सिस्टर ऑफ क्रॉस शावेनोडची माद्री एलिझाबेथ मिरांडा

भांगरभूंय | प्रतिनिधी

कुसूम अग्रवाल – 9860 20 7976

बार्देस तालुक्यांतल्या शिवाले गांवांतल्या हॉली कॉस शाळेन या वर्सा विद्यादानाची १० वर्सा पूर्ण केल्यांत. शिवोले गांवची धूव माद्री एलिझाबेथ मिरांडा, सिस्टर ऑफ क्रॉस शावेनोडची वरिष्ठ माद्री म्हूण नियुक्त जाल्या. गोंयांत आयिल्ले कडेन तांची घेतिल्ली ही मुलाखत.

० सिस्टर गोंयांत परत पावल दवरतना चुका कशें दिसता ? 

– खूब धादोशी, परक्या गांवांत रावतना घराचो, गांवाचो उगडास येवून जीव आकूळ पिकूळ जातालो. सुशेग घेवपाक घरा सारकी दुसरी सुवाल ना.

० अशें म्हणटात माद्रीपण शिकपाक देवाचो उलो येवपाक जाय. तुमकां केन्ना जेजूचो मार्ग आपणावचो सो दिसलो ?

– धर्माबद्दल आशिल्ल्या भावार्थाचें बी आनी बरी देख लहानपणा सावन टाका म्हज्या पालकां कडल्यान, धर्मीक शिक्षण दिवपी माद्री कडल्यान तसेंच इगर्जेन म्हाका प्रेरणा दिली. म्हाका पोटतिडकीन देवाची सेवा करचें अशें दिसतालें. शिंकतनाच न्हय तर जल्माक येत सावन म्हाका देव साद घालता हाचो अणभव येतालो.

० सिस्टर ऑफ क्रॉस मंडळांत वांगडी जावचें अशें तुका कित्याक दिसलें?

– अशें म्हणटात मुल्यां हीं शिकपाचीं आसतात शिकोवपाचीं नासताल, माद्रीची जीण पळोवन तांचें सादेपण तशेंच तांची मानवतेची सेवा पळयिल्ली. ल्हानपणा सावन गरिबां खातीर आनी पिडितां खातीर सेवा करची अशें म्हाका मना सावन दिसतालें. ते शक्य जातलें जर हांव सिस्टर ऑफ क्रॉसच्या धर्मीक मंडळांत रुजू जाल्यार आनी हांव जालेंय बी.

० गोंयांत धर्मीक मंडळाची कशी सुरवात जाली हाचेर मात्सो उजवाड घालशी?

– देवाक समजून घेवन ताचो मोग करात, हे मदर क्लाउडीनाचे शब्द तिचे अनुयायी माद्रीच्या काळजांत खोल रिगले. तांची जीण जेजू क्रिस्ताचे जिणेच्या मोगाचो उत्तम नमुना आशिल्ली. महाराष्ट्रांतल्या अमरावती शारांतले तांचे भरीव काम पळोवन प्रेरीत जावन MSFS पाद्री डेमियन फेर्नांडीसान कांय माद्रीक गोंयच्या बार्देसांतल्या शिवोले गांवांत हाडपाची सोय केली. इंग्रजी माध्यमाच्या शाळेची गरज पळोवन, इंग्रजी माध्यमाची शाळा सुरु करपाक जे. जे आल्मेदा आनी झेनिता आत्मेदा हांणी या बऱ्या कार्याक आपली जमीन दान दिली. व्हिक्टर सांतान फेर्नांडीसान आपले देखरेखे खाला पयले इमारतीचें बांदकाम सुरू केलें, सौ. सांतान फेर्नांडीस, इश्ट परिवार आनी बरें मागप्यांच्या आदारान रांदच्या कुडीचें बांदकाम जालें, 1933 वर्सा जुनाच्या म्हयन्यांत माद्रींचो आश्रम बांदून तयार जालो. पाद्री डेमियनान ह्या शुभ कार्याक सगळे तरेची मजत केली. ताणें आमच्या मंडळाच्या पांच माद्रीक मोटे खोशयेन शिवोले गांवांत येवकार दिलो, त्यो म्हळ्यार मदर जोजफीन बुफेट, माद्री टेक्ला, माद्री इझाबेल, माद्री इलिझाबेथ, सगळ्यो गोंयांतल्या हळदोणे गांवच्यो आनी फ्रेंच माद्री मार्या. थळाव्या वाठारांतली मुखेली म्हूण मदर सेलीन डुमलिनान 1 जून 1933 वर्सा तांकां सांगात दिलो.

प्रत्यक्ष शाळा सुरू जाली 7 जून 1933 वर्सा. ती आशिल्ली “सिस्टर ऑफ क्रॉसच्या मार्गदर्शना खाला सुरू जाल्ली पयली- वयली गोंयांतली इंग्रजी माध्यमाची शाळा. त्या वर्सा 231 भुरगीं हे शाळेंत भरती जाली. विद्यार्थीनींचो व्हड आंकडो आशिल्लोच तेच बराबर शाळेची प्रगती बी तितल्याच जोरांत चलताली. मदर जोजकिनान गरज म्हूण सदचे उपेगा खातीर सदां खातीर माची आशिल्लें प्रशस्त सभाघर बांदलें. ह्या सभाघराचें थळावे लोक, कार्यावळी खातीर उपेग करताले.

आमच्या धर्ममंडळाची 1838 ते 2023 वर्सांतलो इतिहास म्हळ्यार सतत बदलत्या जगांतलो विश्वास आनी प्रार्थनेचो इतिहास, वेळ आयला वैयक्तीकपणान ह्या वर्सांत जीव ओतून काम करपी माद्रींचे उपकार मानपाचो, आमच्या या धर्मीक मंडळान 185 वो वर्सदीस मनयलो, मंडळाचें काम करतना

ज्यो माद्री आमचे पसत स्वर्गवासी जाल्यो आनी आज लेगीत आमचे पसत मागणे करतात तांचो, आमच्या महान पूर्वजांची अध्यात्मीक संचालकांचो, आमच्या बरें मागप्यांचो, आमचे खातीर वावुरपी दरेका घटकाचो आनी आमच्या घराब्यांतल्या व्यक्तींचो जांणी आमकां ह्या किर्तीवंत प्रवासांत पावला पावलाक साथ दिली तांचे आमी मना पासून उपकारी आसात.

० तुमी तुमचो गांव शिवोलेंत वसती घराच्यो मुखेली म्हण रुजू जाल्यो तेन्नाचो तुमचो अणभव कसो आसलो?

वसती घराच्यो मुखेली म्हण म्हजी नेमणूक जाली तेन्ना हांव फकत 21 वर्सांची आशिल्ली. जे शाळेंत हांव शिकलें त्या म्हज्या शिवोले गांवांत परत येतना म्हाका खूब खोशी जाली. म्हज्या हाता सकयल आशिल्ल्या चली भुरग्यांक आवयचो मोग आनी तांकां योग्य सल्लो दिवपाक म्हाका धादोसकाय भोगताली. आज लेगीत म्हाका त्या दिसांचो उगडास आसा जेन्ना हांव निवासी विद्यार्थिनींक घेवन गांवात सैमाचो आनंद घेत चलत वतालीं, अर्थात तेन्ना येरादारी उणीं, बोवाळ उणो आनी प्रदूषण बी उणें आशिल्लें.

० दिल्लीतल्ले तिहार बंदखणींत बंदखण पुरयत म्हूण वावुरतनाचो तुमचो अणभव कितें आशिल्लो?

– बंदखणीच्या कार्यकारी मंडळांत सबंद वेळ हांव कार्यरत आशिल्लीं, पिडीत लोक जांकां समाजा पासून पयस केल्यात, अशा लोकां खातीर तांचे जिणेंत कितें तरी वेगळें आनी बरें करपाची जबर इत्सा म्हज्या काळजांत वाडत आशिल्ली. 2013 वर्सा देवान म्हज्या अंतर्मनाक साद घालो आनी पुराय वर्सा खातीर स्वयंसेवक म्हणून कैद्यांची सेवा करपाचें धाडस दिलें. युपितल्या मेरठ हांगां बायलांचे बंदखणींत आनी सेंट्रल बंदखणींत हांवें चार वर्सां म्हजी सेवा दिल्या. बंदखणीच्या तीन गजालींचेर हांवें भर दिल्लो, तांकां पिडेंतल्यान मुक्त करप, नवीन जीण जगपाक शिकोवप आनी तांचें पुनर्वसन करप. तांणी सोंशिंल्ल्यो दुख्खाच्यो गजाली हांव आयकतालें, तेच बराबर तांकां समुपदेशन बी करतालें. तांच्या खातीर कार्यावळी, सर्ती, सत्रां आनी मदीं मदीं शैक्षणीक वर्ग बी घेतालीं, कैद्यांच्या घराब्यांक वचून मेळप हें म्हाका खूब गरजेचें दिसलें, खास करून तांच्या भुरग्यांक शिक्षण घेवपा खातीर अर्थीक मजत केली. घराब्यांतल्या घटकांक बंदखणींत आपूण जावन येवन कैद्यांक मेळपा खातीर प्रवृत्त केलें. आपलोच घराबो आमकां पयस दवरता हें कैद्यांचें दुख्ख आशिल्लें. आमचे घिराचे शब्द आनी आमचे आशिर्वाद कैद्यांक जगपाक उमेद दिताले.

म्हाका दिसता कैद्यांची सेवा करप म्हणल्यार जेजू किस्ताची सेवा करप. ‘आमी ह्या धरतरेचेर जगतात. ताचो मोबदलो म्हणल्यार आमी केल्ली सेवा’ त्या शर्ली शिशोलीमान म्हणिल्ल्या शब्दांचें हांव ठामपणान समर्थन करतां. कैद्यांचें दुख्ख जाणून घेवपाक जाय जाल्यार तांचे कडेन पळोवपाचो द्रुश्टीकोन वेगळो आसपाक जाय. तांच्या काळजा मेरेन पावपा खातीर तांच्या विशीं मोग, कळवळो जाय. आमच्या कार्यकारी मंडळाक ही सेवा करपाची शक्ती मेळटा प्रार्थनेंतत्यान. देवूच आमच्यांत नाविन्य आनी परिवर्तन घडोवन हाडटा.

० जनेवांत आसतना सुपिरियल जनरल म्हणून काम करतना तुमची जबाबदारी कितें आशिल्ली?

– आमच्या मंडळाच्यो माद्री 16 देशांनी आसात, एकंदरीत कारभार आनी आमचो उत्साह माद्री भयणीक भेट दिवप आनी मेळप हो मुखेल उद्देश. आयकुपाचेर आमी चड लक्ष केंद्रीत करतात जें आयच्या जगांत खूब गरजेचें आसा. वरिश्ठ जनरल जावप म्हणल्यार एका बायलेची जागीर न्हय. आमचें धर्मीक मंडळ आदर्श फुडारपणाचेर चड भर दिला. जय जबाबदा-यो बरे तरेन वांटून दिल्ल्यो आसता, आमचे माद्रीचो अप्रूप असो संघ आसा, जंय समर्पक भावनेन आपली लागणूक वळखून कामाची आखणी केल्ली आसता. ह्यो कार्यावळी बरे तरेन लागू जातल्यो आनी आमच्या मंडळाचें ध्येय पूर्ण जातलें हाचेर आमची मोख आसता.

 ० तुमचे शाळे विशीं तुमचे कितें उत्फर्के आसात?

– अशी सुवात जे सुवातेर म्हजी कुशलताय, बुद्धीमत्ता आनी घिटाय वाडली. अशी सुवात जय देवा विशीं आशिल्लो भावार्थ वाडलो, सोबीत थंड वातावरण जंय अंतरात्म्याक स्पर्श जालो अशें सैमान नटिल्लें देवान दिल्ले देणें पासलम 100 म्हणटा, देवाचे उपकार मानून त्या देवाच्या दरबारांत देवाक दिनवास दिवन भितर सरात. ह्या 90 वर्सांच्या काळांत देवान आमच्या सांगाता प्रवास केला. देखून हांव ताचे उपकार मानतां. म्हज्या विद्यालयांत त्या काळांत भुरग्यांचेर संस्कार करपाक, तांच्या विचारांक आनी शब्दांक मूर्त रूप दिवपाक मार्गदर्शन केलां, माद्रींच्या ह्या कार्या खातीर लोकांनी दिल्लें फाटबळ, काम करपाची तांची निष्ठा, जापसालदारकी, त्याग, कश्ट हे धर्मीक मंडळाचे उदरगतीक कारणीभूत जाल्यांत.

शिवोलची होली क्रॉस शाळा आपल्या सपनाक आकार दिवन तें सपन पूर्ण करपाचो मुखेल दरवंटो आसा. तिचें समाजाच्या बांदणी खातीर खूब व्हड योगदान आसा. हे शाळेचे विद्यार्थी वेगवेगळ्या विशयांचे शिक्षण घेवन जगाच्या कोनशा कोनश्यांत स्थायीक जावन आपापल्या क्षेत्रांत पारंगत आसात. इतलेंच न्टय तर उत्कृष्ठ फुडारी जावन वैयक्तीक तशेंच समाजीक बदल करपाक सतत वावरतात.

हें वर्स तर खास आसा, शिवोलची हाॅली क्रॉस शाळा 90 वर्सांत पदार्पण करता. आज आमी अशा युगाचे साक्षीदार जे मंडळाच्या इतिहासांत अजरंवर जावन उरतले. आमच्या मंडळाची जतनाय जातली. फुडले पिळगेतले क्रॉसीयन विद्यार्थी आनी समाज तांचो उगडास दवरतलो.

निमाणे कडेन म्हाका म्हणनशें दिसता. शैक्षणीक समितीच्या पालवान होली क्रॉस शाळेच्यो माद्री, एकवट राखून दवरपाक जबाबदार नागरीक घडोवपाचे प्रयत्न करपाक वचनबद्ध आसात. हे नागरीक समाजाचे सक्रीय घटक जावन मनशाचें आनी सैमाचें पावित्र्य राखून समाजीक बदल घडोवन हाडटले हातून मात्तूय दुबाव ना.