सिंधुदुर्ग हे छत्रपती शिवरायांच्या सामर्थ्याचें प्रतीक

भांगरभूंय | प्रतिनिधी

-तारकर्ली-मालवणा नौदळ दिसा प्रधानमंत्री मोदींचे गौरवोद्गार

-कोंकणाचे उदरगती खातीर सरकार बांदील

– तारकर्लीच्या दर्यादेगेर रंगलो नौसेना दिसाचो सुवाळो

-नौदळांतल्या पदांक भारतीय नावां, गणभेसाचेर शिवमुद्रा

-प्रधानमंत्री नरेंद्र मोदी हांणी केली घोशणा

मालवणः भारतीय नौदळ दिसा निमतान प्रधानमंत्री नरेंद्र्र मोदी हांणी मालवणा आयोजीत कार्यावळीक हजेरी लायली. ह्या वेळार तांचे हस्तुकीं छत्रपती शिवाजी महाराजांच्या पुर्णाकृती पुतळ्याचें अनावरण जाले. तारकर्लीच्या दर्यादेगेर नौसेना दीस कार्यावळ मोदींचे हाजिरेंत जाली. ह्या सुवाळ्या खातीर भाजप फुडारी नारायण राणे, मुख्यमंत्री एकनाथ शिंदे, उपमुख्यमंत्री अजित पवार, उपमुख्यमंत्री देवेंद्र फडणवीस हांचे सयत हेर फुडारी हाजीर आशिल्ले.

ह्या वेळार मोदी हांणी नौदळांतल्या पदांक भारतीय पद्दतीचीं नांवां दितले जाल्यार नौदळाच्या गणभेसाचेर शिवमुद्रा आसतली, अशी घोशणा केली. उपरांत उपस्थितांक खासा करून कोंकणवासियांक संबोधीत करतना मोदी हांणी कांय म्हत्वाच्यो घोशणा केल्यो.

हातूंत रत्नागिरी, देवगड, मालवण ह्या दर्यादेग वाठाराच्या उदरगतीचो आस्पाव आसा. खासा करून कोंकणाचे उदरगती खातीर आमचे सरकार बांदील आशिल्ल्याचे तांणी सांगलें.

शिवरायांनी जोडिल्लीं नौदळाची शक्त आमी परकीय आक्रमणांक लागून वगडायली. आतां ती परतून मेळोवपाची आसा, अशें तांणी सांगलें.

भारताचो इतिहास जैत, शौर्य, गिन्यान आनी विज्ञान हांचो इतिहास आसा. आमच्या दर्या सामर्थ्याचो इतिहास आसा. एक काळ असो आशिल्लो, ज्या काळांत सुरतच्या दर्यादेगेर 80 परस चड देशांच्यो बोटी आसताल्यो. विदेशांतल्यान जेन्ना हल्ले जाले तेन्ना आपल्या शक्तीचेर हल्ले केल्यात. आमची कला, कुशळटाय विदेशी हल्ल्यांनी ठप्प जाल्ली. जेन्ना आमी दर्यावयलें नियंत्रण वगडायलें, तेन्ना अर्थीक नदरेन आमी दुबळे जाल्ले. आतां आपल्या देशाक परतून वैभव मेळोवन दिवपाचे आसा, अशें प्रधानमंत्री मोदी हांणी म्हणलें.

सिंधुदुर्ग हो इतिहासीक किल्लो पळोवन आपलो हड्डो अभिमानान भरून येता. छत्रपती शिवाजी महाराज हांकां आरमाराचें म्हत्व पटिल्लें. जो दर्याचेर नियंत्रण दवरता, ताका सत्ता राखपाक मेळटा, हे तांकां खबर आशिल्ले. हिरोजी इंदुलकर, कान्होजी आंग्रे ह्या विरांक आपूण नमन करता. शिवाजी महाराजांची प्रेरणा घेवन गुलामीची मानसिकता सोडून भारत देश प्रगती करता, अशेंय प्रधानमंत्री मोदी हांणी म्हणलें.

भारताचो इतिहास गौरवशाली

नौदळाच्या झेंड्याक छत्रपती शिवाजी महाराजांच्या प्रेरणे कडेन जोडपाची संदी मेळ्ळ्या, हें हांव म्हजें भाग्य समजता. भारतीय नौदळ आतां पदांचीं नांवां आपल्या परंपरे प्रमाण दितले. नारीशक्तीची संख्या वाडोवपाचेरूय आपण भर दिता. नेव्हल शिपांत पयल्या बायलां कमांडींग अधिकाऱ्याची नेमणूक जाल्या. आयचो भारत आमचे खातीर नवे लक्ष्य थारायता, ही खूब बरी गजाल. एक व्हड शक्त भारताचे फाटल्यान आसा आनी ती शक्त 140 कोटी लोकांच्या विस्वासाची आसा. भारताचो इतिहास एक हजार वर्सांच्या गुलामीचो न्हय, तशेंच फक्त हार आनी निरशेवणी हांचोय न्हय, अशें मोदी हांणी म्हणलें.