भांगरभूंय | प्रतिनिधी
गोमंतक साहित्य सेवक मंडळ ह्या सुमार 96 वर्सांचे पोरणे संस्थेची फुडल्या तीन वर्सां खातीर नवी कार्यकारिणी वेंचून काडपा खातीर येता त्या 27 एप्रीलाक जावची आशिल्ली वेंचणूक सद्या वादाच्या भोवऱ्यांत बुचकळे खाता, आनी संस्थेचो एकतंत्री- एकमंत्री कारभार पळयल्यार तशें जावप सामकेंच अनपेक्षीत नाशिल्लें. साहित्य सेवक मंडळाचे अध्यक्ष रमेश वंसकार हे आपलें व्हडें तांच्या ‘सेवकां’ सयत कशेंबशें पलतडीं व्हरपा खातीर जिवाचें रान करता, तरी तांच्या एकतंत्री कारभाराक आव्हान दिवन कोणे तरी वेंचणूक रिंगणांत आपली हॅट उडोवप हें ‘नसे थोडके’ अशेंय म्हणचें पडटलें. गोमंतक मराठी साहित्य सेवक मंडळ हे संस्थेक तसो गौरवशाली असो इतिहास आसा. बा. द. सातोस्कार सयत माधव गडकरी, वामन राधाकृष्ण, दत्ता सराफ, नारायण आठवले हांचे सयत जायत्या दिग्गजांनी हे संस्थेचे अध्यक्ष म्हणून काम करतना हे संस्थेचो वावर एक वेगळे उंचायेर व्हरून दवरपाचें काम केलें. पूण काळाच्या ओघांत ही संस्था चुकीच्या हातांत गेल्ल्यान संस्थेचो मूळ उद्देश कुशीक पडून संस्थेची परवड सुरू जाली. फक्त मिरोवपा खातिरूच अध्यक्ष आनी हेर पदांचो वापर जावपाक लागलो आनी हे संस्थेन आपल्या हातांतल्यान हेर कोणाच्याय हातांत वच्चें न्हय हे खातीरूच यत्न जायत गेले. फाटले वेंचणुकेंतूय ह्या मंडळाक तातूंत यश आयिल्ल्यान हे खेपे तोच प्रयोग फुडें व्हरून ही संस्था विरोधा विणे हायजॅक करपाचे मनसुबे रचले. पूण दुर्दैव अशें की, अध्यक्ष आनी हेर एक दोन पदां खातीर कांय वांगड्यांनी उमेदवारी अर्ज दाखल केल्ल्यान ह्या मंडळाचें गणीत कांय प्रमाणांत इबाडलां.
सुमार शंबर वर्सांचो इतिहास आशिल्ल्या हें संस्थेच्या फाटल्या कांय वर्सांतल्या वावराचेर मंडळाचे पोरणे वांगडी पोटतिडकीन उलयतना दिसतात हें खरें आसलें तरी, हे संस्थेंक पयलीचें वैभव मेळोवन दिवपाचें आसल्यार कोण तरी निग्रह करून ते खातीर फुडाकार घेवपाची गरज आशिल्ली, आनी नामनेची कवयित्री डॉ. अनुजा जोशी हांच्या रुपान कांय जायना अशा मक्तेदारी आड आवाज उठयलो तर ताका दाद दिवचीच पडटली. आमचो इश्ट रमेश वंसकार हाका आमचो विरोध आसा अशांतलें काय ना. पूण फाटल्या कांय वर्सां मंडळाचो चालू आशिल्लो कारभार त्रयस्थ नदरेंतल्यान पळयल्यार ताचेर कोणूय समाधानी आसा अशें म्हणपाक जावचें ना. ‘हम करेसो कायदा’ ह्या न्यायान गोमंतक साहित्य सेवक मंडळाचे काम फाटलीं तीन वर्सां चालू आसा, आनी तें करतना संस्था ही तिचे घटने प्रमाण चलोवची पडटा. नेमा प्रमाण सगलें काम फुडें व्हरपाची अध्यक्षाची जापसालदारकी आसता पूण तीन वर्सां साबार बसका घेवप ना, कार्यकारी मंडळाच्यो बसका जावप ना, मंडळाच्या वांगड्यां मेरेन हिशेबाचो वर्सुकी ताळेबंद पावोवप ना हाची जायते वांगडी तिडक उक्तायतना दिसतात. आनी ताचें पडसाद 27 एप्रीलाचे बसकेंत आयकूंक मेळटले अशें संकेत मेळटात. मंडळाच्या वांगड्यांची वळेरी 228 वांगडी इतली लांब आसतना, वर्सुकी साबार बसकेक फक्त तीस, चाळीस लोकांचे तांकीच्या सभाघरांत अध्यक्ष कशी आयोजीत करपाक शकतात, असो प्रश्न जायत्या जाणांनी उपस्थीत केल्ल्यान ताका ‘फिक्सिंगा’ चो वास आयल्यार नाक वेंगडावपाची गरज ना. साबार बसके खातीर वांगडीच येवचे नात आनी आपले ‘सेवक’ तितले मतदान करून वतले हेंच अध्यक्षाक अभिप्रेत आसा काय कितें हाची जाप हे खेपे घडये तांकां दिवची पडटली.
गोमंतक साहित्य सेवक मंडळाच्या तीन वर्सुकी वेंचणुकेची कार्यावळ संस्थेच्या दरेका वांगड्या मेरेन वेळार म्हणल्यार उणेच पंदरा दीस पयली पावोवपाची जापसालदारकी अध्यक्षाचेर आसतना आपणे खोगीरभरती केल्ल्या नामधारी वांगड्यां मेरेन ती पावोवपाचें काम जालें अशीय जायत्या वांगड्यांची कागाळ आसा, आनी तातूंत बरेंच तथ्य दिसून येता. अर्ज दाखल करपाच्या पयल्या दिसा वेंचीक वांगड्यांक व्हॉट्सअॅपाचेर ही कार्यावळ धाडिल्ल्याची कागाळ आसा. हरशीं एकाय दिसाळ्यांत वेंचणुकेची बातमी धाडली ना हाचें फाटल्यान अध्यक्षाचो लिपिल्लो अजेंडाच ठळकपणान दिसून येता अशेंय कांय जाण सांगतात. आयच्या डिजिटल युगांत खरें म्हणल्यार वांगड्यांक कसलीय कागाळ करपाक वाव दिवप हेंच एके तरेचें अपेसूच थारता. पूण सुमार शंबर वर्सांचे हे साहित्यीक संस्थेक डिजिटल पर्वाचें वा तंत्रगिन्यानाचे पुरायपणान वावडें आसचें हाका कितें म्हणपाचें? संस्थेच्या सभाघरा खातीर भाडें घेतात आनी कोण तरी अंतू ‘बर्वा’ हें भाडें रोखीन घेता आनी सादी पावतीय जर दिना जाल्यार शंबर वर्सांच्या हे संस्थेची कशी परवड चालू आसा हें लक्षांत येता. गोवा मराठी पत्रकार संघाचे सभेच्या आयोजना खातीर सभाघर आरक्षीत करपा खातीर ह्या अतूं ‘बर्वा’ कडेन गेल्यार रोखीन पयशे दिवपाची अट ताणे पयलीं सांगली. मंडळाच्या बँक खात्यांत भाड्याची रक्कम ट्रान्स्फर करपाची तयारी दाखयली तेन्ना तशें कसलेंच खातें ना, अशें म्हाका सांगलें. रक्कम रोखीन दिल्यार रितसर पावतीय मेळना हाका कितें म्हणपाचें. अखील गोमंतक मराठी साहित्य संमेलनाच्या हालींच काणकोणां केल्ल्या आयोजना उपरांत आयच्या बदलपी युगांत डिजिटल बँकिंगे पसून पयस पयस रावपाक पळोवपी हे शंबर वर्साचे संस्थेंत परिवर्तन घडोवन हाडपाची गरज आसा, आनी ते खातीर म्हाका किदें ताचें ही वृत्ती कुशीक सारून सामकार येवचें पडटलें.
गोमंतक साहित्य सेवक मंडळ रोखडेंच आपले शेंकडो पुराय करतलें. काल पयर स्थापन जाल्ल्यो संस्था लेगीत बदलिल्ल्या डिजिटल युगा वांगडा फुडें वता आसतना गोमंतक साहित्य सेवक मंडळाची स्वताची बॅवसायट ना ही सामकी दुर्दैवाची गजाल आसा. तशेंच मंडळा कडेन सादी ‘इमेल आयडी’ ना हातूंतल्यान ह्या पोरणे आनी इतिहासीक म्हत्व आशिल्ल्या संस्थेचो एकविसाव्या शतमानांत बैलगाडयेंतल्यान जावपी प्रवास कोणाच्याय लक्षांत येतलो. साहित्या कडेन पयसुल्ल्यान लेगीत कसलोच संबंद नाशिल्ल्या आपल्या गोतावळ्यांतल्या लोकांची मंडळाचे वांगडी म्हणून अध्यक्षान केल्ली खोगीरभरती होवूय मंडळाच्या साहित्या कडेन संबंद आशिल्ल्या पोरण्या वांगड्यां मदीं एक चर्चेचो विशय आसा, आनी साहित्य मंडळाच्या ह्या नामधारी वांगड्यांच्या भरवश्याचेर आपलें व्हडें ह्या सह‘सेवकां’ सयत पलतडीं व्हरप होच सध्याच्या मंडळाचो एक कलमी कार्यक्रम दिसता. विठ्ठल गांवस आनी राजमोहन शेट्ये हे जाल्यार विरोधा विणे वेंचून आयल्यात. आतां हेर पांच स पोरण्या वांगड्यां सयत अध्यक्षाक फुडलीं तीन वर्सां मिरोवपाचें आसा. कांय पोरणी मुळां लेगीत तातूंत दिसतात. बुजूर्ग संस्थेच्या नांवान वैयक्तीक लौकीक लाबाचे वेव्हार चालू आशिल्ल्याचे जे आरोप करतात तातूंत तथ्य ना अशें म्हणप चुकीचें थारतलें. वेंचणूक प्रक्रियेंत पारदर्शकताय जाल्यार अजिबात दिसना. 27 एप्रीलाक पर्वरे एक दिसाचें मराठी राजभाश साहित्य संमेलन जावपाचें आसतना त्याच दिसा साबार बसकेचें आयोजन आनी वेंचणूक कार्यावळ दवोरप हो लेगीत सध्याच्या कार्यकारी मंडळाच्या लिपिल्ल्या अजेंडाचो वांटो आसचो ना अशें म्हणपाक जावचें ना. मराठी पत्रकार आनी साहित्यिकांनी आतां उदासीनताय कुशीक सारून आपली ही संस्था मार्गार लावप ही काळाजी गरज आसा.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
