भांगरभूंय | प्रतिनिधी
पी व्ही सिंधू आनी किदाम्बी श्रीकांत हांणी काल आपलीआपली मॅच जिखून बॅडमिंटन आशिया चॅम्पियनशिपीचे दुसरे फेरयेंत सुवात मेळयली. पूण, लक्ष्य सेनाचें आव्हान सोंपलें. दोन खेपेची ऑलिम्पीक पदक जैतिवंत पी व्ही सिंधून बायलांच्या एकोड्या गटांत चीनी तायपेचे वेन ची ह्सू हिका 21-15 आनी 22-20 अशा सरळ गेमींनी हारयली. प्री क्वॉर्टरफायनलींत आठवे सिडा वयली सिंधू चीनाचे हान यू आड खेळटली.
दादल्यांच्या एकोड्या गटांत किदाम्बी श्रीकांतान बहरीनाच्या अदनान इब्राहिमाक 21-13 आनी 21-8 असो सहज हारयलो. फुडले फेरयेंत श्रीकांत जपानाच्या कोडाई नारोका आड खेळटलो. पूण, राष्ट्रकूल खेळांत भांगरा पदक जिखपी लक्ष्य सेनाक सिंगापूराचो आदलो वस्ताद लोह किन यू कडल्यान 7-21, 21-23 अशा फरकान हार घेवची पडली.
बायलांच्या दोट्टी गटांत मात त्रिशा जॉली आनी गायत्री गोपिचंद हे जोडयेन फुडले फेरयेंत सुवात मेळयली. एका वरा परस चड वेळ चलिल्ले मॅचींत भारताची जोडी एका वेळार फाटीं आशिल्ली. पूण, उपरांत येसस्वी रितीन पुनरागमन करतना इंडोनेशियाचे लॅनी ट्राय मायासारी आनी रिबका सुगियातो हे जोडयेक 17-21, 21-17 आनी 21-18 अशा तीन गेमींनी हारयली.
मिश्र गटांत लेगीत भारताचे जोडयेक जैत फावो जालें. रोहन कपूर आनी सिक्की रेड्डी हे जोडयेन मलेशियाचे चान पेंग सून आनी चीह यी सी हे जोडयेक 21-12 आनी 21-16 अशा फरकांनी हारयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
