भांगरभूंय | प्रतिनिधी
विधानसभेंत सिवरेजीच्या घाणयाऱ्या उदकाचो प्रस्न काल गाजलो. कोयराची समस्या फाटल्या कांय वर्सांनी सगल्यांकूच सतावंक लागल्या. तेच तरेन आनीक कांय वर्सांनी सिवरेजीचो प्रस्न तकली वयर काडटलोच. कारण शारांनी, उपनगरांनी आतां दरेका घराक, इमारतीक सिवरेज कनेक्शन सक्तीन घेवचेंच पडटा. नाजाल्यार ती घाण रस्त्यार व्हांवपाक लागता. आतां कांय शारांनी सिवरेजीच्या कनेक्शनांकूच गळटी लागिल्ल्यान ती घाण सगल्याक व्हांवपाक लागल्या. हातूंत संडास, न्हाल्लें, कपडे उमळिल्लें, आयदनां घाशिल्लें… सगले तरेचें उदक मिस्तुरात आसता. पालिका ते खातीर पयशे घेता. तरीय कांय कारणांक लागून तें घाणयारें उदक रस्त्यार येता, लोकवस्तेंत पावता, शेतांनी देंवता. फक्त प्रदुशण जायना तर भलायकी इबाडपाची भिरांत आसता. देखून सगल्यांनी हाचेर गंभीरपणान विचार करपाक जाय. शिरवडेंच्या घाणयारें उदक प्रक्रिया प्रकल्पाची तांक 20 एमएलडी मेरेन वाडयतकच हो प्रस्न सुटावो जातलो, अशें आस्वासन सरकारान दिलां.
शिरवड्यांचो सिवरेज प्रक्रिया प्रकल्प 7.5 एमएलडी तांकीचो. तो सुरू करून 35 वर्सां जायत आयलीं. साहजिकूच घाणयाऱ्या उदकाची लायन पोरणीं जाल्या. सात वर्सां पयलीं आनीक दोन प्रकल्प सुरू केल्ले. तरीय लोकसंख्या वाडिल्ल्यान आतां तांची तांक वाडोवपा बगर पर्याय ना. तातूंत पावसाचें उदक चेंबरांनी वता आनी घाणयारें उदक तातूंत मिस्तुराद जावन व्हांवपाक लागता. पावसाची दडक पडून गेली काय थोड्या वेळान घाणी, गुठ्ठाणीं येतात. जांणी हें भोगलां तांकां नव्यान कितें सांगपाची गरज ना. नवे सिवरेज लायनी खातीर काम चलता. मात संपादीत केल्ल्या जाग्यांचेर अतिक्रमणां जाल्यांत. तीं काडले बगर अर्थांत कामाक सुरवात करपाक मेळची ना. मडगांव, फातोड्डें वाठारांत दोन नवे प्रकल्प येतले. तांची तांक 26.7 एमएलडी आसा. पूण घाणयारें उदक 41 एमएलडी परस चड आशिल्ल्यान शिरवड्यां प्रकल्पाची तांक 20 एमएलडी मेरेन व्हरचीच पडटली. हें काम बेगीन पुराय जावंक फावो.
शेतांनी, न्हंयांनी सिवरेजीचें, गटारांचें उदक वता, रसायनांय रकतात, ताचेरूय उपाय काडप गरजेचें. फाटीं साळ न्हंयेंत कांय जाणां कडल्यान रसायनीक उदक, सिवरेजीचें उदक मात्तूय प्रक्रिया करिनासतना तशेंच न्हंयेंत सोडपाचो प्रकार उक्तडार आयिल्लो. कोण घाण उदक सोडटा तें कांय जापसालदार लोकांक तरी खबर आसतातूच. पूण ते ओगी राविल्ल्यान निमाणी कोणाचेरूच कारवाय जायना आनी हो गैरप्रकार तसोच चालू उरता. हाचो परिणाम न्हंयेंतल्या नुस्त्यांक, हेर जिवांक, वनस्पतींक भोगचो पडटा. ताचो परिणाम पर्यावरणाचेर जाता, हें आमकां कळना. थोडे टँकरांनी भरून सिवरेज वा हेर घाणयारें उदक हाडून रातचें शेतांनी वा पडंग जाग्यांचेर सोडटात. हातूंत उदका पुरवण करपीय टँकर आसतात, ही तिडक हाडपी गजाल. फाटीं तसले व्हिडियो व्हायरल जाल्ले. टँकरधनयांचेर कितें कारवाय जाली, तें मात कळूंक ना.
ज्या शारांत सिवरेज लायनी आसात, तांचो दर्जो कितें, खंय गळटी आसा काय ना, हाची तपासणी जावप गरजेचें. सिवरेज प्रक्रिया प्रकल्पांचेरूय नदर जाय. गरज थंय तांची तांक वाडोवपाक जाय. तोय फुडल्या 30 वर्सांचो विचार करून. जे कोण लागसारच्या न्हंयांनी, खारजांनी, व्हाळांनी संडासाची घाण वा हेर घाणयारें उदक सोडटात, तांचेर कडक कारवाय जावंक जाय. सांतिनेज खारीज वाठारांत कांय घरांचेर कारवायेची घोशणा जाल्ली. ती घोशणाच थारची ना, हाची खबरदारी घेवची. कारण असल्या निर्णयाक लागून प्रदुशणाचेर नियंत्रण येतलें, हें आमी विसरूंक फावना. हे सिवरेजीचे समस्ये सारकीच आनीक एक समस्या म्हणल्यार मार्केटांतली घाण. फातोड्डेंच्या चिकन, नुस्तें दुकानां, हाॅटेलांक प्रदुशण नियंत्रण मंडळान नोटिसी धाडल्यात. हेर पालिका, पंचायत वाठारांतल्या दुकानां, हाॅटेलांचोय मंडळान नियाळ घेवचो. कारण चिकन, मटणाचे उरिल्ले, भायर उडयिल्ले कुडके खावपाक बिबटे पसून येतात, असो फाटीं आरोप जाल्लो. मध्यानरातीं हें शक्य आसा. तातूंत बाजार गांवांत आडवाटेक आसल्यार हें न्हयकारपाक येना. थंय सुणीं येतात, तांकां खावपाक बिबटे येवप कठीण न्हय. तेन्ना ह्या दुकानदारांनी जें कितें उरता, ताचो योग्य पद्दतीन विलो लागतलो, हाची जतनाय घेवप गरजेचें.
सिवरेजी सयत हेर घाणयारें उदक, गटारांतली घाण, उश्टें, चिकन, मटणाचे कुडके दुर्गंध निर्माण करतात, प्रदुशण करून सैम इबाडटात आनी सगल्यांत म्हत्वाचें म्हणल्यार मनश्यांचे भलायकेची वाट लायतात. तेन्ना ह्या समस्यांचो कोणाकूच त्रास जावचो न्हय, हे तरेन उपाय बेगीन घेवचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
