भांगरभूंय | प्रतिनिधी
‘ऑपरेशन सिंदूर’ चालीक लावन मोदी सरकारान देशांतले समेस्त आवय-भयणींक तांचो सिंदूर सुरक्षीत आसा हाची हमी दिली. पहलगामांत फारपेट करून निश्पाप लोकांचे बळी घेतिल्ल्या आतंकवाद्यांक, तांकां पोसपी पाकिस्तानाक ‘ऑपरेशन सिंदूर’च्या माध्यमांतल्यान भारत सरकारान खर शिटकावणी दिल्या ‘आमी आतंकवाद खपोवन घेवचे नात, तुमी तांकां जाय तितले पोसात, तुमचे जमनिरूच तांकां ख्यास्त दितले.’ भारताच्या ह्या कृतीची संवसारभर तोखणाय जाता.
आतंकवाद कोणाक जाय? कोणाकूच नाका. आयज संवसारभर परिशदांनी आतंकवादाचेर मुखेलपणान चर्चा जाता. आतंकवाद्यांक पोसपी देश म्हूण पाकिस्तान फामाद आसा. पाकिस्तानान कितलेशेच फावटी तांचे वेलो आरोप न्हयकारलो. मात, दर खेपे ते तोंडार आपटले. ओसामा बीन लादेनाक खंय मारलो? पाकिस्तानांतूच. इस्लामाबादा लागीं यूएसच्या स्पेशल फोर्सान ताका सोंपयलो. पाकिस्तान आतंकवाद्यांक पोसून कितें मेळोवपाक सोदता? खरें म्हणल्यार तुमी रावतात ती जमिनूय तुमची न्हय. भारत स्वतंत्र जावपा वेळार पाकिस्तानाची निर्मिती जाली. त्या वेळार पाकिस्तानांत वचप्यांचो फुडार बरो आसचो म्हूण जाय तितलो पयसो दिलो. मात, हो पयसो गेलो खंय. सामान्य लोकांक भिकेक लावन राजकारण्यांनी आनी तांणी निर्माण केल्ल्या लश्करान सगलो पयसो दामलो. लोकांक भारत हो दुस्मान म्हूण दाखोवन दिवपा खातीर त्या वेळा वेल्या राजकारण्यांनी, लश्करान यत्न केले, तातूंत तांकां येसूय आयलें. लोकांक शिक्षणा पसत पयस दवरप. तकलेंत भारत दुस्वास भरप इतलेंच काम ह्या लोकांनी केलें.
जम्मू – काश्मीर पाकिस्तानाचो भाग केन्नाच नाशिल्लो. भारत स्वतंत्र जालो तेन्ना थंयचे राज्यकर्ते राजा हरी सिंह हांचें मुखार दोन पर्याय आशिल्ले. एकतर भारतांत येवप ना जाल्यार नव्यान तयार जाल्ल्या पाकिस्तानांत वचप. राजा हरी सिंहान निर्णय घेवपाक कळाव केलो, तो मेरेन थंयच्या मुस्लिमांनी (गिलगीट – बाल्टिस्थानच्या) जम्मू-काश्मिराच्या व्हड भागाचेर कब्जो केलो. हे वटेन भारतान पुराय काश्मीर भारताचें राज्य म्हूण आसपाक जाय अशी अट घाल्ली. ताचेर चर्चा करता म्हणसर वेळ गेलो. राजा हरी सिंहान घुसखोरी केल्ल्या मुस्लिमांचेर कारवाय करची, पुराय काश्मीर भारता कडेन हाडुया म्हूण त्या वेळा वेल्या भारत सरकाराक सांगलें. मात, त्या वेळार भारतान लश्करी कारवाय करूंक ना आनी अर्दो काश्मीर पाकिस्तानाच्या शेका खाला गेलो. हो काश्मीर परतून हाडटा म्हूण केंद्रीय मंत्री अमीत शाह हांणी सांगलां. ते हाडपाचे नदरेन कामूय सुरू आसतलें. भारता कडेन आशिल्ल्या जम्मू – काश्मिरांतलें कलम 370 रद्द करून भारतान पयलें नैतीक जैत मेळयिल्लें. भारताच्या ह्या जैता उपरांत पाकिस्तानाक कितें करूं आनी कितें नाका अशें जाल्लें. म्हणून अदीं मदीं तांणी पोशिल्ल्या आतंकवाद्यां कडल्यान कारवायो सुरूच आशिल्ल्यो. पहलगामांत जाल्लो आतंकवादी हल्लो आतंकवाद्यांनी नियोजन करून केल्लो. हल्लो केले उपरांत पळ काडिल्ले आतंकवादी सोशल मिडियाचेर भारताक चाळयतना दिसले. भारतांत येवन भारतीयांक मारून वतले आनी कोणूच कांयच करचे नात? अशें जातलें? शक्यच ना. सरकारान आतंकवाद्यांक तांच्याच उतरांनी जाप दिली. ‘ऑपरेशन सिंदूर’ हो ताचो एक भाग जावन आसा. हिमनगाचें एक तोंक आसा. भारताचे वाटेक वचत जाल्यार भारत पुराय पाकिस्तान ना करपाक शकता, ही शिटकावणी जावन आसा.
‘ऑपरेशन सिंदूर’ ही एक सुरवात आसा. पहलगाम हल्ल्या उपरांत सिंधू जल कबलात स्थगीत दवरून भारतान पाकिस्तानाचेर जलसंकश्ट हाडपाची तयारी दाखयली. सिंधू न्हंय भारताची, पाकिस्तान शेजारी देश. थंयच्या जनतेची काकुळट करून तांकां उदक दिल्लें. ही सिंधू कबलात स्थगीत करून भारतान योग्य रणनितीचे दिकेन पावल मारलां, अशें आमच्यान म्हणूं येता.
भारत सरकारान, खरें म्हणल्यार मोदी सरकारान फाटल्या 9 वर्सांत पाकिस्तानाक खर जाप दिल्या. 2016 त उरी हल्ल्या उपरांत 10 दिसांनी सर्जिकल स्ट्रायक करून भारतान पाकिस्तानाक तांची सुवात दाखोवन दिल्ली. भारताचे हे कारवाये उपरांतूय पाकिस्तानाक अक्कल म्हणटा ती येवंक ना. 2019 त आतंकवाद्यांनी पुलवामांत भारतीय लश्कराच्या वाहनाचेर हल्लो केलो. तातूंत 40 जवान शहीद जाले. ताचो बदलो घेतना मोदी सरकारान 12 दिसांनी बालाकोट अॅर स्ट्रायक घडोवन हाडलो. आनी आतां पहलगाम हल्ल्या उपरांत ‘ऑपरेशन सिंदूर’ चालीक लायलें.
ऑपरेशन सिंदूराचें खाशेलेपण म्हणल्यार पुराय देशभर झुजाचे तयारेचो, उपाय येवजण्यांचो मॉक ड्रील दवरून भारतान आपली तयारी जाल्या अशें दाखोवन दितनाच पाकिस्तानान पोशिल्ल्या आतंकवाद्यांक हालपाची संद दिनासतना तांचेर हल्लो केलो. तशेंच हो हल्लो फक्त एक-दोन सुवातांचेर न्हय तर 9 सुवातांचेर जालो. तातूंतल्यो 4 सुवातो पाकव्याप्त काश्मिरांतल्यो, जाल्यार उरिल्ल्यो पाकिस्तानाच्या पंजाबांतल्यो. भारतीय लश्कर पाकिस्तानांत भितर मेरेन घुसून कारवाय करपाक शकता, हें ह्या ऑपरेशनांतल्यान दिसून आयलें.
फाटल्या सरकारान म्हणल्यार 2012 पयलींच्या सरकारान मुंबयंत जाल्ल्या 26/11च्या हल्ल्या उपरांत पाकिस्तानाचेर, थंयच्या आतंकवाद्यांचेर खर कारवाय करपाक जाय आशिल्ली. मात, चर्चेंतूच वेळ गेलो. झुजा खातीर तयारी करप काय कितें करप ही चर्चा निमाणें मेरेन कोल्ड स्टोरेजांतूच उरली. मात, ह्या हल्ल्या उपरांत पाकिस्तानाचें आपशींच लुकसाण जालें, हें खरें. हो हल्लो जाय मेरेन पाकिस्तान एक प्रगतशील देश म्हूण मुखार येवपाक लागिल्लो. मात, आतंकवाद्यांच्या कुकर्मान हो देश फाटीं पडत गेलो, तो सामकोच फाटीं पडलो. आयज हो देश जेवणा-खाणां खातीर तळमळटा. ताचें कारण आतंकवादूच. तांकां मजत करपाक 2-4 देश फुडें सरतात, तेंवूय आतंकवादाक सारें उदक घालपीच. मात, संवसारभर आतंकवादा आड जी भुमिका आसा तें पळयल्यार भारताची भुमिका योग्य दिकेन आसा आनी ताका खूबशे देश तेंकों दितले हातूंत मातूय दुबाव ना.
अमर पाटील
7507495151
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
