भांगरभूंय | प्रतिनिधी
नवी दिल्ली, खबरां संस्था ः साहित्याच्या मळार देशांत सगळ्यांत प्रतिश्ठीत साहित्य अकादेमी पुरस्कार प्रक्रियेंत म्हत्वाचो बदल केला. आतां ह्या वर्सा सावन साहित्य अकादेमीच्या मुखेल पुरस्कारा खातीर लेखक आनी प्रकाशकांक पुस्तकां सादर करचीं पडटलीं. ताची निमाणी तारीख 28 फेब्रुवारी आसा अशी म्हायती साहित्य अकादमीचे सचीव के. श्रीनिवास राव हांणी दिली. साहित्य अकादेमीन मान्यताय दिल्ल्या २४ भारतीय भाशांनी हे पुरस्कार दर वर्सा दितात.
साहित्य अकादेमीचे सचीव के. श्रीनिवास राव हांणी सांगलें, 2025 वर्साच्या पुरस्कारां खातीर 2019 ते 2023 ह्या काळांत (1 जानेवारी 2019 ते 31 डिसेंबर 2023 मेरेन) उजवाडाक आयिल्ल्या पुस्तकांची प्रत अर्ज भरून विचारा खातीर धाडूं येता. ही म्हायती चडांत चड लोकां मेरेन पावोवपा खातीर 24 भारतीय भाशांतल्या मुखेल दिसाळ्यांनीय ह्या विशींची जायरात जारी केल्या अशें तांणी सांगलें.
साहित्य अकादमीचे सचीव के. श्रीनिवास राव हांणी प्रसिद्धी पत्रक जारी करून सविस्तर म्हायती दिली. तातूंत तांणी म्हणलें, 1955 सावन अकादेमीन मान्यताय दिल्ल्या 24 भारतीय भाशांनी दर वर्सा साहित्य अकादेमीचे पुरस्कार दितात. अकादेमीन मान्यताय दिल्ल्या भाशांनी भारतीय लेखकांनी बरयल्ल्या सगळ्यांत उत्कृश्ट पुस्तका खातीर हो पुरस्कार दितात. ह्यो भासो म्हळ्यार आसामी, बंगाली, बोडो, डोगरी, इंग्लीश, गुजराती, हिंदी, कन्नड, काश्मीरी, कोंकणी, मैथिली, मल्याळम, मणिपुरी, मराठी, नेपाळी, ओडिया, पंजाबी, राजस्थानी, संस्कृत, सिंधी, तमिळ, तेलुगू आनी उर्दू आसात.
के. श्रीनिवास राव हांणी सांगलें, साहित्य अकादेमी वतीन मान्यताय दिल्ल्या 24 भारतीय भाशांनी 2025 वर्सा खातीर साहित्य अकादेमी पुरस्कार मेळोवपा खातीर लेखक आनी प्रकाशकां कडल्यान पुस्तकां मागयल्यात. संबंदीत पुस्तक 2019, 2020, 2021, 2022, 2023 ह्या काळांत पयलेच खेपे (1 जानेवारी 2019 ते 31 डिसेंबर 2023) उजवाडाक आयल्लें आसपाक जाय.
पुस्तकाची प्रत सयत 28 फेब्रुवारी 2025 मेरेन अर्ज सादर करप गरजेचें आसा. संदर्भा खातीर पुरस्कारा विशीं चड तपशील, साहित्य अकादेमी पुरस्काराचे नेम www.sahitya-akademi.gov.in ह्या संकेतथळार उपलब्ध आसात. तशेंच साहित्य अकादेमीच्या पुरस्कारा खातीर आतां लेखक आनी प्रकाशकांक स्वता अर्ज भरून पुस्तक सादर करचें पडटलें. हे खातीर साहित्य अकादेमीन एक नमुनो अर्जूय संकेतथळाचेर उजवाडायला. हे विशीं सविस्तर म्हायती अकादेमीच्या संकेतथळार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.