भांगरभूंय | प्रतिनिधी
सिडनी, खबरां संस्थाः सिडनीच्या बाँडी दर्यावेळेर हनुक्का कार्यावळी वेळार जाल्ल्या भिरांकूळ फारपेट घडणुकेंत पाकिस्तानांतल्या बापूय-पुताचो आस्पाव आशिल्ल्याची म्हायती मेळ्ळ्या. अमेरिकन गुप्तचर अधिकाऱ्यांचो उल्लेख करून सीबीएस न्यूज कंपनीन ही म्हायती दिल्या.
हे घडणुकेंत घडणुकेच्या थळार 50 वर्सां पिरायेच्या बापायक मरण आयलें, जाल्यार ताच्या 24 वर्सां पिरायेच्या पूत गंभीर जखमी जालो. ताचेर हॉस्पिटलांत उपचार चलतात आनी सध्या तो पुलिसांच्या निरिक्षणांत आसा.
आयतारा सांजवेळार “चानुक्का बाय द सी” नांवाच्या भौशीक हनुक्का कार्यावळी वेळार हो हल्लो जालो. फारपेट जाले उपरांत उत्सवाचें वातावरण भंयांत रुपांतरीत जालें आनी दर्यादेगेर आनी लागसारच्या रस्त्यां वयल्यान लोकांनी पळ काडलो. उपरांत पुलिसांनी सांगलें, हल्लेखोर सयत वट्ट 16 जाणांक घडणुकेच्या थळार मरण आयलें. दुसऱ्या दुबाविताक अटक केल्या.
पत्रकार परिशदेंत उलयतना लॅन्यन हांणी सांगलें, घडणुकेच्या सुवातेर लागसार दोन स्फोटक उपकरणां मेळ्ळ्यात. ती विशेश पंगडान सुरक्षीतपणान निकामी केल्यात.
परवानो आशिल्लो बंदूकधारी
चवकशेचो एक भाग म्हूण अस्तंत सिडनीच्या बॉनीरिग आनी कॅम्पसी वाठारांतल्या दोन सुवातींनी सोद घेतिल्ल्याचे पुलीस आयुक्तान सांगलें. मरण आयिल्लो हल्लेखोर परवानो आशिल्लो बंदूकधारी आशिल्लो आनी ताच्या नांवार स शस्त्रां नोंद आशिल्ली. हीच शस्त्रां बाँडी दर्यावेळेर फारपेट वेळार वापरिल्ल्याचो दुबाव आसा. तशेंच दुबावीता कडेन 10 वर्सा सावन बांदूक परवानो आशिल्लो अशेंय पुलिसांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
