भांगरभूंय | प्रतिनिधी
कळंगूट मतदारसंघ मंचः हॉटेला परस वनस्पत बाग उबारपाची मागणी
भांगरभूंय । प्रतिनिधी
म्हापशें: सिकेरी दोंगुल्ली ही पर्यावरणाचे नदरेन संवेदनशील आनी जैवीक नदरेन संरक्षीत वाठार आसा. मात हे दोंगुल्लेचेर हॉटेल प्रकल्प चालीक लावचे खातीर गोंय सरकारान इंडियन हॉटेल कंपनी कडेन सप्लिमेंट भाडेपट्टी करार केला. दोंगुल्लेच्या विध्वंसाक चालना दिवपी सरकाराचें हें पावल आसा. हॉटेल प्रकल्पा परस उत्पन्नाचे नदरेन बॉटनिकल गार्डन (वनस्पत बाग) उबारून सरकारान ही दोंगुल्ली फुडले पिळगे खातीर सुरक्षीत दवरची, अशी मागणी कळंगूट मतदारसंघ मंचाचे अध्यक्ष प्रेमानंद दिवकार हांणी केली.
सोमारा 3 फेब्रुवारीक म्हापश्यां आयोजीत पत्रकार परिशदेंत दिवकार उलयताले. ह्या वेळार मंचाचे सल्लागार आग्नेलो बार्रेटो, उपाध्यक्ष डॅमियन तेलीस, क्रूझ सिल्वेरा, भांडारी आगुस्तीन डिकॉस्ता, जनसंपर्क अधिकारी क्लोतिंदस ब्रागांझा, वांगडी लॉरेन्स सिल्वेरा आनी पेररेतो फर्नांडीस हाजीर आशिल्ले.
दिवकार हांणी सांगलें, सरकारान भाडेपट्टी करार करून सिकेरी दोंगुल्लेचेर 88 कुडींचें पांच नखेत्री हॉटेल आनी क्लब हावस हाडपाचें कारस्थान रचलां. कांदोली गांवांतली सर्व्हे नं. 96/0 तली 3 लाख चौखण मिटर जमीन पांच नखेत्री हॉटेल उबारपा खातीर दिवपाचे सरकारान यत्न चलयल्यात. 50 वर्सां आनी उपरांत 24 वर्सां खातीर हो करार आसा. सुमार 65 कोटी रुपयांचें हें करारपत्र आसा. तशेंच सरकारान संबंदीत प्रशासकीय खात्यांक ह्या प्रकल्पा खातीर येवपी दरेका अर्जाक तत्काळ मंजुरी दिवची, अशें सांगला, असो दावो दिवकार हांणी केलो.
अश्या प्रकल्पाक लागून कांदोळीचो दोंगराळ वाठाराचो तशेंच गोंयांतल्या पर्यावरणाचो विध्वंस जातलो. ताका लागून सरकारान सारासार विचार करून अश्या प्रकल्पांक मंजुरी दिवपाचें टाळचें. सरकारान जर आपल्या निर्णयांत सुदारणा केली ना जाल्यार आमी न्यायालया कडेन दाद मागतले. ते खातीर आमी कायदेशीर सल्लो घेतात, अशें दिवकार हांणी सांगलें.
रियल इस्टेटकारांचें हीत सांबाळपा खातीर सिकेरी दोंगुल्ले सारक्या पर्यावरण दिश्टीकोनांतल्यान अतिसंवेदनशील सुवातेंत सरकार काँक्रिटीकरण करपाक सोदता. हाका लागून जैवविविधता नश्ट जातली. सरकारान थंयचे सजीव सृश्टीची दखल घेवन, थंय संवसारीक दर्जाची वनस्पत बाग उबारप अपेक्षीत आसा, जाका लागून दोंगुल्लीचें संरक्षण जातलें, अशेंय दिवकार हांणी म्हणलें.
पंचायत परवानगी दिवची नाः प्रेमानंद दिवकार
कांदोळी पंचायती कडेन विशय मांडला. खंयचेच परिस्थितींत ह्या प्रकल्पाक पंचायती कडल्यान परवानगी मेळची ना. मंचा वतीन उबारिल्ल्या लोकलड्याचे चळवळीक थळावी पंचायत तेंको दितली, अशी हमी सरपंचान दिल्या. आमी बेगिनूच ‘सेव्ह सिकेरी हील ङॉर नॅक्स्ट जनरेशन’ ही चळवळ सुरू करतले, अशी म्हायती प्रेमानंद दिवकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
