भांगरभूंय | प्रतिनिधी
बाल आनी युवा पुरस्कार एक करपाक सोदता सरकार
नवी दिल्ली : केंद्र सरकारान साहित्य अकादेमीच्या पुरस्कारां खातीरची नामांकन प्रक्रिया बदलपाचें थारायलां. तशेंच बाल आनी युवा साहित्य पुरस्कारांचो मेळून एक विभाग केला. साहित्य अकादेमीच्या वांगड्यांनी हाका विरोध करपाचें थारायलां, अशें कळटा. सध्या देशभरांत अकादेमी साहित्य पुरस्कार जैतिवंतांनी विरोधाचो सूर लायला.
नव्या धोरणा प्रमाण खंयचोय लेखक आपल्या वा हेर उमेदवारांच्यां नांवाची शिफारस करपाक शकता. हो सरकाराचो अकादेमी सारके संस्थेंत थेट हस्तक्षेप जालो. हें अशेंच चल्लें जाल्यार सरकार सगल्याच संस्थांनी हस्तक्षेप करून आपल्याक जाय तें करतलें, अशी भिरांत कांय साहित्यीकांनी उक्तायल्या. सरकारान ही नोटीस एक म्हयन्या पयलीं दिल्ली. समितीच्या वांगड्यांनी चर्चा करून हाका जाप दिवची अशें म्हणिल्लें. आतां अकादेमीच्या वांगड्यांनी 23 जूनाक दिल्लींत बसका आपयल्या. आपलें म्हणणें अकादमी सरकाराक पत्र बरोवन कळयतली.
साहित्य अकादेमीचे 24 भाशांतले पुरस्कार दरवर्सा दितात. सगले वांगडी 200 नांवां सुचयतात. तज्ञ समिती मागीर तातूंतलीं 50 नांवां पयल्या टप्प्यांत वेंचून काडटा. मागीर तातूंलीं पांच नांवां काडटात. निमणे दोन गुप्त ज्युरी तातूंतलें एक नांव वेंचून काडटा आनी ताका पुरस्कार जाहीर जाता.
उक्तेपणी हें करीत जाल्यार राजकी फुडारी आपलीं वशिल्याचीं नांवां मुखार काडटले. अकादेमीची दर्जेदार निवड प्रक्रिया म्हेळी जातली. आमी आमचो निशेध उक्तावपी पत्र अकादेमी अध्यक्ष आनी सरकाराक दितले, अशें अकादेमीच्या एका वांगड्यान सांगलें. हे वट्ट 80 वांगडी आसात.
मजगतीं, केंद्र सरकाराच्या थेट हस्तक्षेपा विशीं ज्ञानपीठ पुरस्कार जैतिवंत दामोदर मावजो हांणी हुस्को उक्तायला. सगल्यांनी हाका विरोध करपाक जाय, अशें तांणी सांगलें.
युवा आनी बाल पुरस्कार विलीन करून एकूच पुरस्कार दिवपाचोय केंद्र सरकाराचो विचार आसा. ताचे आडूय खर प्रतिक्रिया आयल्यात.
युवा पुरस्कार जिखपी मराठी साहित्यीक विरा राठोड हांणी सांगलें, सरकारान खरें म्हणल्यार आनीक चड विभागांनी पुरस्कार दिवपाक जाय. बाल आनी युवा पुरस्कार हे वेगळे. ते एक जावंक शकनात, अशेंय तांणी सांगलें.
मजगतीं, गोंय कोंकणी अकादेमीचे अध्यक्ष अरुण साखरदांडे हांणीय हे दोनूय पुरस्कार वेगवेगळेच आसपाक जाय, अशें म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
