भांगरभूंय | प्रतिनिधी
भालोफेक नीरज चोपडा दुखापतीक लागून राष्ट्रकूल खेळां सर्तींतल्यान फाटीं सरपाचो निर्णय घेतल्या उपरांत उक्तावण सुवाळ्यांत भारताची ध्वजवाहक म्हणून पी व्ही सिंधूची निवड केल्या.
संवसारीक अॅथलेटिक्स वस्तादपण सर्ती वेळार नीरज जखमी जाल्लो. ताची दुखापत गंभीर आशिल्ल्यान ताणें राष्ट्रकूल खेळां सर्तींतल्यान फाटीं सरपाचो निर्णय घेतलो.
नीरज फाटीं सरल्या उपरांत वेटलिफ्टर मीराबाई चानू आनी बॉक्सर लोव्हलिना बोरगोहैन हांची ध्वजवाहक म्हणून विचार जाल्लो.
चार वांगड्यांचे समीतीन हातूंत आयओएचे प्रभारी अध्यक्ष अनील खन्ना, सचीव राजीव मेहता आनी भांडारी आनंदेश्वर पांडे, टीम इंडियाचे मिशन मुखेली राजेश भंडारी हांणी ह्या तीन खेळगड्यांचीं नांवां शॉर्टलिस्ट केल्ली. ते उपरांत खन्ना आनी मेहता हांणी पी व्ही सिंधूची निवड केली.
सिंधून रियो ऑलिम्पीक 2016 आनी टोकियो ऑलिम्पीक 2020 हातूंत पदकां जिखल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
