भांगरभूंय | प्रतिनिधी
दामोदर मावजो: लेखक आकाश गांवकार हांच्या कविता संग्रहाचें विमोचन
फोंडें: वाचन हें साहित्याचे उदरगतींत भोव परिणामकारक थारता. लेखक आपली वाचनावरवीं सृजनशिलताय वाडोवपाक लागलो जाल्यार साहित्य अदीक सृजन जातलें. आपल्या भाशेंतल्या जाता तितल्या शब्दभांडाराचो वापर लेखकांनी करपाक जाय. युवा लेखक ह्या मळार वावर करतात ही तोखणायास्पद गजाल. तरणाट्यांनी अशे तरेच्या कार्यावळींनी वांटेकार जावप गरजेचें. आकाशालें हें पुस्तक सगळ्या युवकांक बरोवपाक प्रेरीत करतलें अशें ज्ञानपीठ जैतिवंत तशेंच ज्येश्ठ साहित्यीक दामोदर मावजो हांणीं सांगलें.
रवींद्र भवन, मडगांव हांगा आकाश भालचंद्र गांवकार हांच्या ’सर्जिकल स्ट्रायक’ ह्या पुस्तकाच्या विमोचन सुवाळ्या वेळार अध्यक्षीय भाशणांत मावजो उलयताले. ह्या वेळार माचयेर मानाचे सोयरे म्हणून डॉ. पुर्णानंद च्यारी, पुस्तकाचेर भाश्य करपी डॉ. हनुमंत चोपडेंकार हाजीर आशिल्ले. भालचंद्र गांवकार हांणी मानेस्तांक येवकार दिलो.
डॉ. पुर्णानंद च्यारी हांणी आपले मोलादीक विचार सभाघरांत मांडले. फुडाराच्या दृश्टीकोनांतल्यान म्हत्वाच्या गजालींचेर तांणीं उजवाड घातलो.
डॉ हनुमंत चोपडेंकार हांणी पुस्तकाचेर उलयतना पुस्तकाची वळख घडोवन योग्य तें मार्गदर्शन केलें. लेखकाक फुडाराचे नदरेन योग्य सल्लो तशेंच गरजेचें मार्गदर्शन तांणीं केलें. तांचें नियोजनबद्द उलोवपांतल्यान कार्यावळीची सोबा वाडली. ह्या वेळार लेखकानूय आपले उमाळे उक्तायले.
ह्या वेळार कोंकणी म्हालगडे नारायण मावजो आनी नागेश करमली हांकां श्रध्दांजली ओपली. कार्यावळीचें सुत्रसंचालन समिक्षा पै धुंगट हांणी केलें, जाल्यार अनीश अग्नी हांणी उपकाराचें उलोवप केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
