भांगरभूंय | प्रतिनिधी
गुवाहाटी, खबरां संस्था ः आसाम राज्य सरकारान एक लिटरा परस सकयल्या वजनाच्या उदकाच्या प्लास्टीक बाटल्यांचेर बंदी घालपाची घोशणा केल्या. गांधी जयंती दिसा, 2 ऑक्टोबर सावन ही बंदी लागू जातली आनी राज्याच्या हरित आनी भलायकेच्या फुडारा खातीर हें एक म्हत्वाचें पावल थारतलें. आसाम राज्यान प्लास्टीक कोयर आनी ताचो पर्यावरणाचेर जावपी वायट परिणाम ना करपाचो संकल्प केला आनी ही बंदी त्या यत्नांतलो एक भाग.
आसाम पर्यावरण आनी रान खात्यान 23 ऑगस्ट 2023 दिसा अधिसुचोवणी जारी केल्या. सिंगल युज प्लास्टिक (एसयूपी) वस्तू, जाच्या पसून कोयर चड जाता, त्योय जैवविघटनशील नात अशें अधिसुचोवणेंत म्हणलां. ते खूब काळ तिगतात. तांका लागून पर्यावरणाक लुकसाण जाता आनी पर्यावरणाचे भलायकेक धोको निर्माण जाता. देखूनच तांचेर बंदी घाल्या. तांचें उत्पादन, खरेदी, विक्री आनी सांठो करपाक बंदी आसा.
ही अधिसुचोवणी 2 ऑक्टोबर 2023 सावन लागू जातली. आनी ताचो परिणाम शारी आनी गांवगिरो वाठार, थळावो प्रशासन, जिल्लो प्रशासन आनी पुलीस खातें आनी आसामाच्या प्रदुशण नियंत्रण मंडळाक लागू जातलो.
राज्य सरकारान प्लास्टीक कोयर आनी ताचो पर्यावरणाचेर जावपी हानीकारक परिणाम ना करपाचो संकल्प केला आनी ही बंदी ताचोच एक भाग. – आसामचे मुख्यमंत्री हिमंता बिस्वा सरमा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
