भांगरभूंय | प्रतिनिधी
भुरग्यांनी आनी तरणाट्यांनी पुस्तकां वाचचीं आनी सर्जनशील लेखना खातीर आपली कुशळटाय वाडोवची अशें आवाहन सभापती रमेश तवडकार हांणी केलां.
गीतकार संजय बोरकार हांणी बरयिल्ल्या ‘सई’ ह्या मराठी कविता झेल्याचें लोकार्पण केले उपरांत सभापती तवडकार उलयताले. ही कार्यावळ पर्वरे जाली. ह्या वेळार गोमंतक मराठी भाषा परिषदेचे अध्यक्ष डॉ. मधू घोडकिरेकार, प्रकाशक अभय नायक, अॅड. चेत्रा नायक, मच्छिंद्र शिरोडकार आनी हेर मानेस्त हाजीर आशिल्ले.
पुस्तकां फकत जिणेचो योग्य मार्ग दाखयनात, तर जिणेचो आनंद वाडोवपा खातीरय मदत करता. भुरग्यांनी साहित्याचे सगळे प्रकार आनी आपल्याक वाचपाक येवपी सगळ्या भाशांतल्यान वाचन करचें. हे वरवीं हेर प्रदेशांची संस्कृती, परंपरा आनी इतिहासाची वळख जाता अशें सभापती तवडकार हांणी मुखार म्हणलें.
हेर भाशांतलीं पुस्तकां प्रादेशिक भाशांनी अणकारीत जावंक जाय. हे वरवीं तीं लोकांक वाचपाक मेळटलीं. भाशेंच्या जाणकारांनी हे काम हातांत घेवचें आनी साहित्य मळाक उर्बा दिवची. पालक आनी शिक्षकांनी आपल्या भुरग्यांक आनी विद्यार्थ्यांक पुस्तकां वाचपा खातीर उर्बा दिवची अशें तांणी मुखार म्हणलें आनी कवी संजय बोरकार हांकां परबीं भेटयली.
संजय बोरकार हांचीं पांच पुस्तकां प्रसिद्ध जाल्यांत. तातूंत इंग्लिश आनी कोंकणी पुस्तकांचो आसपाव आसा. तांचीं सुमार ७० पदां आसात आनी तांणी स्वता कोंकणी संगीत अल्बमांची निर्मिती केल्या. कोंकणी आनी मराठी सयत तांचीं इंग्लिशूय पदां आसात. ‘सई’ हें तांचें मराठी कवितांचें पयलें पुस्तक.
रमेश तवडकार हांच्या विधानाचो संदर्भ दियत लेखक डॉ. घोडकिरेकार हांणी म्हणलें ‘पुस्तक वाचन आनी लेखनाचे गूण ल्हान पिरायेंतच भुरग्यां मदीं घालूंक जाय. जिणेंच्या संघर्शांत तांकां ह्या गजालींचो नक्कीच फायदो जाता,”
संजय बोरकार हांणी ‘सई’ हें पुस्तक आपणें एक वेगळो संकल्प घेवन बरयलां आनी ह्या माध्यमांतल्यान आपल्या कल्पनेंतल्या ‘सई’ हे चलयेक आपूण आपले अणभव सांगता अशें सांगलें.
ह्या वेळार चित्रकार आदित्य नायक हांचो भोवमान केलो. अभय नायक हांणी येवकार दिलो आनी संजय बोरकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
