भांगरभूंय | प्रतिनिधी
भारताची स्टार बॅडमिंटन खेळगडी पी व्ही सिंधून जकार्तांत चालू आशिल्ले इंडोनेशिया ओपन वर्ल्ड टूर सुपर 1000चे पयले फेरयेंत येजमान इंडोनेशियाचे ग्रिगोरिया मारिस्का तुंजुंग हिका हारोवन प्री क्वॉर्टर फायनलींत सुवात मेळयली.
दादल्यांच्या एकोड्या गटांत एच एस प्रणय हाणें लेगीत फुडले फेरयेंत सुवात मेळयली. पूण, त्रिशा जॉली आनी गायत्री गोपिचंद हे बायलांचे जोडयेक हार घेवची पडली.
फाटल्या दोन सर्तींनी पयले फेरयेंत हारपी पी व्ही सिंधून इंडोनेशियाचे खेळगडयेक 38 मिनटां मेरेन चलिल्ले मॅचींत 21-19 आनी 21-15 अशा सरळ गेमींनी हारयली. दोन खेपेची ऑलिम्पीक पदक जैतिवंत सिंधून ग्रिगोरिया आड तीन मॅचीं उपरांत पयलें जैत जोडलें.
ग्रिगोरियान पयले गेमींत बरी सुरवात करतना 9-7 अशी आघाडी घेतली. पूण, भारताचे खेळगडयेन आपले उंचेचो पुर्ण फायदो करून घेतना बरे गूण मेळयले आनी ग्रिगोरियान सेगीत तीन चुकी केल्यो. ताचो फायदो सिंधून घेतलो आनी ब्रेका मेरेन 11-10 आघाडी घेतली आनी उपरांत गेम जिखली.
दुसरे गेमींत लेगीत उत्कृश्ट लयेंत दिसली. सिंधून ग्रिगोरिया आड 10तलें आठवें जैत जोडलें. सिंधू आतां फुडले फेरयेंत ताई जू यिंगा आड खेळटली. सिंंधू आड ताईचो रॅकॉर्ड बरो आसा. तिणें सिंधू आड सेगीत आठ मॅची जिखल्यात. सिंधू आड तिचो रॅकॉर्ड 18-5 असो आसा.
मजगतीं, फॉर्मांत आशिल्ल्या एच एस प्रणयान जपानाच्या केंटा निशिमोटोक 50 मिनटांनी 21-16 आनी 21-14 अशा सरळ गेमींनी हारयलो. फाटल्या म्हयन्यांत मलेशिया मास्टर्स सुपर 300चो किताब जिखपी प्रणय फुडले फेरयेंत हॉंगकॉंगच्या खेळगड्या आड खेळटलो.
बायलांच्या दोट्टी गटांत मात भारताक निर्शेणी हाताक लागली. त्रिशा जॉली आनी गायत्री गोपिचंद हे भारताचे जोडयेक जपानाचे रिंग इव्हानागा आनी केई नाकानिशी कडल्यान एक वर आनी 12 मिनटां मेरेन चलिल्ले मॅचींत 22-20, 12-21 आनी 16-21 अशा फरकान हार घेवची पडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
