भांगरभूंय | प्रतिनिधी
सिनेमाचें सगळ्यांक पिशें! गोंयकारुय ताका आडवाद ना. पयलीं रेडियो आनी सिनेमा हीं दोनच मनरिजवणेचीं सादनां आसलीं. आतां तीं जीव घेवपी ‘ब्लू व्हेल’ मेरेन पावल्यांत. आसूं! तर तेन्ना गोंयांत साप्प थोडीं थेटरां आसलीं. (हांव 1970 दसकांतली गजाल सांगतां, आतां पायलेक पंचवीस ‘मल्टीप्लेक्सां’ जाल्यांत). तातूंत सिनेमा लागताले तेवूय बी मुंबय प्रदर्शित जातगीर दोन तीन म्हयन्यानीं. ‘फ़्लोप’ सि नेमा मात गोयांत बेगीन येताले, पूण ‘शोले’ सारको ‘हीट’ सिनेमां गोंयात येवपाक स- स म्हयने वाट पळोवंची पडटाली.
हाचेर गोंयच्या सिनेमा शौकीनांनी उपाय काडिल्लो तो म्हळ्यार मुंबय नाजाल्यार बेळगांवां वचून सिनेमा पळोवप. मुंबय वचून सिनेमा पळोवप खूब खर्चीक आसलें. त्यामानान बेळगांव सगळ्या नदरेन सोंपें आनी फायदेशीर. शेनवारा रातची ट्रेन धरली, तो आयतारा सकाळीं फ़ुडें बेळगावां पावलो. आयतारा दोन तीन नवे सिनेमा पळयले आनी रातच्या ट्रेनीन बसून सकाळीफ़ुडें गोंयांत हजर! ट्रेनींत न्हीद काडली म्हण्टगीर सोमतेंच कामाक वचूंक मेळटालें. हे जे सिनेमा पळोवपाक बेळगावां वताले तांणी आपलो थोडोतरी खर्च सोडोवंक कांय जोड-धंदेय चालू केल्ले. बेळगांवच्यान कोणाकय जाय जाल्यार मोटार सायकलीचे पार्ट हाडप, व्होंवळीक पत्रिका छापून हाडप, कपडे शिंवून हाडप. तांदूळ, भाज्ज्यो, कुंदा मिठाय असल्यो खावपाच्योय वस्ती सांगल्यार ते हाडटाले. गोंयच्यान ते बेळगांवां कितें व्हरताले तें आनीक वाचप्यांक सांगूक नाका. मागीर गोंया येतगीर ते जीं सिनेमांचीं वर्णनां करताले ताचे खातीर आमची सिनेमा पळोवपाची उमळशिक वाडताली. पिच्चरांत अशी मारामारी आसा, घे हीं गितां अशीं, हो ज्योक असो, पिच्चर स्टोरीकल आसा अशीं हीं वर्णनां.
सिनेमा जरी गोंयांत उसरां येताले तरी त्या सिनेमांतल्यो फ़ॅशनी मात गोंयांत पयलीं येताल्यो. देव आनंद, जितेंद्र हांची तीं तायट आनी मागीर बॅलबॉटम कलसावां, कॉलेजींत वचपी चलयांमदीं, टायट सलवार कमीज, मॅक्सी, मिडी, मीनी स्कर्टस ह्यो फ़ॅशनी रोखड्योच फामाद जाल्ल्यो. मॅचिंग, रंग, पॅण्टांचो बेल्ट, मफलर ह्या विशय़ांचेर आपुणूच हिरो वा हिरोईन जाल्लेवरी चर्चा जाताली आनी जण एकलो तीं फित्रिकां हाडून घालताले.
म्हाका याद जाता कीं आमच्याच वाड्यावेलो मोटारसायकलीचें भाडें मारपी पिटर, देव आनंदाचो सामको सामको पिसो चाहतो! तेन्ना सिने मेट्रोपोलांत देव आनंदाचो ‘ज्युवेल थीफ़’ नांवाचो सिनेमा लागिल्लो. पिटरान पयलींच देव आनंद त्या सिनेमांत घालता तें चेंपें मुजरत मुंबयच्यान मागयिल्लें. तें चेपें घालून मोटारसायकलीचेर बसून पिटर ‘फ़र्स्ट डे फ़र्स्ट शो क’ आयिल्लो. तेन्ना मेट्रोपोला कडेन जमिल्ल्या सगळ्यानीं ‘देव आनंद आयलो, देव आनंद आयलो’ म्हण ताका येवकार दिल्लो, ताका फुलयिल्लो. पिटरय देव आनंदाचे स्टायलीन मान वांकडी करुन तांचो येवकार स्विकारतालो. तो खीण म्हाका आजून याद आसा.
मागीर आयलो राजेश खन्नाचो ‘गुरू शर्ट’. ताच्या ‘हाथी मेरे साथी’ सिनेमान ल्हान भुरगीं ते म्हाताऱ्यां कोंताऱ्यामेरेन सगळ्यांक पिशें लायिल्लें. त्या सिनेमांत ताणें घाल्लो ‘गुरू शर्ट’ गोंयकार तरणाटयांमदीं रोखडोच फामाद जालो. खरें म्हळ्यार राजेश खन्नान आपलें सुटिल्लें पोट लिपोवपा खातीर घाल्लो ‘गुरू शर्ट’ एकदम ‘फ़ॅशन स्टेटमेंट’ जाल्लो ही भितरली शोकांतिका.
मागीर आयलो सिनेमांतलो ‘सफारीसुट’. हो ‘सफारीसुट’ गोंयकरांमदीं इतलो फामाद जालो कीं लग्नसुवाळ्याक वतनांच न्हय तर ऑफ़िसांत लेगीत वतनां घालपाचो तो ‘ड्रेसकोड’ जावन पडलो. कांय कोंकणी लेखकूय सफारीमॅन जावनूच भोंवंक लागले.
पूण खरे अर्थान गोंयांत गाजले ते तीन सिनेमा! एक ‘बॉबी’, दुसरो ‘एक दुजे के लिये’ आनी तिसरो ‘हम आपके है कौन?’. ह्या तिनूय सिनेमांनी गोंयांत मनरिजवणेच्या मळार क्रांती केली म्हळ्यार अतिताय जावंची नां. ‘हम आपके हैं कौन?’ ह्या सिनेमान तर गोंयच्या पारंपारिक लग्न सुवाळ्याचें रुपच बदललें. मेंहदी, संगीत, नवरदेवाचे बुट लिपोवप आनी ताचे कडेन मागीर पांच- धा हजार मागप असल्यो गजाली ज्यो आमच्या गोंयच्या लग्नसुवाळ्यांत केन्नाच नासल्यो त्यो ह्या सिनेमान रिगयल्यो. हें बुट लिपोवप प्रकरण इतल्या थरार पावलें कीं नवरदेव मागीर कांचवेवन पांयात कांयच घालीनासतनां सव्यार बसपाक लागलो. आयज गोंयांत जे लग्न सुवाळे चार -पांच दीस गडगंज पांवड्यार चलतात ताचें मुळावण ह्याच सिनेमान घालें.
‘बॉबी’ सिनेमा तर गोंयांत खूप गाजलो. ‘टिन अॅज लव्ह’ खरे अर्थान ह्याच सिनेमान चालू केलें. रिशी कपूर आनी डिंपल कपाडीयाची ती ‘फ़्रेश’ जोडी लोकांक खूप भावली. तातूंतलें लक्ष्मीकांत प्यारेलाल हांचें संगीत आनी चड करुन तें ‘हांव सायबा पलतडीं वयतां’ ह्या गोंयच्या पारंपारीक देखणेच्या चालीर आदारिल्लें ‘झुठ बोले कौआ काटे’ हें गीत आनी हेर गितां गोंयांत रोखडींच फामाद जालीं.
पूण ‘बॉबीऽ’ सिनेमा फामाद जालो तांतल्या फ़ॅशनी खातीर!. तेन्ना गोंय सगळें ‘बॉबी’ मय जाल्लें. कपडे, रिबीनां, क्लिपां, हेअर बेंड, कांकणां, राखी, गोगल, हीं सगळीं ‘बॉबी’ नांवांन खपपाक लागलीं. ‘राजदूत’ मोटारसायकल कंपनीन एक मिनी मोटारसायकल बाजारांत हाडिल्ली आनी ती पयल्याच फावटीं ह्या ‘बॉबी’ सिनेमांत वापरिल्ली. ह्या स्कुटरीकय ‘बॉबी’ मोटारसायकल हें नांव पडलें. पैशेकारांले भुरगे ह्या ‘बॉबी’ मोटारसायकलींचे फाटल्यान चलयांक बसोवन कॉलेजींत येंवक लागले.
पूण खरी लक्तुबाय आमच्या नुस्तेंकान्नींची! तेन्ना बाजारांत बरे ताज्जे फ़डफ़डीत बांगडे वा ताल्ले आयल्यार गिरायकाक आकर्शित करपाक ‘बॉबी बांगडे’, ‘बॉबी ताल्ले’ अशें बाजारांत तीं आड्डतालीं. हाचेर तेंगशी गांठपी एक प्रसंग तुमकां सांगतां. तेन्ना मडगांवचो नुस्त्या बाजार काम्राकडेन आशिल्लो. तो जागो सामको ल्हान आनी सदांच नुस्तेंकान्नींचीं जाग्याखातीर झगडीं. एकदीस हांव नुस्तें हाडपाक गेल्लो. पळयल्यार दोन नुस्तेंकान्नीं जाग्यावेल्यान झगडटात. तांचे म्हऱ्यांत खूप लोक जमल्यात. दोगांयनी कोंकणींतल्यो आशिल्ल्यो नाशिल्ल्यो सगळ्यो ‘च्यान’ सोंपपी गाळी एकाकामेकांक संवल्यो. मागीर एक नुस्तेंकान्न दुसरे नुस्तेकान्नीक म्हणूं लागली “सामकी बॉबी खंयचेकडली!”
अशे आमी गोंयकार आनी आमचें एका तेंपावेलें हें सिनेमाचें पिशें!
सखाराम शेणवी बोरकार
9923306751
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
