भांगरभूंय | प्रतिनिधी
दोन खेपेची ऑलिम्पीक पदक जैतिवंत पी व्ही सिंधू आनी थॉमस करंड जिखपी पंगडाचो वांगडी आशिल्लो एच एस प्रणॉय हांणी बॅडमिंटन वर्ल्ड फॅडरेशनान जारी केल्ल्या ताज्या रॅंकिंगेंत बायलांच्या आनी दादल्यांच्या एकोड्या गटांत दरेकी एकेक सुवातेच्या फायद्या सयत वळेरेन पांचवे आनी 12वे सुवातेर पावलीं.
ऑगस्टांत राष्ट्रकूल खेळां सर्तींत भांगरा पदका खातीर जाल्ले मॅचींत खेळटना तिचे खोटेक दुखापत जाल्ली. तेन्ना पासून प्रतिस्पर्धी सर्तींतल्यान भायर आशिल्ले सिंधूचे 26 सर्तींतल्यान 87218 गूण जाल्यात. तिणें तीन वर्सांनी पयल्या परतून पांचांनी सुवात मेळयली.
दुखापतींतल्यान पुर्ण बरी जावपी सिंधून परतून सरावाक सुरवात केल्या. दादल्यांच्या एकोड्या गटांत प्रणॉयान डॅनमार्क ओपन 750 सर्तीचे क्वॉर्टरफायनलींत सुवात मेळयल्या उपरांत रॅंकिंगेंत मुखार वचप चालूच दवरला. तो सध्या 12वे सुवातेर पावला.
राष्ट्रकूल खेळांत दादल्यांच्या एकोड्या गटांत भांगरा पदक जिखपी लक्ष्य सेन आनी किदाम्बी श्रीकांत वळेरेन आठवे आनी 11वे सुवातेर कायम आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
