सिनेमोगी हेच इफ्फीचें बळगें

भांगरभूंय | प्रतिनिधी

अरूणाचल प्रदेश, आसाम, चेन्नय, कर्नाटकाचे विद्यार्थी, तंत्रज्ञ, विद्यार्थी इफ्फी वेवस्थापन, निवेदना पसून फाटीं कित्याक रावतले? तांकां आडावंक येता? इफ्फी भारताचो, तांचो आनी आमचोय.

भारताच्या आंतरराश्ट्रीय फिल्म महोत्सवा खातीर (इफ्फी) फुडारांत पणजेंत नॅशनल थिएटर आसा ती घराची दुसरी सुवात जावं येता. घर ल्हानशें आसचें, एका दोन फ्लॅटावरीं, चार ते आठ कुडी, एक रांदची कूड, हेर सुविधा. इफ्फी भारताचो, केंद्रीय म्हायती आनी प्रसारण मंत्रालय हो फिल्मोत्सव घडोवन हाडटा. फिल्ममोग्यांच्या ह्या उत्सवाक आरंभ जाल्लो स्वातंत्र्या उपरांत, आदले प्रधानमंत्री पं. जवाहरलाल नेहरूंच्या तेंपार. फिल्मां भारतांत ब्रिटीशांनी हाडिल्लीं, भारतीय रेल्वेय बिटीशांचीच. अंदूं इफ्फी वेळार गोंयच्या उच्च माध्यमिक विद्यार्थ्यांक तो इतिहास वाचपाक, आयकुपाक, पळोवपाक मेळ्ळो. कला अकादमीच्या दर्यासंगमार खासा एसी माटवांत. चारुय वाटेनी आशिल्ले सिनेमाच्यो काणयो सांगपी टीव्ही, पोस्टरां. अचूक उतरांचे तक्टे माटवांतल्या प्रदर्शनाचें खाशेलपण. विद्यार्थी, शिक्षकांनी हांसत खेळत प्रदर्शनाचो लाव घेतलो, पॉपकॉर्न खायत. विद्यार्थ्यांच्या फाटीर सानुली बॅग, बॅगेंत उदकाची बाटली, पुस्तकां – वह्यो, हातांत मोबायल. वतना आशिल्लीं दोळ्यांत फुडारांत आलिया भट, रणबीर कपूर जावपाची सपनां. आयनाॅक्स मल्टीप्लेक्सांतय वेंचिक गोंयकार आसाम ते कन्याकुमारी मेरेनचे विद्यार्थी, तरणाटेय तेंच सपन पळयताले. सिनेमाच्या विश्वांत, वेवस्थापनांत शेणिल्ले.
इफ्फींतलो सिनेमा नेमान गोंयांत येवन पळोवप्यांक पांच दिसांनी वाज आयिल्लो, पूण गोंयच्यान भायर सरपाक मन तयार नाशिल्लें. तेच तर खरेले सिनेमोगी. इफ्फीचो पड्डो वयर सरकता तेन्ना सावन इनामां कोणाक मेळटात तांकां ताळ्यांनी येवकार दिवपाक. इफ्फींतलो ओपनिंग (सुरवेचो) आनी क्लोजिंग (निमणो) सिनेमा पळयले बगर तांचीं मनां घरा वचपाक हयकार कशीं दितलीं?
कितल्या सिनेमाच्यो घोशणा जाल्यो इफ्फी आदीं आनी इफ्फी वेळार? मासूम 2, एतराज 2 सिक्वल्स, अजरंवर गीतां आपल्या फाटल्यान दायज म्हणून सोडपी गीतकार महमद रफी हांचें बायोपीक, राज कपूर हांच्या सिनेमांचे रीमेक. वांगडा धा बारा ल्हान. तातूंत सतरा लाख नासले तरी सात गोंयकार आसतले फुडल्या पांच वर्सांत. जैतवंत आदित्य निर्मणेक लागला. आदले मुख्यमंत्री मनोहर पर्रीकार, मडगांव रवींद्र भवनाचे अध्यक्ष राजेंद्र तालक हांच्या सपनांतलें तेंच कलांगण. कलामोग्यांचें, कलेची आवड आशिल्ल्याचें, कलाकारांचें, तंत्रगिन्यान्यांचे, प्रसार माध्यम शिक्षण घेवप्याचें. सोशल मीडीया, पापाराझींचें न्ही. पापाराझी हें इफ्फींतलें एक सानुलें फिल्म. तें कला मळा वेल्यान गोंयच्या माध्यमां मेरेन पाविल्ल्या व्हिडिओग्राफर, फोटोग्राफरांनी पळयल्यार दोन वरांचो सिनेमा इफ्फी खातीर जातलो. इफ्फीच्या 21 वर्सांतल्या फोटे, व्हिडिओनी.
‘पापाराझी’ ह्या फिल्माची काणी पळेल्यार फोटोग्राफर, व्हिडिओग्राफराच्या नव्या संवसाराची वळख जातली. सर एक फोटो, शॉट प्लिज म्हणत हिरो, हिरोईनी, दिग्दर्शक, निर्मात्यां कडल्यान लाखांनी रुपया मेळोवपी, तांच्या यो वचपाची वाट आडावपी पी फाॅर पापाराझी. सिने कलाकारांचे फोटे, व्हिडिओ घेवन जाल्लें फिल्म, फोटोग्राफर, व्हिडिओग्राफरांचेर. वेवसायांत आसतना तांच्याच एका भावाची भलायकी इबाडटा, किद्याक? काणी एकल्याची पूण माध्यमांतल्या सगल्या पापाराझींची.
55 व्या इफ्फींतले बरेच सिनेमा तोखणायेचे, वेंचून सारके काडिल्ले पुणे, मुंबयच्या म्हज्या पत्रकार इश्टांनी सांगलें. सगल्या सिनेमाच्यो तिकेटी म्हाका मेळ्ळ्यो ना पूण पळयिल्ल्या वेंचिक सिनेमांनी म्हाकाय शिकूंक मेळ्ळें. सिनेमा पळोवपाची दर एकल्याची नदर वेगळी, म्हजे नदरेन भारतीय सिनेमा आजय समाजशिक्षणाचें माध्यम जावन आसा. मिसेस, श्रीकांत, एक कप च्या, खारवन, अनसिंकेबल, करुआरा, पिपल ऑफ द रिव्हर, सावट, महावतार नृसिंहा, वेंक्या, 35 छिन्ना ह्या सिनेमांनी म्हाकाय शिकयलें. राश्ट्रभाषा हिन्दी भारतांत सगले कडेन शिक्षणांत आसली तरी दक्षीणेंतले मायभास मोगी. इंग्लिश सब टायटलांनी कन्नड, तेलगू सिनेमाचोय अर्थ कळटा. हिन्दी सिनेमाचें शुटिंग कर्नाटक, उत्तराखंडात, विदेसांत जाता, गोंय आसाच. इफ्फींतलो सिनेमा शुटिंगथळां, इंग्लीश सब टायटलांनी वैश्वीक जाता.
इफ्फी तेंपा प्रमाण कुरपणे घालता, बदलता, बदलला हें फाटल्या कांय वर्सांनी दिसतालें. अंदू बदल चड दिसले, देसांतल्या प्रसारमाध्यम शिक्षणातल्या विद्यार्थ्यांचो इफ्फी वेवस्थापनात आसपाव जाल्ल्यान, शिक्षकय आयिल्ले. गोंय सरकारान प्रसारमाध्यम शिक्षण धावे, बारावे उपरांत शिस्तीन हाडपाक जाय, अणभवा परस शिकिल्ल्यांक विश्वासांत घेवन. निर्माते सुभाष घई हांची ‘विसलिंग वुडस’ शिक्षण संस्था गोंयांत येवपाक सोदताली, बोवाळ जालो, शिक्षण पयसावलें. लुकसाण कोणाचें? घईंचें न्ही गोंयकांरांचे, मुंबय तांची सिने शिक्षण संस्था आसा, पुण्यांत एफटीआयआय. दोनय संस्थांचें विद्यार्थी इफ्फीक आयिल्ले, वेवस्थापनातय आशिल्ले, नमळायेन जिखले. अरूणाचल प्रदेश, आसाम, चेन्नय, कर्नाटकाचे विद्यार्थी, तंत्रज्ञ, विद्यार्थी इफ्फी वेवस्थापन, निवेदना पसून फाटीं कित्याक रावतले? तांकां आडावंक येता? इफ्फी भारताचो, तांचो आनी आमचोय.
कोण आयले ना, कोण ना अशें म्हण्टल्यांक इफ्फीच्या सगल्या माचयांक भेट दिवंक मेळ्ळी? मास्टरक्लास व्हड जातात, इफ्फींत शिक्षणय खूब येता. थोड्यांच्या कागाळींनी फिल्म मार्गदर्शिका कागदार येता पेपरलेस जातना. तंत्रगिन्यान, ओटीटीबद्दल कागाळी आयल्यो तरी बदल थांबचेना तींच इफ्फीचीं नवीं ल्हारां, इफ्फी घराचो जावपाचीं चिन्नां, फुकट न्हय नोंदणी करुन. पोटभर सिनेमा, थेटरां लागींच खावप, जेवप, राबितो सिनेमोग्यांक भावता. बाजार, दुकानां, हॉटेलांचें अर्थकारण, कलाकारांक माची, पैसो, शिक्षण आनी अणभव. त्या अर्थकारणाक सिनेमोग्यांचो तेंको, त्या तेंक्यार इफ्फी तिगला. विदेशी सिनेमा अंदू उणो, संवसारीक वेंचणुको, झुजाचीं आडमेळीं. त्या आडमेळ्यांतल्यान भायर सरत 55 वो इफ्फी वेगळे दिकेन गेलो. संगीतकार ए आर रेहमान गोंयच्या कोंकणी संगीत, लोकसंगीताक पालव दिवपाक फुडें आयल्यात. गोंयचे मातयेंत कला आसा, गोंयकार तांचे कडेन शिक्षण घेतात. शिक्षण अकादमी खातीर तांणी जागो केन्नाच घेतला. ते येतलेच देसांतल्या कलाकार, तंत्रज्ञ, गायकां वांगडा गोंयकारय आपले मायभुंयेंत परत येतले. परतून एकदां गोंय दुसरे अभिषेकीबुवा, गानकोकिळा, गानसम्राज्ञी, निर्माते, दिग्दर्शक दिवपाचे वाटेन चलता. जाय बरे मार्गदर्शी, इफ्फींतल्यान तेय मेळचे. तेंच गोंयकारपण, गोंयच्या पर्यटनाची खाण.
गोंय मनरिजवण सोसायटी गोंयचे मनरिजवणेचें, साहित्याचें, कलेचें केंद्र जातलें जाल्यार ताका वेवसायीक रूप दिवपाक जाय. आमदार दिगंबर कामत, राजेंद्र तालक, कला आनी संस्कृतीमंत्री गोविंद गावडे, सभापती रमेश तवडकार, ज्ञानपीठकार दामोदर मावजो, पयलींचे सभापती तोमाझिन कार्दोज, प्रिन्स जेकब, शौनक अभिषेकी, महेश काळे, हेमा सरदेसाय, वर्षा उसगांवकार, रेमो फर्नांडिस, शर्मद रायतुरकार, प्रविण झांट्ये हांच्या बळग्यान मनरिजवण सोसायटी जाग्यार घालची पडटली. मल्टीप्लेक्सांत सिनेमा बराबरीन टॉयलेटस, उदक, खावपाकय आसा. सरकाराक लाव कितलो? पणजे, मडगांव, पर्वरे, फोंड्यांतलो एक मल्टीप्लेक्स माध्यम शिक्षणाक मेळत?
प्रसारमाध्यमां, समाजमाध्यमां जागृतायेची, समाज सुदारपाचीं केंद्रां जावपा पासत कायदे बदलप गरजेचें. ब्रिटीश, पुर्तुगीजांचो विसर नाका. माथ्यार बसोवप? सिनेमातल्यान?

सुहासिनी प्रभुगांवकार
9881099260