भांगरभूंय | प्रतिनिधी
पणजी, प्रतिनिधीः सिपला कंपनी कामगारांक पिडटा. हाचो निशेध करपा खातीर कामगारांनी संघटना तयार केल्ली. पूण जे कामगार हे संघटनेत वांटेकार जातात तांकां कंपनी धमकावपाचो यत्न करता. देखून सिपलाच्या उंचेल्या वेवस्थापनान हातूंत लक्ष घालचें, अशी मागणी सिपलाच्या कामगारांनी केल्या.
सिपला फार्मास्युटेकल कंपनीत कामगारांचो छळ जाता असो गंभीर आरोप करून सुमार 45 कामगारांनी आझाद मैदानाचेर निदर्शनां केलीं. ह्या वेळार सिपलाचे कामगार विठ्ठल नायक हांणी उलयतना सांगलें, चड वरां आनी सप्तकी सुटये दिसा कंपनी काम करपाक लायता आनी त्या जाग्यार ओव्हर टायम तशेंच काॅम्पेंसेटरी ऑफ दिना, हे भशेनची पिडणूक सिपला कंपनींत बरोच तेंप चलत आयल्या.
हे पिडणुके आड लढो दिवपा खातीर सगळ्या कामगारांनी एकजुट जावन कामगार संघटना काडपाचें थारायलें. पूण कंपनीन हे संघटनेक कशीच मान्यताय दिवंक ना आनी ही संघटना जावची न्हय म्हूण खुब आडमेळी हाडल्यो. 300 कामगारांची एक संघटना तयार जाली, पूण ती तोडपा खातीर कंपनीन दावपेच आंखले, असो आरोप नायक हांणी केलो.
जे कोण हे संघटनेंत वांटेकार जातात तांच्यो सुटयो रद्द जाता, तांचो पगार कापतात, फटींच्या भानगडींनी घुस्पावन तांकां काडून उडयतात वा तांकां दुसऱ्या राज्यांत बदली करतात. हाका सरकारय तितलोच जापसालदार आसा. सरकारान फार्मा कंपनीच्या कामागारांचेर एस्मा लायल्ले कारणान कंपनी ताचो फायदो घेता, असोय आरोप नायक हांणी केलो.
आमी कंपनीच्या उंचेल्या वेवस्थापनाक विनवणी करतात की तांकां जर तांच्या कामगारांच्या जिवाचें पडलां जाल्यार तांणी रस्त्यार आयिल्ले कामगार आनी तांचे फामिली बरोबर चर्चा करून तांच्यो मागण्यो पुराय करच्यो. म्हणटकच जिवाक सुशेग दिवपी कामाचें वातावरण आमकां फावो जातलें, अशी मागणी नायक हांणी केली.
संघटनेंत वांटेकार जाल्ले तेन्ना म्हाका दोन दीस भायर बसून दवरलें. कसलेंच काम दिवंक ना. दोन दिसा उपरांत म्हाका एचआरान सांगलें की जर संघटनेंतल्यान भायर आयलें ना जाल्यार तुका कामा वेल्यान काडून उडयतले. गेटी भायर तुका उबे करचे नात. तुका पुलिशेंत धाडटले आनी न्यायालयात तुका व्हाणो झरोवच्यो पडटल्यो अशी धमकी दिली, असो सामको गंभीर आरोप बायल कामगार हेमा जास्वी हांणी केलो.
आमी सगळे आमच्या निर्णयाचेर ठाम रावले. पूण शेवटाक कंपनीन नमते घेवन म्हाका परत कामांत आस्पावन घेतले, अशे जास्वी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
