भांगरभूंय | प्रतिनिधी
कॅन्सर दुयेंसा पसून वाटावपाक मोहीम: सिद्धी प्रभू
दिवचल: सिंगल यूज प्लास्टीक दिवपी वेपार्यां बरोबरच आतां ती मागपी गिरायकांकूय सांखळी नगरपालिका दंड दितली. हे विशीं सांखळी बाजारांत 21 दीस जागृताय केले उपरांत दंडात्मक कारवाय करतले. ही मोहीम फक्त सांखळी नितळ आनी प्लास्टीक मुक्त दवरपा खातीर नासून सांखळेकारांक आनी बाजारांत येवपी लोकांक कॅन्सरा सारक्या भिरांकूळ दुयेंसा पसून वाटावपा खातीर आसा अशें नगराध्यक्षा सिद्धी प्रभू हांणी बाजारांतले जागृताय मोहिमे वेळार सांगलें.
गोंय कोयर वेवस्थापन मंडळ गोंय प्रदुशण नियंत्रण मंडळ, मिनरल फावंडेशन हांच्या जोड पालवान आनी गोदरेज कंपनीच्या सीएसआर खाला सांखळी बाजारांत जागृताय मोहीम हातांत घेतिल्ली. ह्या वेळार उपनगराध्यक्ष आनंद काणेकार आनी हेर अधिकारी, तरणाटे हाजीर आशिल्ले.
येता त्या 21 दिसांत ही जागृताय करीत आसतनाच खंयच्या सिंगल यूज प्लास्टिकाचेर बंदी घालूंक शकता हाचेर चर्चा करतले. तशेंच सगल्यांक बरोबर घेवन जागृताय मार्गदर्शनूय करतले आनी उपरांतूच दंडात्मक कारवाय सुरू करतले अशें नगराध्यक्ष सिद्धी प्रभू हांणी सांगलें.
सांखळी बाजारांत हे विशीं जागृताय करपी वण्टीपत्रकां दरेक दुकानाचेर लायतले. तशेंच दुकानदारांनीय हे विशीं लोकां मदीं जागृताय करपाचें आवाहन करतात. प्लास्टिकाचो चड वापर हाका फक्त दुकानदारूच जापसालदार नासून सामान घेतले उपरांत पोतयो मागपीय तितलेच जापसालदार आसात. ताका लागून दुकानादारांचो नायलाज जायत आसता. ते खातीर गिरायकांनी बाजारांत येतना कापडी पोतयो घेवन येवच्यो अशें आवाहन नगराध्यक्षा सिद्धी प्रभू हांणी केलें.
ह्या वेळार हाजीर आशिल्ल्यो मिनरल फावंडेशनाच्यो प्रकल्प संचालिका श्रद्धा रांगणेकार हांणी हे मोहिमे विशीं म्हायती दिली. बाजारांतलीं सगलीं दुकानां आनी विक्रेत्यां कडेन भोंवून मार्गदर्शन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
