भांगरभूंय | प्रतिनिधी
भांगरभूंय । खबरां मेज
पणजीः साहित्य अकादमीच्या 2022 वर्साच्या अणकार पुरस्कारांचें वितरण शेनवार 25 मार्चाक सांजे 5 वरांचेर पणजे शारांतल्या इन्स्टिट्यूट मिनेझीस ब्रागांझा सभाघरांत जातलें. 50 हजार रुपया आनी कोरांतिल्ली तांब्याची कास्केट अशें ह्या पुरस्काराचें स्वरूप आसा.
24 भाशांतल्या 24 जाणांक व्हो पुरस्कार फावो जाला. साहित्य अकादमीचे अध्यक्ष माधव कौशीक हांचे हस्तुकीं हे पुरस्कार भेटयतले. ज्ञानपीठ पुरस्कार जैतिवंत कोंकणी लेखक दामोदर मावजो ह्या वेळार मुखेल सोयरे म्हणून हाजीर रावतले.
आयतार 26 मार्चाक साहित्य अकादमी वतीन इन्स्टिट्यूट मिनेझीस ब्रागांझा सभाघरांत सकाळीं 10 वरांचेर अणकार पुरस्कार फावो जाल्ल्यांची भेट कार्यावळ जातली आनी दनपारां 2.30 वरांचेर अभिव्यक्ती कार्यावळ जातली. हे कार्यावळीचें उक्तावण इंग्लिश लेखक जेरी पिन्टो हे करतले. साहित्य अकादमीचे उपाध्यक्ष प्रा. कुमूद शर्मा अणकार भेट कार्यावळीचे येजमानकी चलतयली. अणकार पुरस्कार फावो जाल्ले काय जैतिवंत आपलीं मनोगतां उक्तायतले
अणकार पुरस्कार फावो जाल्ले 2022 वर्साचे जैतिवंत फुडले भशेनः माणिकराव नायक गांवणेकार (कोंकणी), प्रमोद मुजूमदार (मराठी), डॉ जुरी दत्ता (आसामी), सौभीक डी सरकार (बंगाली), देवोजीत ब्रम्हा (बोडो), डॉ निर्मल विनोद ( डोंगरी), एन कल्याण रमण (इंग्लिश), प्रा. विजय पांड्या (गुजराती), डॉ गौरी शंकर रैना (हिंदी), डॉ पद्मराज दंडवती (कन्नड), अब मजिद मीर ( शबनम तिलगामी) (काश्मिरी), डॉ रत्नेश्वर मिश्रा (मैथिली), डॉ चतानंथ अच्युत उन्नी (मल्ल्याळम), सलाम तोम्बा (मणिपुरी), पूर्णा कुमार सरमा (नेपाळी), कमला सतपथी (ओडिया), भुपिंदर कौर प्रीत (पंजाबी), डॉ मदन गोपाल लोढा (राजस्थानी), डॉ गोपबंधू मिश्रा ( संस्कृत), लक्ष्मण किसकू (संथाली), भगवान अटलानी ( सिंधी), के नल्लाथांबी (तामिळ), वरला आनंद (तेलगू) डॉ रेणू बहल (उर्दू)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
