भांगरभूंय | प्रतिनिधी
कणकवलीः मामाच्या घरा लग्नाची पत्रिका दिवन परतून येतना जाल्ल्या अपघातांत तरणाटेक मरण आयलें. लग्ना पयलीं हे तरणाटेक मरण आयिल्ल्यान सगळे कडेन दुख्ख पाताळ्ळां. तळवडे -आंब्रड रस्त्यार हो अपघात जालो. फोंडाघाट, गंगोवाडीच्या निकिता सावंत (28) हाका अपघातांत जाग्यारुच मरण आयलें जाल्यार ताचो भाव वैभव जखमी जालो.
लग्नाची पत्रिका घेवन निकिता मुंबयच्यान गांवाक आयिल्लें. दुचाकी वयल्यान भावाक घेवन निकिता आंब्रड सावन फोंडाघाटाक येतालें. कसवण, तळवडे बौद्धवाडी देंवतेचेर पावतकच मुखारच्यान एसटी बस आयली. बशीक वाट दितना दुचाकी रस्त्या लागसारच्या ग्रीडाचेर निसरली आनी दोगांय सकयल पडलीं. ह्या अपघातांत निकिताच्या तकलेक खर जखम जाली. भाव वैभवाक किरकोळ दुखापत जाली.
अपघाता उपरांत एसटी बस ड्रायव्हर, कंडक्टर आनी प्रवासी एकठांय येवन दोगांयक आंब्रडच्या डॉ. खटावकार हॉस्पिटलांत व्हेलें. प्राथमीक उपचारा उपरांत दोगांकय कणकवलीच्या जिल्हो हॉस्पिटलांत धाडलें. तपासणी उपरांत वैजकी अधिकाऱ्यांनी निकिताक मरण आयिल्ल्याचें सांगलें.
अपघाता उपरांत एसटी बस ड्रायव्हर कृष्णा नेरकार हांणी कणकवली पुलीस स्टेशनांत कागाळ दाखल करून दुचाकी चलोवप्याचे चुकीक लागून अपघात जाल्ल्याचे सांगलें. ते प्रमाण दुचाकी चलोवप्याचेर गुन्यांव नोंद केला.
मामाच्या घरा लग्नाची पत्रिका दिली पूण...
फोंडाघाट, गांगोवाडीची निकिता दिलीप सावंत कांय दिसां आदीं मुंबयच्यान आपल्या गांवांत लग्नाची पत्रिका दिवपाक आयिल्ली. आयतारा सकाळीं ती आपल्या भावाक घेवन लग्नाची पत्रिका दिवपाक भायर सरली. मामाच्या घरा पत्रिका दिवन परत येतना अपघात जालो. आनी तिका मरण आयलें. लग्न सुवाळो 23 फेब्रुवारीक आशिल्लो. पत्रिका छापून वांटपाचे काम सुरु केल्लें. ताचे पयलींच हो अपघात जालो आनी लग्न जावन सुखी जिवीत जगपाचें सपन अपुरे उरले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
