भांगरभूंय | प्रतिनिधी
23 लश्करी जवान व्हांवून गेल्ल्याचो दुबाव, कांय लोक बेपत्ता
खबरां संस्था
गंगटोकः सिक्किमांत अचकींत ढगफुटी जाल्ल्यान तिस्ता न्हंयेक हुंवार आयलें. थंयची लोकजीण विस्कळीत जाल्या. सिक्किमांत तैनात आशिल्ले 23 लश्करी जवान बेपत्ता आसात. ते हुंवारांत व्हांवन गेल्ल्याचो दुबाव आसा. तांकां सोदपाक बचावकार्य सूर आसून मुख्यमंत्री प्रेमसिंग तमांग हांणी परिस्थितीचो नियाळ घेतला.
ढगफुटीक लागून न्हंयेच्या पात्रांतल्या उदकाचे पातळेंत 15 ते 20 फूट वाड जाल्ल्यान थंय भिरांकूळ परिस्थिती निर्माण जाल्या. चुंगथांग धरणांतल्यान उदक सोडिल्ल्यान न्हंयांच्या पातळेंत अचकींत वाड जाली. ताका लागून हुंवाराची परिस्थिती निर्माण जाल्या.
सिक्किमांत बुधवारच्यान घोग्यांनी पावस पडत आसा. उत्तर सिक्किमांतल्यान ल्होनाक सरोवराचेर जाल्ले ढगफुटीक लागून तिस्ता न्हंयेंतल्या उदकाची पातळी वाडली. सिक्किम आनी अस्तंत बंगालांतल्यान व्हांवपी ही न्हंय बांगलादेशांत वता.
मजगतीं, सिक्किम प्रशासनान हाय अलर्ट जारी केला. ढगफुटींत कोणूच जखमी जावंक ना. पूण 23 जवाना सयत कांय लोक बेपत्ता जाल्यात. भौशीक मालमत्तेचें लुकसाण जालां. सिंगतामांत कांय लोक बेपत्ता आशिल्ल्याची म्हायती मुख्यमंत्री प्रेमसिंग तमांग हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
