भांगरभूंय | प्रतिनिधी
पणजी : पुलीस बंदखणींतल्यान पळून गेल्लो आनी ८ दिसांनी केरळ पुलिसांचे मजतीन अटक केल्लो सिद्दीकी उर्फ सुलेमान खान (५०) हाका उपचारा खातीर गोमेकॉंत व्हेला.
२५ डिसेंबराक सिद्दीकीक क्रायम ब्रांच पुलिसांनी गोंयांत हाडले उपरांत पोरणें गोंय पुलिसांनी ताका अटक केल्ली. ताचे आड पुलीस बंदखणींतल्यान पळून गेल्ले खातीर तशेंच बडतर्फ आयआरबी पुलीस कॉन्स्टेबल दुबावीत अमित नायक हाका होन्नावर- कुमठा पिस्तुलाचो भंय दाखोवन धमकी दिल्ल्याच्या आरोपा खाला आर्म ऍक्ट कायद्या खाला गुन्यांव नोंद केला. सोमाराची सिद्दीकी हाका पणजी न्यायालयान सात दिसांची पुलीस बंदखण आयकयल्ली.
१३ डिसेंबराक सिद्दीकी उर्फ सुलेमान खान हांणी रायबंदरच्या एसआयटीचे पुलीस बंदखणींतल्यान बडतर्फ आयआरबी कॉन्स्टेबल दुबावीत अमित नायक हाचे मजतीन पळ काडिल्लो. त्या दिसा सावन गुन्यांव फांट्याच्या पुलिसां सयत गोंय पुलीस दुबावीत सिद्दीकी हाचो सोद घेताले. पुलिसांनी हुबळी आनी कारवार सयत कर्नाटकच्या हेर राज्यांनी ताचो सोद घेतलो. तशेंच हैदराबादाकूय ताचो सोद घेतलो. निमाणें पुलिसांच्या येत्नाक येस आयलें आनी सिद्दीकक ईर्नाकुलम केरळ पोलिसांचे मजतीन गोंय पुलिसांनी केरळाक अटक केली.
सिद्दीकी हो केरळाक आशिल्ल्याची म्हायती आधुनीक तंत्रज्ञानाच्या आधादाचेर पुलिसांक मेळिल्ली. ते प्रमाण गोंय पुलिसांनी केरळ पुलिसांक हे विशीं म्हायती दिवन सतर्क रावन ताका धरलो. पुलिसांनी अफसाना उर्फ सारीका खान ही सिद्दीकी हाची घरकान्न. तिकाय पुलिसांनी अटक केली. सिद्दीकी हांणी बायल अफसाना आनी भुरग्यां वांगडा केरळाक आसरो घेतिल्लो. त्यान पयलीं तांणी गोंय पुलिसांक फटोवपा खातीर जायतें केलें. मोबाय फोन आनी रावपाच्यो सुवातो तांणी परत परत बदल्ल्यो. मात तंत्रज्ञानाच्या आदारार ताचो सोद घेतिल्ल्यान ताका धरपाक पुलिसांक येस आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
