भांगरभूंय | प्रतिनिधी
पणजीः सिनेमांतल्यान प्रेक्षकांक आनी समाजाक संदेश दिवपाक जाय. हांवें म्हज्या पयल्या सिनेमांत हो यत्न केलां. पूण अशी सक्ती सदांच आसूंक फावना. चित्रपट शुध्द मनरिजवणे खातीरूय आसूं येता अशें प्रतिपादन ए युजफुल घोष्टचे दिग्दर्शक राचापुम बुनबुंचोक हांणी केलें. इफ्फींत जाल्ले पत्रकार परिशदेंत ते उलयताले. ह्या वेळार सिनेमांतले हेर कलाकार आनी तंत्रज्ञ हाजीर आशिल्ले. शुक्रारा ए युजफुल घोष्टान इफ्फींची सांगता जाली.
सिनेमांन कितें तरी विधान करचें. ए युजफुल घोष्ट ची कल्पना 2017 वर्सा आयली. पूण हो सिनेमा प्रदर्शीत करपाक 8 वर्सां लागलीं. हो चित्रपट थायलंडांत घडिल्ली एक कथा आसा. थंय धुल्ल प्रदुशण खूब आसा. हाचेर आदारून हांवें एक विनोदी चित्रपट तयार केला. सिनेमांतल्या मुखेल पात्राची घरकान्न धुल्ल प्रदुशणाक लागून मरता. पूण कांय दिसांनी तिचें भूत घरांतल्या व्हॅक्यूम क्लीनरांत भितर सरता अशें राचापुम हांणी सांगलें.
ह्या सिनेमांत मुखेल पात्र आनी व्हॅक्यूम क्लीनर हांचे मदलो मोग दाखयला. थायलंडांतलो चित्रपट उद्देग चड व्हडलो ना. हांगा चडशे हॉरर चित्रपट तयार जातात. हांगाचें धुल्ल प्रदुशण आनी हॉरर चित्रपटांची आवड मतींत घेवन आमी ए युजफुल घोष्ट तयार केलां. संवसारभरांतल्या वेगवेगळ्या महोत्सवांनी ह्या चित्रपटाक बरो प्रतिसाद मेळ्ळा. फ्रांसांतल्या कांस फिल्म फेस्टिवलांतय ह्या सिनेमाक पुरस्कार फावो जाला अशें राचापुम बुनबुंचोक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
