भांगरभूंय | प्रतिनिधी
अशा हिंदी, मराठी आनी गुजराती 700 वयर चित्रपटांनी तिणें काम केलें. 70 वर्सां परस चड काळाच्या सगळ्यांत लांब अभिनय कारकिर्दीचो ललिता पवार हांचो संवसारीक गिनीज विक्रम आसा.
कलाकार
ललिता पवार हें फिल्म जगांतलें नांव आयकतकूच याद येता ती पड्ड्या वयली क्रूर सासण (सासूमांय). फिल्म इंडस्ट्रीत स्वता खातीर एक खाशेली सुवातीची निर्मणी करपी म्हणल्यार ललिता पवार. तिची आवय अनसुया गुरवार आसतना एकदां देवळांत गेल्ली. थंय पावतकच तिका पोटांत खर दुखप लागलें आनी देवळा भायरूच ललिता पवार 18 एप्रिल 1916 दिसा जल्माक आयली. ताका लागून आवय- बापायन तिका अंबिका अशें नांव दिलें. फुडें निर्मातो गणपतराव हांचे कडेन लग्न करतकूच तिचें नांव ललिता पवार जालें. नाशिकांत येवल्यांत ललिता पवाराचो बापूय लक्ष्मणराव शगुन हो रेशम आनी कापसाचो गिरेस्त कंत्राटदार आशिल्लो. त्या काळांत चलयांच्या शिक्षणाक समाजाची मान्यताय मेळनाशिल्ली. देखून ललिता पवाराक शिक्षण पुराय करपाक मेळ्ळें ना.
ललिता पवारान बाल कलाकार म्हणून कारकीर्द सुरू केली. भाव आनी बापाय वांगडा पुण्यां गेल्ले कडेन एका सिनेमाचें शूटिंग पळोवपाक ती उबी राविल्ले, तेन्ना ती दिग्दर्शकाले नदरेंत भरली आनी ताणें रोखडीच तिका फुडल्या फिल्मा खातीर वेंचून काडली. दिग्दर्शकान बापायक परत परत समजायले उपरांत ताणें तिका अभिनय करुंक हयकार दिलो. पिरायेच्या णवव्या वर्सा राजा हरिशचंद्र (1928) ह्या मूक चित्रपटांतल्यान तिणें आपली अभिनय कारकीर्द सुरू केली. उपरांत मूकपट आनी 1940 च्या दशकांतल्या चित्रपटांनी मुखेल भुमिका करपाक सुरवात केली. ही कारकीर्द सात दशकां मेरेन चल्ली. त्या वेळार जायते चित्रपट थ्रिलर आसताले. पूण हातूंत अभिनेत्री मात्शी बोल्ड आनी स्टंट करपी जाय आसताली. ललिता पवाराक अशेच तरेचे चित्रपट मेळ्ळे. तिगेले मस्तीखोर माशूक आनी भवानी तलवार, प्यारी कतार, जलता जिगर कातील कटार हे चित्रपट आयले. हाचे उपरांत तिणें कैलाश (1932) ह्या मूक चित्रपटांत तिणें सह-निर्मिती आनी अभिनय केलो. कांय पौराणीक चित्रपटांनीय काम केलें. पूण ललिता आपल्या बोल्ड स्टायल आनी स्टंटां खातीर फामाद आशिल्ली.
भगवान दादा आनी ललिता पवार हांणी 1947 वर्साच्या जंग-ए-आझादी ह्या चित्रपटांत एकठांय काम केलें. एका सिना वेळार भगवान दादाक ललिता पवाराचेर खर थापट मारपाचें आशिल्लें. ताणें इतलें सणसणीत थापट मारलें की ती जमनीर पडली. दोतोराक आपोवचो पडलो. दोतोरान दिल्ल्या वखदाचो वायट परिणाम जालो आनी उजवे वटेन आरीचो आताक जाली. उपरांत ती बरी जाली, पूण तिचो उजवो दोळो धांपिल्ले सारको जालो आनी तिका मुख्य अभिनेत्री म्हणून काम मेळप बंद जालें. पूण ललिता पवार निराश जावंक ना. परतून फिल्म इंडस्ट्रींत आयली वेगळेच शैलींत.
1941 वर्सा वि. स. खांडेकर हांचे कथेचेर आदारिल्ल्या ‘अमृत’ चित्रपटांत तिणें मोचीची भुमिका केल्ली. लोकांनी भूमीकेची तोखणाय केल्ली पूण तिका लोकां कडसून अस्पृश्यतायेची वागणूक मेळपाक लागतगीर ललिता पवाराक जाती प्रमाणपत्र तयार करचें पडलें. तिणें दोन चित्रपट तयार केले. लियो टॉलस्टॉयचे कादंबरीचेर आदारून दुनिया क्या है नांवाचो चित्रपट 1938 त तयार केलो. तिच्या दुसऱ्या ‘कैलाश’ फिल्मांत पयशांच्या उणावाक लागून तिणें स्वता तीन नायिका, खलनायक आनी आवय हांची भुमिका केल्ली. चतुर सुंदरी ह्या चित्रपटांत तिणें 17 भुमिका केल्यात. राम शास्त्री, दहेज, अमरगीत, दाग, श्री 420, नौ दो ग्यारह, परवरीश, झुमरू, जिस देश मे गंगा बहती है, आंचल हे तिचे गाजिल्ले चित्रपट. तिका अनाडी खातीर सहायक अभिनेत्रीचो फिल्मफॅर पुरस्कार फावो जालो.
1952दाग 1955 श्री ४२०,1957 नौ दो ग्यारह 1958 परवरीश नामांकीत – उत्कृश्ट सहाय्यक अभिनेत्री खातीर फिल्मफेयर पुरस्कार1959 अनारी श्रीमती एल डी’साउत्कृश्ट सहाय्यक अभिनेत्री खातीर फिल्मफेयर पुरस्कार मेळ्ळो. जंगली, संपूर्ण रामायण, मेमदिदी, ब्लफ मास्टर, शराबी, फुल और पत्थर, बूंद जो बन गये मोती, आँखे, आनंद, ज्वाला, बाॅम्बे टू गोवा, हमराही, आज का ये घर, याराना, नसीब, एक दिन बहू का, वतन के रखवाले अशा हिंदी, मराठी आनी गुजराती 700 वयर चित्रपटांनी तिणें काम केलें. 70 वर्सां परस चड काळाच्या सगळ्यांत लांब अभिनय कारकिर्दीचो ललिता पवार हांचो संवसारीक गिनीज विक्रम आसा. 24 फेब्रुवारी 1998 दिसा म्हालगडी अभिनेत्री ललिता पवार हिणें ह्या संवसाराक निरोप दिलो.
———————
सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
