांत आमी देशांत पयलो क्रमांक मेळयला. फाटल्या पांच वर्सांत सीआरझेड कायद्याचो भंग करपाच्यो 974 घडणुको गोंयांत घडल्यात. पुराय देशांत 1878 प्रकरणां जाल्यांत, तातूंतलीं हजारभर आमचींच!! फाटोफाट आमचे शेजारी आसात. महाराष्ट्र 556 आनी कर्नाटक 101. खुद्द राज्यमंत्र्यान लोकसभेंत ही म्हायती दिल्या. हीं सरकारी यंत्रणेक खबर आशिल्लीं बेकायदेशीर कामां. कोणाचे नदरेक येवंक नाशिल्लीं वा येवनूय दोळ्यांचेर साय हाडून यंत्रणा ओगी राविल्लींय प्रकरणां आसतलीं. कायदो भाणशिऱ्यांत गुठलावन खुटयाळ्याक हुमकाळवपांत तसो आमचो हात धरपी कोण नासतलो. सीआरझेड बाबतींत राष्ट्रीय पांवड्याचेर गोंयच्या नांवाक खत लागलां, इतलें मात खरें.
दर्यादेग विभाग (सीझेड) म्हणल्यार उदकास्रोत आनी जमीन हांचे मदली जमीन. हातूंत न्हंय, दर्या, दलदल, दर्यावेळो, दर्यादेग, भरती, दर्याचें उदक जंय मेरेन येता, तो सगलो वाठार. देशाची दर्यादेग 7516 किलोमिटर आसा. थंय विकासकामां कशीं करपाचीं तें थारावपाक सीआरझेड अधिसुचोवणेंत विविध दर्यादेग वाठार सांगल्यात. नेम आसात. मात तें पाळप जाताच अशें ना. कॅगाच्या अहवाला प्रमाण, पर्यावरण मंत्रालयान अजून राष्ट्रीय दर्यादेग विभाग वेवस्थापन प्राधिकरणाक हे बाबतींत चड अधिकार दिवंक ना. हें सगलें हाताळपी वांगड्यां सयत कायमची संस्था ही मान्यताय तिका दिवंक ना. कायदो माड्डुवपी लोकांचेर सरकारी यंत्रणा केन्नाय दांडो मारता, पूण हे गेंड्याचे कातीचे लोक शिमरे कशे परत- परत कायदो मोडटात. पर्यटन खात्यान हें गंभीरपणान घेवंक जाय. कारण कांय लोक सीआरझेडाक कोयरा बालदेंत उडयतात. कोण अधिकारी बी हाचे फाटल्यान ना मूं? गोंय हें पर्यटन राज्य जाल्ल्यान दर्यादेगांचेर उदरगत, आनीक उदरगत जावंक जाय, पूण कायद्याक धरून. नाजाल्यार ते कायदे करून उपेग कितें?
हालींच कळंगुट ते कांदोळे मेरेन दर्यावेळे वयल्यो बेकायदेशीर बोरवेल, सोक पीट सील करपाचो आदेश मुंबय उच्च न्यायालयान सरकाराक दिला. ह्या बांयांक सीआरझेड वाठारांत पर्यावरणाक धोको निर्माण जाला, अशें न्यायालय म्हणटा. शॅककारांक नोटिशी धाडपाक आठ दिसांची मुजत दिल्या. बोरवेलींचें प्रकरण 2- 3 वर्सां फाटलें. तांकां लागून सरभोंवतणच्या बांयांतलें उदकूय आटिल्लें. जाय म्हणून कोणूच जमनींतलें उदक बेकायदो उसपूंक शकना. गोंय दर्यादेग विभाग वेवस्थापन प्राधिकरणान इल्लें खरपणान घेवन कोण कायदो मोडटा जाल्यार ताका धरपाक जाय. काय तांकां धरूं नाकात, धरल्यार सोडात, असो वयल्यान आदेश बी येता? पोट भरपाक नोकरी जाय, उदरगत जावंक जाय, सगलें खरें, पूण सैमा कडेन खेळून न्हय. दर्या वेळे वयल्या रेंवेंच्या तेंबांचेर शॅक्स घालपाक दिवप, कांसव येता थंय बोवाळ करप वा ते येवचेच नात म्हूण उपाय घेवप, कांदळी कापप, रेंव उसपुवप… हें माथ्यार आशिर्वाद आसले बगर कोण करीना. सीआरझेड अंतर कमी करपाचेय यत्न जाल्यात. घरां, आस्थापनां बांदलीं काय केन्नाय सरकारी यंत्रणा ती मोडटा. मात चडशे फावट कायदेशीर करता. ताका लागून लोकूय एक ना एक दीस तें कायदेशीर जातलें हे आशेन बेकायदेशीर बांदकामां करतात. हाकाय खंयतरी पूर्णविराम मेळपाक जाय. सीआरझेड नेम मोडपांत आमी पयल्या क्रमांकाचेर आसात, फुडल्या वर्सा ते वळेरेंत आमचें नांव आसचें ना, हे खातीर यत्न करूया. जमतलें आमकां.